*D Er was ein heiden vaterhalp, Flegetanis, der an ein kalp bette, als ob ez wære sîn got. wie mac der tievel sölhen spot gevüegen an sô wîser diet, daz si niht scheidet ode schiet dâ von, der treit die hœhsten hant unt dem elliu wunder sint bekant? Flegetanis der heiden kunde uns wol bescheiden ieslîches sternen hinganc unt sîner künfte widerwanc, wie lange ieslîcher umbe gêt, ê er wider an sîn zil gestêt. mit der sternen umbereise vart ist geprüefet aller menschlîcher art. Flegetanis der heiden sach, dâ von er blûweclîche sprach, inme gestirne mit sînen ougen verholnebæriu tougen. er jach, ez hiez ein dinc der Grâl. des namen las er sunder twâl inme gestirne, wie der hiez. "ein schar in ûf der erden liez, diu vuor ûf über die sterne hôch, ob die ir unschult wider zôch, sît muoz sîn pflegen getouftiu vruht mit alsô kiuschlîcher zuht. diu menscheit ist immer wert, der zuo dem Grâle wirt gegert."

*m er was ein heiden vaterhalp, Flegetanis, der an ein kalp bette, als ob ez wær ein got. wie mac der tiuvel solichen spot gevüegen an sô wîser diet, daz si niht scheidet oder schiet dâ von, der treit die hœhesten hant und dem alliu wunder sint bekant? Flegetanis der heiden kunde wol bescheiden ieglîches sternen hinganc und sîner künste widerwanc, wie lange ieglîcher umbe gât, ê er wider an sîn zil gestât. mit der sternen umbereise vart ist gebrüefet ieglîches menschen art. Flegetanis der heiden sach, dâ von er blœdeclîchen sprach, in dem gestirn mit sînen ougen verholnbæriu tougen. er jach, ez hiez ein dinc der Grâl. des namen las er sunder twâl in dem gestirn, wie er hiez. "ein schar in ûf der erden liez, diu vuor ûf über die sternen hôch, ob die ir unschuld wider zôch, sît muoz sîn pflegen getouftiu vruht mit alsô kiuschlîcher zuht, daz diu menscheit ist iemer wert, der zuo dem Grâl wirt begert."

*G Ez was ein heiden vaterhalp, Fleigetanis, der an ein kalp bette, als ez wære sîn got. wie mac der tievel sînen spot gevüegen an sô wîser diet, daz si niht scheidet oder schiet dâ von, der treit die hœhesten hant unt dem elliu wunder sint bekant? Fleigetanis der heiden kunde uns wol bescheiden iegelîches sternes hinganc unt sîner künste widerwanc, wie lange iegeslîcher umbe gêt, ê er wider an sîn zil gestêt. mit der sternen umbereise vart ist geprüevet aller menschen art. Fleigetanis der heiden sach, dâ von er blûclîchen sprach, in dem gestirne mit sînen ougen verholnbæriu tougen. er jach, ez wære ein dinc, der Grâl. des namen las er sunder twâl inme gestirne, wie der hiez. "ein schar in ûf der erden liez, diu vuor ûf über die sternen hôch, op die ir unschult wider zôch, sît muoz sîn pflegen getouftiu vruht mit alsô kiuschlîcher zuht. diu menscheit ist immer wert, der zuo dem Grâl wirt gegert."

*T er was ein heiden vaterhalp, Flegetanis, der an ein kalp bette, alse obz wære sîn got. wie mac der vâlant sînen spot gevüegen an sô wîser diet, daz si niht scheidet oder schiet dâ von, der treget die hœheste hant unde dem alliu wunder sint bekant? Flegetanis der heiden kunde uns wol bescheiden etslîches sternen hineganc unde sîner künfte widerwanc, wie lange etslîcher hine gêt, ê er wider an sîn zil gestêt. mit der sterne umbereise vart ist geprüevet aller menschlîch art. Flegetanis der heiden sach, dâ von er blûclîchen sprach, in dem gestirne mit sînen ougen verholnbæriu tougen. er jach, ez wære ein dinc, der Grâl. des namen las er sunder twâl in dem gestirne, wie der hiez. "ein schar in ûf der erden liez, diu vuor ûf über die sterren hôch, ob die ir unschult wider zôch, sît muoz sîn pflegen getouftiu vruht mit alsô kiuschlîcher zuht. diu menscheit ist iemer wert, diu zem Grâle wirt gewert."