*D Hie ein tjost, diu ander dort. daz her begunde ouch trecken vort her gein der stat durch hôhen muot. ir vesperîe wart vil guot. ze bêder sîte rotte ungezalt, garzûne, krîe manecvalt, bêde Schottesch unt Walsch wart dâ gerüefet sunder valsch. der ritter tât was âne vride, die helde erswungen dâ die lide. ez wâren doch allez meistec kint, die ûzem her dar komen sint. die begunden dâ vil werde tât, die burgære pfanten si ûf der sât. der nie gediende an wîbe kleinôt, der möhte an sîme lîbe niemer bezzer wât getragen. von Melyanze hôrt ich sagen, sîn zimierde wære guot. er hete ouch selbe hôhen muot unt reit ein schœne kastelân, daz Meljacanz dort gewan, dô er Keien sô hôhe dar hinder stach, daz mann am aste hangen sach. dô ez Melyacanz dort erstreit, Melyanz von Liz ez hie wol reit. sîn tât was vor ûz sô bekant, alle sîne tjoste in ir ougen vant Obie dort ûf dem palas, dar si durch warten komen was.

*m hie wart ein just, diu ander dort. daz her begunde ouch †strecken† vort her gegen der stat durch hôhen muot. ir vesperîe wart vil guot. ze beider sîte rot ungezalt, garzûne, krîe manicvalt, beidiu Schottesch und Welsch wart dâ gerüefet sunder velsch. der ritter tât was âne vride, die helde erswungen dâ die lide. ez wâren doch allez daz mêrteil kint, die ûzem her dar komen sint. die begiengen dâ vil werde tât, die burgære pfantens ûf der stat. der nie gediende an wîbe kleinôt, der enmöhte an lîbe niemer bezzer wât getragen. von Melianze hôrt ich sagen, sîn zimierde wære guot. er hete ouch selbe hôhen muot und reit ein schœn kastelân, daz †Melianz† dort gewan, dô er †küene† sô hôhe dar nider stach, daz man in am ast hangen sach. dô ez Meliaganz dort erstreit, Melianz von Liz ez wol reit. sîn tât was vor ûz sô bekant, daz alle sîne juste in ir ougen vant Obie dort ûf dem palas, dar si durch warten komen was.

*G hie ein tjost, diu andere dort. daz her begunde trecken vort her gein der stat durch hôhen muot. ir vesperîe wart vil guot. ze beider sîte roten ungezalt, garzûne, krîe manicvalt, beidiu Schotsch unde Walsch wart dâ geruofen sunder valsch. die helde erswungen dâ die lide, der rîter tât was âne vride. wol tâtenz ouch diu selben kint, diu ûz dem her dâ komen sint. die begiengen werdiclîche tât, die burgær pfanten si ûf der sât. Der nie gediente an wîbe kleinœde, der endorfte an lîbe nimer bezzer wât getragen. von Melianze hœre ich sagen, sîn zimiere wær guot. er het ouch selbe hôhen muot. er reit ein schœne kastelân, daz Meliahganz dort gewan, dôr Kayn sô verre dar hinder stach, daz man in ame aste hangen sach. dâz Meliahganz dort erstreit, Melianz von Liz ez hie wol reit. sîn tât was vor ûz sô bekant, alle sîne tjost in ir ougen vant Obie dort ûf dem palas, dar si durch warten komen was.

*T Hie ist ein tjost, ein anderiu dort. daz her begunde ouch trecken vort her gegen der stat durch hôhen muot. ir vesperîe wart vil guot. ze beider sît rotten ungezalt, garzûne, krîe manecvalt, beidiu Schotesch unde Walsch wart dâ gerüefet sunder valsch. die helde erswungen dâ die lide, der rîter tât was âne vride. wol tâtenz dâ diu selben kint, die ûz dem her dar komen sint. die begiengen werdeclîche tât, die burgære pfantens ûf der stat. Der ie gediende wîbe kleinôt, der endorft an lîbe niemer bezzer wât getragen danne Melyanz, hœre ich sagen. er reit ein schœne kastelân, daz Melyahganz dort gewan, dô er Key sô hôhe dar hinder stach, daz man in an einem aste hangen sach. dô ez Melyahganz dort erstreit, Melyanz von Lyz ez hie wol reit. sîn tât was vor ûz erkant. alle sîne tjost in ir ougen vant Obye dort ûf dem palas, dar si durch warten komen was.