*D Al sîner vröude er dô vergaz. ich wæne, er het gevrâget baz, wære er ze Munsalvæsche komen, denne als ir ê hât vernomen. Nû lât in rîten. war sol er? dort gein im kom geriten her ein man, dem was daz houbet blôz, sîn wâpenroc von koste grôz, dâr undenz harnasch blanc gevar. ân daz houbet was er gewâpent gar. gein Parzivale er vaste reit. dô sprach er: "hêrre, mir ist leit, daz ir mînes hêrren walt sus bant. ir wert schiere drumbe ermant, dâ von sich iwer gemüete sent. Munsalvæsche ist niht gewent, daz iemen ir sô nâhe rite, ez enwære, der angestlîche strite oder der alsolhen wandel bôt, als man vor dem walde heizet tôt." Einen helm er in der hende vuorte, des gebende wâren snüere sîdîn, unt eine scharpfe glevîn, dâr inne al niwe was der schaft. der helt bant mit zornes kraft den helm ûfez houbet ebene. ez enstuont in niht vergebene an den selben zîten sîn drôn unt ouch sîn strîten.

*m al sîner vröuden er dô vergaz. ich wæne, er hete gevrâget baz, wær er ze Muntsalvasche komen, danne als ir ê habet vernomen. Nû lât in rîten. war sol er? dar gegen ime kam geriten her ein man, dem was sîn houbet blôz, sîn wâpenroc von koste grôz, dâr under harnasch blanc gevar. âne daz houbet was er gewâpent gar. gegen Parcifale er vaste reit. er sprach: "hêrre, mir ist leit, daz ir mînes hêrren walt sus bant. ir werdet schiere von im ermant, dâ von sich iuwer gemüete sent. Muntsalvasche ist niht gewent, daz iemen ir sô nâhe rite, ez enwære, der angestlîchen strite oder der alsolhen wandel bôt, als man vor dem walde heizet tôt." einen helm er in der hende vuorte, des gebende wâren snüere sîdîn, und eine scharfe glevîn, dâr inne al niu was der schaft. der helt bant mit zornes kraft den helm ûfez houbet ebene. ez enstuont in niht vergebene an den selben zîten sîn drôn und ouch sîn strîten.

*G Al sîner vröude er dô vergaz. ich wæne, er hete gevrâget baz, wær er ze Muntsalvatsche komen, danne als ir ê habet vernomen. nû lât in rîten. war sol er? dort gein im kom geriten her ein man, dem was daz houbet blôz, sîn wâpenroc von koste grôz, dâr under daz harnasch blanc gevar. ân daz houbet was er gewâpent gar. gegen Parzival er vaste reit. dô sprach er: "hêrre, mir ist leit, daz ir mînes hêrren walt sus bant. ir werdet schier drumbe ermant, dâ von sich iuwer gemüete sent. Muntsalvatsche ist niht gewent, daz iemen ir sô nâhen rite, ez enwære, der angestlîchen strite ode der alsolhen wandel bôt, als man vor dem walde heizet tôt." einen helm er in der hende vuorte, des gebende wâren snüere sîdîn, unde scharfe glavîn, dâr inne al niuwe was der schaft. der helt bant mit zornes kraft den helm ûf daz houbet eben. ez enstuont in niht vergeben an den selben zîten sîn drôn unde sîn strîten.

*T Al sîner vröude er dô vergaz. Ich wæne, er hete gevrâget baz, wærer ze Munsalvasche komen, danne als ir ê habet vernomen. Nû lât in rîten. war sol er? dort gegen im kom geriten her ein man, dem was daz houbt blôz, ein wâpenroc von koste grôz, dâr under harnasch blanc gevar. âne daz houbet was er gewâpent gar. gegen Parcifal er vaste reit. dô sprach er: "hêrre, mir ist leit, daz ir mînes hêrren walt sus bant. ir werdet schiere drumbe ermant, dâ von sich iuwer gemüete sent. Munsalvasche ist niht gewent, daz ir ieman sô nâhe rite, ez enwære, der angestlîchen strite oder alsolhen wandel drumbe bôt, alse man vor dem walde heizet tôt." Einen helm er in der hende vuorte, des gebende wâren snüere sîdîn, unde eine scharpfe glevîn, dâr inne niuwe was der schaft. der helt bant mit zornes kraft den helm ûf daz houbet ebene. ez stuont in niht vergebene an den selben zîten sîn dröun unde ouch sîn strîten.