*D Mîner geswisterde zwei noch sint. mîn swester Schoysiane ein kint gebar; der vrühte lac si tôt. der herzoge Kyot von Katelangen was ir man; der enwolde ouch sît vreude hân. Sigunen, des selben töhterlîn, bevalch man der muoter dîn. Schoysianen tôt mich smerzen muoz enmitten ime herzen. ir wîplîch herze was sô guot, ein arche vür unkiusche vluot. ein magt, mîn swester, pfligt noch site, sô daz ir volget kiusche mite. Repanse de schoye pfligt des Grâles, der sô swære wigt, daz in diu valschlîch menscheit nimmer von der stat getreit. ir bruoder und mîn ist Anfortas, der bêdiu ist unde was von art des Grâles hêrre. dem ist leider vreude verre, wan daz er hât gedingen, in sul sîn kumber bringen zem endelôsem gemache. mit wunderlîcher sache ist ez im komen an riwen zil, als ich dir, neve, künden wil. pfligstû denne triwe, sô erbarmet dich sîn riwe.

*m mîner geswisterde noch zwei sint. mîn swester Schoisiane ein kint gebar; der vruht lac si tôt. der herzoge Kyot von Kathelangen was ir man; der enwolte ouch sît niht vröude hân. Sigunen, daz selbe töhterlîn, bevalch man der muoter dîn. Schoisianen tôt mich smerzen muoz enmitten in mînem herzen. ir wîplîch herze was sô guot, ein arc vor unkiuscher vluot. ein maget, mîn swester, pfliget noch sit, sô daz ir volget kiusche mit. Repanse de Schoie pfliget des Grâles, der sô swær wiget, daz in diu valschlîche menscheit niemer von der stat †streit†. ir bruoder und mîn ist Anfortas, der beidiu ist und was von arte des Grâles hêrre. dem ist leider vröide verre, wan daz er hât gedingen, in solle sîn kumber bringen zuom endelôsen gemach. mit wunderlîcher sach ez ist nû komen an riuwen zil, als ich dir, neve, künden wil. pfligestû dan triuwe, sô erbarmet dich sîn riuwe.

*G Mîner geswisterde noch zwei noch sint. mîn swester Schoysiane ein kint gebar; der vrühte lac si tôt. der herzoge Kiot von Katelange was ir man; derne wolde ouch sît niht vröude hân. Sigunen, des selben töhterlîn, bevalch man der muoter dîn. Schoysianen tôt mich smerzen muoz enmitten ime herzen. ir wîplîch herze was sô guot, ein arche vür unkiusche vluot. ein maget, mîn swester, pfliget noch site, sô daz ir kiusche volget mite. Urrepanse de schoye pfliget des Grâles, der sô swære wiget, daz in diu valschlîch menscheit nimmer von der stat treit. ir bruoder unde mîn ist Anfortas, der beidiu ist unde was von arte des Grâles hêrre. dem ist leider vröude verre, wan daz er hât gedingen, in sul sîn kumber bringen ze dem endelôsen gemache. mit wunderlîcher sache ist ez im komen an riuwen zil, als ich dir, neve, künden wil. pfligestû danne triuwe, sô erbarmet dich sîn riuwe.

*T Mîner geswisterde zwei noch sint. Mîn swester Schosiane ein kint gebar; der vrühte lac si tôt. der herzoge Kyot von Katelange was ir man; der enwolte ouch sît niht vröude hân. Sygune, des selben töhterlîn, bevalch man der muoter dîn. Schosianen tôt muoz mich smerzen enmitten in mînem herzen. ir wîplîch herze was sô guot, ein arche vür unkiusche vluot. ein maget, mîn swester, pfliget noch site, sô daz ir volget kiusche mite. Repanse de joie pfliget des Grâles, der sô swære wiget, daz in diu valschlîch menscheit niemer von der stat getreit. ir bruoder unde der mîn ist Anfortas, der beidiu ist unde was von art des Grâles hêrre. dem ist leider vröude verre, wan daz er hât gedingen, in sul sîn kumber bringen zeinem endelôsen gemache. mit wunderlîcher sache ist ez im komen an riuwen zil, alsich dir, neve, sagen wil. pfligest dû danne triuwe, sô erbarmet dich sîn riuwe.