*D Swâ werc verwürkent sînen gruoz, daz gotheit sich schamen muoz, wem lât den menschlîchiu zuht? war hât diu arme sêle vluht? welt ir nû gote vüegen leit, der ze bêden sîten ist bereit, zer minne unt gein dem zorne, sô sît ir der verlorne. nû kêrt iwer gemüete, daz er iu danke güete." Parzival sprach zim dô: "hêrre, ich bin des immer vrô, daz ir mich von dem bescheiden hât, der nihtes ungelônt lât, der missewende noch der tugent. ich hân mit sorgen mîne jugent alsus brâht an disen tac, daz ich durch triwe kumbers pflac." der wirt sprach aber wider zim: "nimts iuch niht hæle, gern ich vernim, waz ir kumbers und sünden hât. ob ir mich diu prüeven lât, dar zuo gib ich iu lîhte rât, des ir selbe niht enhât." Dô sprach aber Parzival: "mîn hœhstiu nôt ist umben Grâl, dâ nâch umb mîn selbes wîp. ûf erde nie schœner lîp gesouc an deheiner muoter brust. nâch den beiden sent sich mîn gelust."

*m sîn werc verwürket sînen gruoz, daz gotheit sich schamen muoz. wem lât den menschlîch zuht? war het diu arme sêle vluht? wolt ir nû got vüegen leit, der zuo beiden sîten ist bereit, zuor minne und gegen dem zorne, sô sît ir der verlorne. nû kêret iuwer gemüete, daz er iu danke güete." Parcifal sprach zuo im dô: "hêrre, ich bin des iemer vrô, daz ir mich von †† bescheiden hât, der nihtes ungelônet lât, der missewende noch der tugent. ich hân mit sorgen mîne jugent alsus brâht an disen tac, daz ich durch triuwe kumbers pflac." der wirt sprach aber zuo im: "nemt es iuch niht hæle! gerne ich vernim, waz ir kumbers und sünde hât. ob ir mich diu wizzen lât, dar zuo gip ich iu vil liehten rât, des ir selbe niht enhât." dô sprach aber Parcifal: "mîn hœhstiu nôt ist umb den Grâl, dar nâch umb mîn selbes wîp. ûf erden nie sô schœner lîp gelac an enkeiner muoter brust. nâch den beiden sent sich mîn gelust."

*G Swâ werke verwürkent sînen gruoz, daz diu gotheit sich schamen muoz, wem lât den menschlîchiu zuht? war hât diu arme sêle vluht? welt ir nû gote vüegen leit, der ze bêden sîten ist bereit, ze der minne unde gein dem zorne, sô sît ir der verlorne. nû kêrt iuwer gemüete, daz er iu danke güete." Parzival sprach zim dô: "hêrre, ich bin des immer vrô, daz ir mich von dem bescheiden hât, der nihtes ungelônet lât, der missewende noch der tugent. ich hân mit sorgen mîne jugent alsus brâht an disen tac, daz ich durch triuwe jâmers pflac." der wirt sprach aber zim: "nemets iuch niht hæle! gerne ich vernim, waz ir kumbers unde sünden hât. ob ir mich die prüeven lât, dar zuo gib ich iu lîhte rât, des ir selbe niht enhât." dô sprach aber Parzival: "mîn hœhestiu nôt ist umb den Grâl, dar nâch umbe mîn selbes wîp. ûf erde nie schœner lîp gesouc an deheiner muoter brust. nâch den beiden senet sich mîn gelust."

*T swâ werc verwirkent sînen gruoz, daz diu goteheit sich schamen muoz, wan lât diu menschlîchiu zuht? war hât diu arme sêle vluht? welt ir gote vüegen leit, der ze beiden sîten ist bereit, zer minne unde zem zorne, sô sît ir der verlorne. nû kêret iuwer gemüete, daz er iu danne güete." Parcifal sprach zim dô: "hêrre, ich bin des iemer vrô, daz ir mich von dem bescheiden hât, der nihtes ungelônet lât, der missewende noch der tugent. Ich hân mit sorgen mîne jugent alsus brâht an disen tac, daz ich durch triuwe kumbers pflac." Der wirt sprach wider zim: "nimts iuch niht hæle, gerne ich vernim, waz ir kumbers unde sünden hât. ob ir mich die prüeven lât, dar zuo gibich iu lîhte rât, des ir selbe niht enhât." Dô sprach aber Parcifal: "mîn hœhestiu nôt ist umben Grâl, dar nâch umbe mîn selbes wîp. ûf erde nie schœner lîp gesouc nie muoter brust. nâch den beiden sent sich mîn gelust."