*D Dô disiu rede was getân, dô sprach aber der guote man: "ich bin râtes iwer wer. nû sagt mir, wer iuch wîste her." "hêrre, ûf dem walde mir widergienc ein grâ man, der mich wol enpfienc. als tet sîn massenîe. der selbe valsches vrîe hât mich zuo ziu her gesant. ich reit sîne slâ, unz ich iuch vant." der wirt sprach: "daz was Kahenis. der ist werdeclîcher vuore wîs. der vürste ist ein Punturteis. der rîche künec von Kareis sîne swester hât ze wîbe. nie kiuscher vruht von lîbe wart geboren denne sîn selbes kint, diu iu dâ widergangen sint. der vürste ist von küneges art. alliu jâr ist zuo mir her sîn vart." Parzival zem wirte sprach: "dô ich iuch vor mir stênde sach, vörht ir iu iht, dô ich zuo ziu reit? was iu mîn komen dô iht leit?" dô sprach er: "hêrre, geloubet mirz, mich hât der ber und ouch der hirz erschrecket dicker denne der man. eine wârheit ich iu sagen kan: ichn vürhte niht, swaz mensche ist. ich hân ouch menschlîchen list.

*m dô diu rede was getân, dô sprach aber der guote man: "ich bin râtes iuwer wer. nû saget mir: wer wîset iuch her?" "hêrre, ûf disem walde mir widergienc ein grâwer man, der mich wol enpfienc. alsô tet sîn massenîe. der selbe valsches vrîe het mich her zuo iu gesant. ich reit sîn slâ, unz ich iuch vant." der wirt sprach: "daz was Kehenis. der ist wirdeclîcher vuor als wîs. der vürste ist ein Ponturteise. der rîche künic von Clareise sîn swester het zuo wîbe. nie kiuscher vruht von lîbe wart geborn dan sîniu kint, diu iu dâ widergangen sint. der vürste ist des küniges art. alliu jâr ist her zuo sîn vart." Parcifal zem wirte sprach: "dô ich iuch vor mir stên sach, vörht ir iu iht, dô ich zuo iu reit? was iu mîn komen dô iht leit?" dô sprach er: "nû gloubet mirz, mich het der ber und ouch der hirz erschrecket dicker dan der man. ein wârheit ich iu sagen kan: ich vörhte niht, waz menschlîch ist. ich hab ouch menschlîchen list.

*G Dô diu rede was getân, dô sprach aber der guote man: "ich bin râtes iuwer wer. nû saget mir, wer iuch wîste her." "hêrre, ûf dem walde mir widergienc ein grâ man, der mich wol enpfienc. als tet sîn massenîe. der selbe valsches vrîe hât mich zuo ziu her gesant. ich reit sîn slâ, unze ich iuch vant." der wirt sprach: "daz was Kahnis. der ist werdeclîcher vuore alwîs. der vürste ist ein Punturteis. der rîche künic von Gareis sîne swester hât ze wîbe. nie kiuscher vruht von lîbe wart geborn danne sîn selbes kint, diu iu dâ widergangen sint. der vürste ist von küneges art. alliu jâr ist zuo mir her sîn vart." Parzival ze dem wirte sprach: "dô ich iuch vor mir stênde sach, vörht ir iu iht, dô ich zuo iu reit? was iu mîn komen dô iht leit?" dô sprach er: "hêrre, geloubet mirz, mich hât der bêr unde ouch der hirz erschrecket dicker danne der man. ein wârheit ich iu sagen kan: ichne vürhte niht, swaz mensch ist. ich hân ouch menschlîchen list.

*T dô diu rede was getân, dô sprach aber der guote man: "ich bin râtes iuwer wer. nû saget mir, wer iuch wîste her." "Hêrre, ûffem walde mir widergie ein grâwer man, der mich wol enpfie. als tet sîn massenîe. der selbe valsches vrîe hât mich her ziu gesant. ich reit sîne slâ, unzich iuch vant." Der wirt sprach: "daz ist Kahenis. der ist werdeclîcher vuore alwîs. der vürste ist ein Puntertoys. der rîche künec von Caroys sîne swester hât ze wîbe. nie kiuscher vruht von lîbe wart nie geborn danne sîn selbes kint, diu iu dâ widergangen sint. der vürste ist von küneges art. alliu jâr ist ze mir sîn vart." Parcifal zem wirte sprach: "dô ich iuch bî mir stânde sach, vörhtir iu iht, dô ich zuo iu reit? was iu mîn komen dô iht leit?" Dô sprach er: "nû gloubet mirz, mich hât der ber unde der hirz erschrecket ê danne der man. eine wârheit ich iu sagen kan: ine vörhte niht, waz mensche ist. ich hân ouch menschlîchen list.