*D "Ich warp, als der den schaden hât", sprach er, "liebiu niftel, gip mir rât. gedenke rehter sippe an mir unt sage mir ouch: wie stêtz dir? ich solte trûren umbe dîne klage, wan daz ich hœhern kumber trage, den ieman getrüege. mîn nôt ist zungevüege." Si sprach: "nû helfe dir des hant, dem aller kumber ist bekant, ob dir sô wol gelinge, daz dich ein slâ dar bringe, al dâ dû Munsalvæsche sihst, dâ dû mir dîner vröuden gihst. Cundrie la surziere reit vil müelîch hinnen. mir ist leit, daz ich niht vrâgte, ob si dar wolte kêren oder anderswar. immer swenne si kumt, ir mûl dort stêt, dâ der brunne ûzem velse gêt. ich râte, daz dû ir rîtes nâch. ir ist lîhte vor dir niht sô gâch, dûne mügest si schiere hân erriten." dâne wart niht langer dô gebiten. urloup nam der helt al dâ. dô kêrt er ûf die niwen slâ. Cundrien mûl die reise gienc. daz ungeverte im undervienc eine slâ, die er het erkorn. sus wart aber der Grâl verlorn.

*m "Ich warp, als der den schaden hât", sprach er, "liebiu niftel, gip mir rât. gedenke rehter sippe an mir und sage mir ouch: wie stât ez dir? ich solte trûren umb dîne klage, wanne daz ich hœhern kumber trage, danne ieman getrüege. mîn nôt ist zuo ungevüege." si sprach: "nû helfe dir des hant, dem aller kumber ist bekant, ob dir sô wol gelinge, daz dich ein slâ dar bringe, aldâ dû Muntsalvasche sihest, dâ dû mir dîner vröuden gihest. Condrie lasurziere reit vil müelîche hinnen. mir ist leit, daz ich niht vrâgete, ob si dar wolte kêren oder anderswar. iemer sô si kumt, ir mûl dort stât, dâ der brunne ûz dem velse gât. ich râte, daz dû ir rîtest nâch. ir ist lîhte vor dir niht sô gâch, dû enmügest si schiere hân erriten." dô enwart niht langer dâ gebiten. urloup nam der helt aldâ. dô kêrte er ûf die niuwen slâ. Condrien mûl die reise gienc. daz ungeverte ime undervienc eine slâ, die er hete erkorn. sus wart aber der Grâl verlorn.

*G "Ich warp, als der den schaden hât", sprach er, "liebiu niftel, gib mir rât. gedenke rehter sippe an mir unde sage mir ouch: wie stêtz dir? ich solde trûren umbe dîne klage, wan daz ich hœhern kumber trage, danne ie man getrüege. mîn nôt ist ze ungevüege." si sprach: "nû helfe dir des hant, dem aller kumber ist bekant, obe dir sô wol gelinge, daz dich ein slâ dar bringe, al dâ dû Muntsalvatsche sihest, dâ dû mir dîner vröuden gihest. Gundrie lasurziere reit niulîche hinnen. mir ist leit, daz ich niht vrâgete, ob si dar wolde kêren oder anderswar. immer swenne si kumet, ir mûl dort stêt, dâ der brunne ûz dem velse gêt. ich râte, daz dû ir rîtes nâch. ir ist lîhte vor dir niht sô gâch, dûne mügest si schier hân erriten." dône wart niht lenger dâ gebiten. urloup nam der helt al dâ. dô kêrt er ûf die niuwen slâ. Gundrien mûl die reise gienc. daz ungeverte im undervienc ein slâ, die er hete erkorn. sus wart aber der Grâl verlorn.

*T "Ich warp, als der den schaden hât", sprach er, "liebiu niftele, nû gip mir rât. gedenke rehter sippe an mir unde sage mir ouch: wie stêt ez dir? ich solte trûren umbe dîne klage, wan daz ich hœhern kumber trage, danne ie man getrüege. mîn nôt ist ungevüege." Si sprach: "nû helfe dir des hant, dem aller kumber ist bekant, ob dir sô wol gelinge, daz dich ein slâ dar bringe, aldâ dû Munsalvasche sihst, daz dû mir dîner vröude gihst. Kundrie Lasurziere reit niuweclîchen hinnen. mir ist leit, daz ich si niht vrâgete, ob si dar wolte oder anderswar. iemer swenne si kumt, ir mûl dort stêt, dâ der brunne ûz einem velse gêt. ich râte dir, daz dû ir rîtest nâch. ir ist lîhte vor dir niht sô gâch, dûne mügest si schiere hân erriten." dâne wart niht langer dô gebiten. Urloup nam der helt aldâ unde kêrte ûf die niuwen slâ. Kundrien mûl die reise gienc. daz ungeverte im undervienc eine slâ, dier hete erkorn. sus wart aber der Grâl verlorn.