*D Dâ ir swert wâren gehangen, diu wâren in undergangen, Gawans knappen, an des strîtes stunt, daz ir decheiner was worden wunt. ein gewaltec man von der stat in vrides vor den andern bat. der vienc si unt leite si in prîsûn. ez wære Franzeys oder Bertun, starke knappen unt kleiniu kint, von swelhen landen si komen sint, die brâht man dô ledeclîchen Gawane, dem ellens rîchen. Dô in diu kint ersâhen, dâ wart grôz umbevâhen. ieslîchez sich weinende an in hienc. daz weinen iedoch von liebe ergienc. von Curnewals mit im dâ was cons Layz fiz Tynas. ein edel kint wont im ouch bî: duc Gandiluz fiz Gurzgri, der durch Schoydelakurt den lîp verlôs, dâ manec vrouwe ir jâmer kôs. Liaze was des kindes base. sîn munt, sîn ougen unt sîn nase was reht der minne kern. al diu werlt sach in gern, dar zuo sehs ander kindelîn. dise aht junchêrren sîn wâren gebürte des bewart, elliu von edeler, hôhen art.

*m Dâ ir swert wâren gehangen, diu wâren undergangen Gawanes knappen an der selben stunt, daz ir dekeiner was worden wunt. ein gewaltec man von der stat, der in vrides vor den andern bat, der vienc si und leit si in prîsûn. ez wære Franzois oder Britun, starke knappen oder kleiniu kint, von welhem lande si komen sint, die brâhte man dô lediclîchen Gawane, dem ellens rîchen. dô in diu kint ersâhen, dô wart grôz umbevâhen. ieglîchez weinende an †in† hienc. daz weinen doch von liebe gienc. von Kurnewal mit ime dâ was cons Lan fiz Tinas. ein edelkint wont ime bî: duc Gandilirz fiz Gurzgri, der durch Schoidelacurt den lîp verlôs, dâ manic vrouwe ir jâmer kôs. Liaze was des kindes base. sîn munt, sîn ougen und sîn nase was rehte der minnen kerne. aldiu werlt sach in gerne, dar zuo sehs ander kindelîn. dise ahte junchêrren sîn wâren gebürte des bewart, elliu von edeler, hôhen art.

*G dâ ir swert wâren gehangen, diu wâren in undergangen, Gawanes knappen, an der strîtes stunt, daz ir deheiner was worden wunt. ein gewaltic man von der stat, der in vrides vor den anderen bat, der vie si unde leit si in prîsûn. ez wære Franzoys ode Britun, starke knappen unde kleiniu kint, von swelhem lande si komen sint, die brâhte man lediclîchen Gawane, dem ellens rîchen. dô in diu kint ersâhen, dô wart grôz umbevâhen. etslîchez sich weinende an in hienc. daz weinen doch von liebe ergienc. von Kurnewals mit im dâ was cons Liaz fiz Tinas. ein edel kint wont im ouch bî: duc Gandiluz fiz Gurzgri, der durch Tschoidelakurt den lîp verlôs, dâ manic vrouwe ir jâmer kôs. Liaze was des kindes base. sîn munt, sîn ougen unde sîn nase was reht der minne kern. aldiu werlt sach in gern, dar zuo sehs anderiu kindelîn. die ahte junchêrren sîn wâren gebürte des bewart, elliu von edel hôher art.

*T Dâ ir swert wâren gehangen, diu wâren in undergangen, Gawans knappen, an der stunt, daz ir deheiner was worden wunt. Ein gewaltic man von der stat, der in vrides vor den anderen bat, der vienc si unde legete si in prîsûn. ez wære Franzoys oder Britun, starke knappen unde kleiniu kint, von swelhen landen si komen sint, die brâhte dô ledeclîche Gawan, der ellens rîche. dô in diu kint ersâhen, dâ wart grôz umbevâhen. iegeslîchez weinde an im hienc. daz weinen iedoch vor liebe ergienc. von Curnewale mit im dâ was cons Larz fiz Tynas. ein edel kint wont im ouch bî: duc Gandlus fiz Kurungri, der durch Schoydelakurt den lîp verlôs, dâ manec vrouwe ir leit erkôs. Lyaze was des kindes base. sîn munt, sîn ougen unde sîn nase was rehte der minnen kerne. aldiu werlt sach in gerne, dar zuo sehs ander kindelîn. dise ahte junchêrren sîn wâren von geburt des bewart, alle von hôher art.