*D "Nû sich", sprach si, "swester mîn, deiswâr, mîn ritter unt der dîn begênt hie ungelîchiu werc. der dîne wænet, daz wir den berc unt die burc sulen verliesen. ander wer wir muozen kiesen." Diu junge muose ir spotten doln. diu sprach: "er mac sichs wol erholn. ich gib im noch gegen ellen trôst, daz er dînes spottes wirt erlôst. er sol dienst gein mir kêren unt ich wil im vreude mêren. sît dû gihst, er sî ein koufman, er sol mînes lônes market hân." Ir bêder strît der worte Gawan ze merke hôrte. als ez im dô getohte, übersaz erz, swie er mohte. sol lûter herze sich niht schemen, daz müeze der tôt dâr von ê nemen. Daz grôze her al stille lac, des Poydiconjunz dort pflac, wan ein werder jungelinc was ime strîte unt alsîn rinc, der herzoge von Lanverunz. dô kom Poydiconjunz. ouch nam der altwîse man die eine unt die andern dan. diu vesperîe was erliten unt wol durch werdiu wîp gestriten.

*m "nû sich", sprach si, "swester mîn, deiswâr, mîn ritter und der dîn, und begânt hie ungelîchiu werc. der dîne wænet, daz wir den berc und die burc sullen verliesen. ander wer wir muozen kiesen." diu junge muose ir spotten doln. diu sprach: "er mac sichs wol erholn. ich gib ime noch gegen ellen trôst, daz er dînes spottes wirt erlôst. er sol dienest gegen mir kêren, ich wil ime vröude mêren. sît dû gihst, er sî ein koufman, er sol mînes lônes market hân." ir beider strît der worte Gawan zuo merke hôrte und übersaz ez, wie er mohte, als ez ime dô getohte, wand er was schamlîch und doch wîs. daz vuogete ime dicke hôhen prîs. Daz grôze her al stille lac, des Poidiconiunz dort pflac, wanne ein werder jungelinc was in dem strîte und als sîn rinc, der herzoge von Laverunz. dô kam Poidiconiunz, der werde, alte, wîse man, und nam eine und die anderen dan. doch was diu vesperîe vermiten und wol durch werdiu wîp gestriten.

*G dô sprach si: "sihestû, swester mîn, dêswâr, mîn rîter unde der dîn begênt hie ungelîchiu werc. der dîne wænet, daz wir den berc unt die burc sulen verliesen. ander wer wir müezen kiesen." diu junge muose ir spoten dolen. si sprach: "er mac sich es wol erholen. ich gibe im doch gein ellen trôst, daz er dînes spotes wirt erlôst. er sol dienst gein mir kêren unde ich sol im vröide mêren. sît dû gihest, er sî ein koufman, er sol mînes lônes market hân." ir beider strît der worte Gawan ze merke hôrte. als ez im dô getohte, versaz erz, swie er mohte. sol lûter herze sich niht schemen, daz muoz der tôt dar von ê nemen. daz grôze her al stille lac, des Poydeconiunz dâ pflac, wan ein werder jungelinc was ime strîte unde al sîn rinc, der herzoge von Lanvarunz. dô kom Poydeconiunz. ouch nam der altwîse man die einen unde die anderen dan. diu vesperîe was erliten unde wol durch werdiu wîp gestriten.

*T Dô sprach si: "sihestû, swester mîn, deiswâr, mîn rîter unde der dîn begânt hie ungelîchiu werc. der dîne wænet, daz wir den berc unde die burc suln verliesen. ander wer wir müezen kiesen." Diu junge muose ir spotten doln. si sprach: "er mac sichs wol erholn. ich gib im noch gegen ellen trôst, daz er dînes spottes wirt erlôst. er sol dienst gegen mir kêren unde ich im vröude mêren. sît dû gihst, er sî ein koufman, er sol mînes lônes market hân." ir beider strît der worte Gawan ze merke hôrte, als ez im dô getohte, unde übersaz ez, swie er mohte. sol lûter herze sich niht schemen, daz muoz der tôt dar von ê nemen. Daz grôze her alstille lac, des Poydekuniunz dâ pflac, wan er ein werder jungelinc was ime strîte unde alsîn rinc, Der herzoge Lunveruns. Dô kom Poydekuniuns. ouch nam der alte, wîse man die einen unde die andern dan. diu vesperîe was erliten unde wol durch werde wîp gestriten.