*D Parzival zem wirte sîn sprach: "hêrre, dirre kefsen schîn erkenne ich, wand ich drûffe swuor zeinen zîten, dô ich hie vür si vuor. ein gemâlt sper dâr bî ich vant. hêrre, daz nam al hie mîn hant. dâ mit ich prîs bejagte, als man mir sider sagte. ich verdâhte mich an mîn selbes wîp, sô daz von witzen kom mîn lîp. zwô rîche tjoste dâr mit ich reit. unwizzende ich die bêde streit. dannoch het ich êre. nû hân ich sorgen mêre, denne ir an manne ie wart gesehen. durch iwer zuht sult ir des jehen: wie lanc ist von der zîte her, hêrre, daz ich hie nam daz sper?" Dô sprach aber der guote man: "des vergaz mîn vriunt Taurian hie. er kom mirs sît in klage. Vünftehalp jâr unt drî tage ist, daz irz im nâmet hie. welt irz hœren, ich prüeve iu wie." ame salter las er im über al diu jâr und gar der wochen zal, die dâ zwischen wâren hin. "alrêrst ich innen worden bin, wie lange ich var wîslôs unt daz vreuden helfe mich verkôs",

*m Parcifal †† dem wirte sîn sprach: "hêrre, disen kafsen schîn erkenne ich, wen ich dar ûf swuor zuo einer zîte, dô ich hie vür vuor. ein gemâlet sper dâ bî ich vant. hêrre, daz nam ich an die hant. dâ mit ich prîs bejagete, als man mir sider sagete. ich verdâht mich an mîn selbes wîp, sô daz von witzen kam mîn lîp. zwô rîch juste dâ mit ich reit. unwizzende ich die beide streit. dannoch het ich êre. nû hân ich sorgen mêre, dan ir an mir ie wart ersehen. durch iuwer zuht sollet ir verjehen: wie lange ist von der zît her, daz ich hie nam daz selbe sper?" dô sprach aber der guote man: "des vergaz mîn vriunt Taurian. er kam mirs sît in klage. vünftehalp jâr und drî tage ist, daz irz im nâmet hie. wollet irz hœren, ich brüefez iu wie." an dem psalter las er im über al diu jâr und gar der wochen zal, die dâ zwischen wâren hin. "alrêrst ich innen worden bin, wie lange ich vuor wîselôs und daz vröuden mich helfe verkôs",

*G Parzival ze dem wirte sîn sprach: "hêrre, dirre kefsen schîn erkenne ich, wan ich drûffe swuor ze einen zîten, dâ ich hie †† vuor. ein gemâlt sper dâr bî ich vant. hêrre, daz nam al hie mîn hant. dâ mit ich brîs bejagete, als man mir sider sagete. ich verdâht mich an mîn selbes wîp, sô daz von witzen kom mîn lîp. zwô rîche tjoste dâr mit ich reit. unwizzende ich die bêde streit. dannoch het ich êre. nû hân ich sorgen mêre, danne ir an manne ie wart gesehen. durch iuwer zuht sult ir des jehen: wie lanc ist von der zîte her, daz ich hie nam daz sper?" dô sprach aber der guote man: "des vergaz mîn vriunt Thaurian hie. er kom mirs sît in klage. vünftehalp jâr unde drî tage ist, daz irz im nâmet hie. welt irz hœren, ich prüeve iu wie." an dem salter las er im gar diu jâr unde ouch der wochen zal, die dâ zwischen wâren hin. "alrêrste ich innen worden bin, wie lange ich var wîselôs unt daz vröuden helfe mich verkôs",

*T Parcifal zem wirte sîn sprach: "hêrre, dirre kafsen schîn erkennich, wandich drûffe swuor; zeinen zîten ich hie vür vuor. ein gemâlt sper ich bî ir vant. hêrre, daz nam alhie mîn hant. dâ mite ich prîs bejagete, als man mir sider sagete. ich verdâhte mich an mîn selbes wîp, sô daz von witzen schiet mîn lîp. zwô rîche tjost dâ mit ich reit. unwizzende ich die beide streit. dannoch hetich êre. nû hân ich sorgen mêre, dannir an manne ie wart gesehen. durch iuwer zuht sult ir des jehen: wie lange ist von der zîte her, hêrre, daz ich hie nam daz sper?" Dô sprach aber der guote man: "des vergaz mîn vriunt Taurian hie. er kom mirs sît in klage. welt irz hœren, ichz iu sage." an dem salter las er im über al diu jâr unde durch der wochen zal, die dâ zwischen wâren hin. "Alrêrst ich innen worden bin, wie lange ich var wîselôs unde daz vröuden helfe mich verkôs",