*D Missewende was sîn riwe, er balsem ob der triwe. al werltlîchiu schande in vlôch; werdecheit sich in sîn herze zôch. dich solden hazzen werdiu wîp durch sînen minneclîchen lîp. sîn dienst was gein in sô ganz, ez machte wîbes ougen glanz, die in gesâhen, von sîner süeze. got daz erbarmen müeze, daz dû ie gevrumtest sölhe nôt. mîn swester lac ouch nâch dir tôt, Herzeloyde, dîn muoter." "neinâ, hêrre guoter! waz sagt ir nû?", sprach Parzival. "wære ich denne hêrre übern Grâl, der möhte mich ergetzen niht des mæres mir iwer munt vergiht. bin ich iwer swester kint, sô tuot, als die mit triwen sint, unt sagt mir sunder wankes vâr: sint disiu mære beidiu wâr?" Dô sprach aber der guote man: "ich enbinz niht, der dâ triegen kan. dîner muoter daz ir triwe erwarp: dô dû von ir schiede, zehant si starp. dû wære daz tier, daz si dâ souc, unt der trache, der von ir dâ vlouc. ez widervuor in slâfe ir gar, ê daz diu süeze dich gebar.

*m missewende was sîn riuwe, er balsam ob der triuwe. al werltlîchiu schande in vlôch; wirdicheit sich in sîn herze zôch. dich solten hazzen werdiu wîp durch sînen minneclîchen lîp. sîn dienst was gegen im sô ganz, er machte wîbes ougen glanz, die in gesâhen, von sîner süeze. got daz erbarmen müeze, daz dû ie gevromtest soliche nôt. mîn swester lac nâch dir tôt, Herczeloide, dîn muoter." "neinâ, hêrre guoter! waz saget ir mir?", sprach Parcifal. "wær ich den hêrre über den Grâl, der möhte mich ergetzen niht des mæres mir iuwer munt vergiht. bin ich iuwer swester kint, sô tuot, als die mit triuwen sint, und sagt mir sunder wankes vâr: sint disiu mære beidiu wâr?" dô sprach aber der guote man: "ich binz niht, der kriegen kan. dîner muoter daz ir triuwe warp: dô dû von ir schiede, zehant si starp. dû wær daz tier, daz si dâ souc, und der trach, der von ir vlouc. ez widervuor ir in slâfe gar, ê daz diu süeze dich gebar.

*G Missewende was sîn riuwe, er balsem ob der triuwe. al werltlîchiu schande in vlôch; werdecheit sich in sîn herze zôch. dich solden hazzen werdiu wîp durch sînen minneclîchen lîp. sîn dienst was gegen in sô ganz, ez machet wîbes ougen glanz, die in gesâhen, von sîner süeze. got daz erbarmen müeze, daz dû ie gevrumtest solhe nôt. mîn swester lac ouch nâch dir tôt, Herzeloide, dîn muoter." "neinâ, hêrre guoter! waz saget ir nû?", sprach Parzival. "wære ich danne hêrre über den Grâl, der möhte mich ergetzen niht des mæres, des iuwer munt vergiht. bin ich iuwer swester kint, sô tuot, als die mit triuwen sint, und saget mir sunder wankes vâr: sint disiu mære beidiu wâr?" dô sprach aber der guote man: "ich enbinz niht, der dâ triegen kan. dîner muoter daz ir triuwe warp: dô dû von ir schiet, zehant si starp. dû wær daz tier, daz si dâ souc, unt der trache, der von ir dâ vlouc. ez widervuor ir in ir slâfe gar, ê daz diu süeze dich gebar.

*T missewende was sîn riuwe, er balseme ob der triuwe. alliu werltlîche schande in vlôch; werdecheit sich in sîn herze zôch. dich solten hazzen werdiu wîp durch sînen minneclîchen lîp. sîn dienst was gegen im sô ganz, er machte wîbes ougen glanz, die in gesâhen, von sîner süeze. got daz erbarmen müeze, daz dû ie gevrumtest sölhe nôt. mîn swester lac ouch nâch dir tôt, Herzeloyde, dîn muoter." "Neinâ, hêrre guoter! waz saget ir nû?", sprach Parcifal. "wærich danne hêrre übern Grâl, der möhte mich ergetzen niht der mære, der mir iuwer munt vergiht. bin ich iuwerre swester kint, sô tuot, als die mit triuwen sint, unde saget mir sunder valschen vâr: sint disiu mære beidiu wâr?" Dô sprach aber der guote man: "ich bin niht, der triegen kan. dîner muoter daz ir triuwe warp: dô dû von ir schiede, zehant si starp. dû wære daz tier, daz si souc, unde der trache, der von ir vlouc. ez widervuor in slâfe ir gar, ê daz diu süeze dich gebar.