*D Mîner jæmerlîchen zîte jâr wil ich im minne geben vür wâr. der rehten minne ich bin sîn wer, wander mit schilde unt ouch mit sper dâ nâch mit ritters handen warp, unz er in mîme dienste erstarp. magetuom ich ledeclîche hân. er ist iedoch vor gote mîn man. ob gedanke würken sulen diu werc, sô trag ich niender den geberc, der underswinge mir mîn ê. mîme leben tet sîn sterben wê. der rehten ê diz vingerlîn vür got sol mîn geleite sîn. daz ist ob mîner triwe ein slôz, vonme herzen mîner ougen vlôz. ich bin hinne selbander: Schianatulander ist daz eine, daz ander ich." Parzival verstuont dô sich, daz ez Sigune wære. ir kumber was im swære. Den helt dô wênec des verdrôz. vonme hersniere daz houbet blôz er machete, ê daz er gein ir sprach. diu juncvrouwe an im ersach durch îsers râm vil liehtez vel. dô erkande si den degen snel. si sprach: "ir sîtz, hêr Parzival! sagt an, wie stêtz iu umben Grâl?

*m mîner jâmerzîte jâr wil ich im minne geben vür wâr. der rehten minne ich bin sîn wer, wand er mit schilte und ouch mit sper dâ nâch mit ritters handen warp, unz er in mînem dienste erstarp. magetuom ich ledeclîch hân. er ist vor gote iedoch mîn man. ob gedanke wirken sollen diu werc, sô trage ich niender den geberc, der underswinge mir mîn ê. mînem lebene tet sîn sterben wê. der rehten ê diz vingerlîn vür got sol mîn geleite sîn. daz ist ob mîner triuwe slôz, von dem herzen mîner ougen vlôz. ich bin hinne selber ander: Schianatulander ist daz eine, daz ander ich." Parcifal verstuont dô sich, daz ez Sigune wære. ir kumber was ime swære. den helt dô wênic des verdrôz. vonme hersnier daz houbet blôz er machte, ê daz er gegen ir sprach. diu juncvrouwe an ime ersach durch îsers râm vil liehtez vel. dô erkante si den degen snel. si sprach: "ir sît ez, hêr Parcifal! sagt an, wie stât ez umben Grâl?

*G Mîner jæmerlîchen zîte jâr wil ich im minne geben vür wâr. der rehten minne ich bin sîn wer, wan er mit schilte unde mit sper dâ nâch mit rîters hande warp, unze er in mînem dienste erstarp. magetuom ich lediclîchen hân. er ist iedoch vor got mîn man. obe gedanc würken suln diu werc, sône trag ich niemer den geberc, der underswinge mir mîn ê. mînem leben tet sîn sterben wê. der rehten ê ditze vingerlîn vor got sol mîn geleite sîn. daz ist ob mîner triuwe ein slôz, von dem herzen mîner ougen vlôz. ich bin hinne selbe ander: Shinadulander ist daz ein, daz ander ich." Parzival verstuont dô sich, daz ez Sigune wære. ir kumber was im swære. den helt dô wênic des verdrôz. vom dem härsenier daz houbet blôz er machet, ê daz er gein ir sprach. diu juncvrouwe an im ersach durch îsers râm vil liehtez vel. dô erkande si den degen snel. si sprach: "ir sît ez, hêr Parzival! saget an, wie stêt ez umb den Grâl?

*T mîner magetuomlîcher zîte jâr wil ich im minne geben vür wâr. der rehten minne ich bin sîn wer, wand er mit schilte unde mit sper dâr nâch mit rîters handen warp, unzer in mînem dienste erstarp. magetuom ich ledeclîche hân. er ist vor gote iedoch mîn man. ob gedenke suln wirken diu werc, sô entragich niender den geberc, der underswinge mir mîn ê. mînem lebenne tet ouch sîn sterben wê. der rehten ê diz vingerlîn vor gote sol mîn geleite sîn. daz ist ob mîner triuwe ein slôz, vonme herzen mîner ougen vlôz. ich bin hinne selbe ander: Schinohtudelander ist daz eine, daz ander ich." Parcifal verstuont dô sich, daz ez Sygune wære. ir kumber was im swære. den helt dô wênic des verdrôz. vonme hersenier daz houbet blôz er machte, ê daz er gegen ir sprach. Diu juncvrouwe an im ersach durch îsers râm vil liehtez vel. dô erkande si den degen snel. si sprach: "ir sîtz, hêr Parcifal! saget mir, wie stêt ez umbe den Grâl?