*D Von minnen noch zornes vil geschiht, nûne wîzet ez Obien niht. nû hœret, wie ir vater sprach, dô er den werden Gawan sach unt ern in daz lant enpfienc, wie erz mit rede dô ane vienc. Dô sprach er: "hêrre, iwer kumen, daz mac mit sælden uns gevrumen. ich hân gevaren manege vart, sô süeze in mînen ougen wart nie von angesihte. zuo dirre ungeschihte sol iwer künfteclîcher tac uns trœsten, wander trœsten mac." Er bat in tuon dâ ritters tât. "ob ir harnasches mangel hât, des lât iuch wol bereiten gar. welt ir, sît, hêrre, in mîner schar." Dô sprach der werde Gawan: "ich wære des ein bereiter man. ich hân harnasch unt starke lide, wan daz mîn strîten stêt mit vride unz an eine benante stunde. ir læget ob oder unde, daz wolt ich durch iuch lîden. nû muoz ichz durch daz mîden, hêrre, unz ein mîn kampf ergêt, dâ mîn triwe sô hôhe pfandes stêt. durch aller werden liute gruoz ich si mit kampfe lœsen muoz.

*m von minnen noch zornes vil geschiht, nû enwîzet ez Obien niht. nû hœret, wie ir vater sprach, dô er den werden Gawanen sach und er in in daz lant enpfienc, wie erz mit rede dô an vienc. er sprach: "hêrre, iuwer komen, daz mac an sælden uns gevromen. ich hân gevarn manige vart, sô süeze in mînen ougen wart nie man von angesihte. ze dirre ungeschihte sol iuwer künfticlîcher tac uns trœsten, wander trœsten mac, daz ir hie üebet ritters tât. ob ir harnasch mangel hât, des lât iuch wol bereiten gar. welt ir, sît, hêrre, in mîner schar." dô sprach der werde Gawan: "Ich wære des ein bereiter man. ich hân harnasch und starke lide, want daz mîn strît stât mit vride unz an eine benanten stunden. ir læget obenân oder unden, daz wolt ich durch iuch lîden. nû muoz ichz durch daz mîden, hêrre, unz ein mîn kampf ergât, dâ mîn triuwe sô hôhes pfandes stât. durch aller werden liute gruoz ich si mit kampfe lœsen muoz.

*G von minne noch zornes vil geschiht, nûne wîzet ez Obien niht. nû hœrt ouch, wie ir vater sprach, dô er Gawanen sach under in in daz lant enpfienc, wie erz mit rede dô ane vienc. dô sprach er: "hêrre, iwer kumen, daz mag an sælden uns gevrumen. ich hân gevaren manige vart, sô süeze in mînen ougen wart nie von angesihte. gein dirre ungeschihte sol iwer künfticlîcher tac uns trœsten, wan er trœsten mac." er bat in tuon dâ rîters tât. "obe ir harnasches mangel hât, des heize ich iuch bereiten gar. welt ir, sît, hêrre, in mîner schar." dô sprach der werde Gawan: "ich wære des ein bereit man. ich hân harnasch unde starke lide, wan daz mîn strîten stêt mit vride unze an eine benant stunde. ir læget obe oder unde, daz wolt ich mit iu lîden. nû muoz ich ez durch daz mîden, hêrre, unze ein mîn kampf ergêt, dâ mîn triwe sô hôhe pfandes stêt. durch aller werden liute gruoz ich die mit kampfe lœsen muoz

*T von minnen noch zornes vil geschiht, nûne wîzet ez Obyen niht unde hœret ouch, wie ir vater sprach, dô er den werden Gawan sach unde ern in daz lant enpfienc, wierz mit rede dô ane vienc. Dô sprach er: "hêrre, iuwer komen, daz mac an sælden uns gevromen. ich hân gevarn manege vart, sô süeze mînen ougen wart nie von angesihte. gegen dirre ungeschihte sol iuwer künfteclîcher tac trœsten, wander trœsten mac." er bat in tuon dâ rîters tât. "ob ir harnasches mangel hât, daz lât iuch uns bereiten gar. welt ir, sît, hêrre, in mîner schar." Dô sprach der werde Gawan, er wære des ein bereit man. "ich hân harnasch unde starkiu lide, wan daz mîn strît stât mit vride unz an eine benante stunde. ich læge ob oder unde, daz wolt ich mit iu lîden. nû muoz ichz durch daz mîden, hêrre, unz an daz ein mîn kampf ergêt, dâ mîn triuwe sô hôhe pfandes stêt durch aller werder liute gruoz, daz ich die mit kampfe lœsen muoz