*D ez wâren meide als von der zît, den man diu besten jâr noch gît. ich bin des unerværet, heten si geschæret als ein valke sîn gevider. dâ rede ich niht wider. Nû hœret, wie sich der rât geschiet, waz man des landes künege riet. die wîsen het er zim genomen. an sînen rât die wâren komen. etslîcher sînen willen sprach, als im sîn bester sin verjach. Dô mâzen siz an manege stat. der künec sîne rede ouch hœren bat. er sprach: "ez wart mit mir gestriten. ich kom durch âventiwer geriten inz fôrest Læhtamris. ein ritter al ze hôhen prîs in dirre wochen an mir sach, wander mich vlügelingen stach hinderz ors al sunder twâl. er twanc mich des, daz ich den Grâl gelobte im zerwerben. solde ich nû drumbe ersterben, sô muoz ich leisten sicherheit, die sîn hant an mir erstreit. dâ râtet umbe, des ist nôt. mîn bester schilt was vür den tôt, daz ich dâr umbe bôt mîne hant, als iu mit rede ist hie bekant.

*m ez wâren megde als von der zît, den man diu besten jâr noch gît. ich bin des unverværet, heten si geschæret als ein valke sîn gevidere. dâ rede ich niht widere. Nû hœret, ê sich der rât geschiet, waz man des landes künige riet. die wîsen hete er zuo im genomen. an sînen rât die wâren komen. etslîcher sînen willen sprach, als ime sîn bester sin verjach. dô mâzen †sich† an manige stat. der künic sîne rede hœren bat. er sprach: "ez wart mit mir gestriten. ich kam durch âventiure geriten †mi† fôrest Lethamris. ein ritter alze hôhen prîs in dirre wochen an mir sach, wand er mich vlügelingen stach hinder daz ros al sunder twâl. er twanc mich des, daz ich den Grâl gelobete ime ze erwerben. solt ich nû dâr umbe sterben, sô muoz ich leisten sicherheit, die sîn hant an mir erstreit. dâ râtet umbe, des ist nôt. mîn bester schilt was vür den tôt, daz ich dâr umbe bôt mîne hant, als iu mit rede ist hie bekant.

*G ez wâren meide als von der zît, den man diu besten jâr dâ gît. ich bin des unerværet, heten si geschæret als ein valke sîn gevidere. dâ rede ich niht widere. nû hœrt, ê sich der rât geschiet, waz man des landes künige riet. die wîsen heter zim genomen. an sînen rât die wâren komen. ieslîcher sînen willen sprach, als im sîn bester sin verjach. dô mâzen siz an manige stat. der künic sîne rede ouch hœren bat. er sprach: "ez wart mit mir gestriten. ich kom durch âventiure geriten inz fôreis Læhtamris. einem rîter alze hôher brîs in dirre wochen an mir geschach, wan er mich vlügelingen stach hinderz ors al sunder twâl. er twanc mich des, daz ich den Grâl gelobte im zerwerben. solt ich nû drumbe sterben, sô muose ich leisten sicherheit, die sîn hant an mir erstreit. dâ râtet umbe, des ist nôt. mîn bester schilt was vür den tôt, daz ich dâr umbe bôt mîne hant, als iu mit rede ist hie bekant.

*T ez wâren megede als von der zît, den man diu besten jâr dâ gît. ich bin des unerværet, heten si geschæret als ein valke sîn gevidere. dâ redich niht widere. Nû hœret, ê sich der rât geschiet, waz man des landes künege riet. die wîsen heter zim genomen. an sînen rât die wâren komen. etslîcher sînen willen sprach, alsim sîn bester sin verjach. dô mâzen siz an manege stat. Der künec sîn rede ouch hœren bat. er sprach: "ez wart mit mir gestriten. ich kom durch âventiure geriten in daz vôreht Lehtambris. ein rîter alze hôhen prîs in dirre wochen an mir sach, wander mich vlügelingen stach hinderz ors sunder twâl. er twanc mich des, daz ich den Grâl gelobete im zerwerben. soltich nû drumbe ersterben, sô muoz ich leisten sicherheit, die sîn hant an mir erstreit. dâ râtet umbe, des ist nôt. mîn bester schilt was vür den tôt, daz ich drumbe bôt mîne hant, als iu mit rede ist bekant.