*D Swer mich dar von ê vrâgte unt dâr umbe mit mir bâgte, ob ichs im niht sagte, unprîs der dran bejagte. mich batz heln Kyot, wand im diu âventiure gebôt, daz es immer man gedæhte, ê ez diu âventiure bræhte mit worten an der mære gruoz, daz man dar von doch sprechen muoz. Kyot, der meister wol bekant, ze Dolet verworfen ligen vant in heidenscher schrifte dirre âventiure gestifte. der karacter a b c muoser hân gelernet ê, âne den list von nigromanzî. ez half, daz im der touf was bî. anders wære diz mære noch unvernumen. dehein heidensch list moht gevrumen, ze künden umbes Grâles art, wie man sîner tougen innen wart. ein heiden Flegetanis bejagte an künste hôhen prîs. der selbe fisîôn was geborn von Salomon, ûz israhelischer sippe erzilt von alter her, unz unser schilt der touf wart vürz helle viur. der schreip vons Grâles âventiur.

*m wer mich dâ von vrâgete und dâr umb mit mir bâgete, ob ich es ime niht ensagete, unprîs er dâr an bejagete. mich bat ez heln Kiot, wan im diu âventiure gebôt, daz es iemer man gedæht, ê ez diu âventiure bræht mit worten an der mære gruoz, daz man dâ von doch sprechen muoz. Kiot, der meister wol bekant, zuo Dolet verworfen ligen vant in heidenischer schrift diser âventiure gestift. den karacter a b c muos er hân gelernet ê, âne den list von nigromanzî. ez half, daz im der touf was bî. anders diz mær wær unvernomen. kein heidensch list moht uns niht gevromen, zuo künden umb des Grâles art, wie man sîner tougen innen wart. ein heiden hiez Flegetanis, der bejagete an kunst hôhen prîs. der selbe wîse fisîôn was geborn von Salomon, ûz israhelischer sippe gezilt von alter her, unz unser schilt der touf †† vor dem helschen viur. der schreip von Grâles âventiur.

*G Swer mich drumbe vrâgete unt drumbe mit mir bâgete, ob ichs im niht sagete, unbrîs er dran bejagete. mich bat ez helen Kiot, wande im diu âventiure gebôt, daz es immer man gedæhte, ê ez diu âventiure bræhte mit worten an der mære gruoz, daz man dar von nû sprechen muoz. Kiot, der meister wol bekant, ze Dolet verworfen ligen vant in heidenischer schrifte dirre âventiure stifte. der karacter a b c muose er haben gelernet ê, âne den list von nigromanzî. ez half, daz im der touf was bî. anders wære ditze mære noch unvernomen. nehein heidenischer list moht uns gevromen ze künden umb des Grâles art, wie man sîner tougen innen wart. ein heiden Fleigetanis bejagete an künste hôhen brîs. der selbe fisîôn was geborn von Salmon, ûz israhelischer diet erzilt von alter her, unze unser schilt der touf was vür daz helle viur. der schreip vons Grâles âventiur.

*T Swer mich dar von ê vrâgete unde drumbe mit mir bâgete, ob ichs im niht ensagete, unprîs er dran bejagete. mich bat ez heln Kyot, wandin diu âventiure gebôt, daz ers iemer manne gedæhte, ê ez diu âventiure bræhte mit worten an der mære gruoz, daz manz dâ von doch sprechen muoz. Kyot, der meister wol bekant, ze Dolet verworfen ligen vant in heidenscher schrifte dirre âventiure gestifte. den karacter a b c muoser hân gelernet ê, âne den list von nigromanzî. ez half im, daz im der touf was bî. anders wære diz mære unvernomen. dehein heidensch list moht uns gevromen, wie man sîner tougen innen wart ze kündenne umbe des Grâles art. Ein heiden hiez Flegetanis, der bejagete an künsten hôhen prîs. der selbe fisîôn was geborn von Salomon, ûz israhelischer sippe gezilt von alter her, unz unser schilt der touf wart vür daz helle viur. der schreip von des Grâles âventiur.