*D Dâ wont ein werlîchiu schar. ich wil iu künden umb ir nar: si lebent von einem steine, des geslähte ist vil reine. hât ir des niht erkennet, der wirt iu hie genennet: er heizet lapsit exillis. von des steines kraft vil gewis der fênix verbrinnet, daz er zaschen wirt. diu asche im aber leben birt. sus rêrt der fênix mûze sîn unt gît dar nâch vil liehten schîn, daz er schœne wirt als ê. ouch wart nie menschen sô wê, swelhes tages ez den stein gesiht, die wochen mac ez sterben niht, diu aller schierst dar nâch gestêt. sîn varwe im nimmer ouch zergêt. man muoz im sölher varwe jehen, dâ mit ez hât den stein gesehen, ez sî magt ode man, als dô sîn bestiu zît huop an. sæhez den stein zwei hundert jâr, im enwürde denne grâ sîn hâr. sölhe kraft dem menschen gît der stein, daz im vleisch und bein jugent enpfæhet al sunder twâl. der stein ist ouch genant der Grâl. dâr ûf kumt hiute ein botschaft, dâr an doch lît sîn hœhste kraft.

*m dâ wont ein werlîchiu schar. ich wil iu künden umb ir nar: si lebent von einem steine, des gesleht ist reine. hât ir des niht erkennet, er wirt iu hie genennet: er heizet lapis exilis. von des steines kraft der fênix verbrinnet, daz er ze eschen wirt. diu esche im aber leben birt. sus rêret fênix die mûze sîn und gît dar nâch vil liehten schîn, daz er schœne wirt als ê. ouch wart nie menschen sô wê, welches tages er den stein gesiht, die wochen mac er sterben niht, diu aller schierste dâ nâch gestêt. sîn varwe im nimmer ouch zergêt. man muoz im solher vröude jehen, dâ mit ez het den stein gesehen, ez sî maget oder man, alsô dô sîn bestiu zît huop an. sehe ez den stein zwei hundert jâr, im werde den grâ sîn hâr. solhe kraft dem menschen gît der stein, daz im vleisch †noch† bein jugent enpfâhent alsunder twâl. der stein ist ouch genant der Grâl. dâr ûf kumt hiute ein botschaft, dâr an doch lît sîn hœhstiu kraft.

*G Dâ wont ein werlîchiu schar. ich wil iu künden umb ir nar: si lebent von einem steine, des geslähte ist vil reine. habet ir des niht erkennet, der wirt iu hie genennet: er heizet lapsit exillis. von des steines kraft der fênix verbrinnet, daz er ze aschen wirt. diu asche im aber leben birt. sus rêrt der fênix mûze sîn unt gît dar nâch vil liehten schîn, daz er schœne wirt als ê. ouchne wart nie menschen sô wê, swelhes tages ez den stein siht, die wochen mag ez sterben niht, diu aller schierste dar nâch gestêt. sîn varwe im nimer ouch zergêt. man muoz im solher varwe jehen, dâ mit ez hât den stein gesehen, ez sî maget ode man, als dô sîn bestiu zît huop an. sæhe ez den stein zwei hundert jâr, im würde danne grâ sîn hâr. solhe kraft dem menschen gît der stein, daz im vleisch unde bein jugent enpfæhet al sunder twâl. der stein ist ouch genant der Grâl. dâr ûf kumet hiute ein botschaft, dâr an doch lît sîn hœhestiu kraft.

*T dâ wont ein werlîchiu schar. ich wil iu künden umbe ir nar: Si lebent von einem steine, des geslehte ist vil reine. habt ir des niht erkennet, der wirt iu alhie genennet: er heizet jaspis ex illix. von der kraft der fênix verbrinnet, daz er ze aschen wirt. diu asche im aber daz leben birt. sus rêrt der fênix die mûze sîn unde gît dar nâch vil liehten schîn, daz er schœne wirt als ê. ouch wart nie menschen sô wê, swelhes tages ez den stein siht, die wochen mag ez ersterben niht, diu aller schierst dâ nâch gestêt. sîn varwe im ouch niemer zergêt. man muoz im sölher varwe jehen, dâ mit ez hât den stein gesehen, ez sî maget oder man, alsô sîn beste zil huop an. sæh ez den stein zwei hundert jâr, im würde danne grâ sîn hâr. sölhe kraft dem gît der stein, daz im vleisch unde bein jugent enpfâhent sunder twâl. der stein, der ist genant der Grâl. dâr ûf kumt hiute ein botschaft, dâr an doch liget sîn hœhestiu kraft.