*D Ê daz wir uns von zinnen wern Meljanzes bêden hern. ez sint doch allez meistec kint, die mit dem künege dâ komen sint. dâ erwerbe wir vil lîhte ein pfant, dâ von ie grôzer zorn verswant. der künec ist lîhte alsô gemuot, swenner hie ritterschaft getuot, er sol uns nôt erlâzen unt al sîn zürnen mâzen. veltstrîtes sol uns doch baz gezemen, den daz si uns ûz der mûre nemen. wir solten wol gedingen, dort in ir snüeren ringen, wan Poydiconjunzes kraft, der vüert die herten ritterschaft. dâ ist unser grœster vreise, die gevangen Berteneise. der pfligt der herzoge Astor. den siht man hie gegen strîte vor. dâ ist ouch sîn sun Melyacanz. het den erzogen Gurnamanz, sô wære sîn prîs gehœhet gar, doch siht man in in strîtes schar. Dâ engegen ist uns grôz helfe komen." ir habt ir râten wol vernomen. der vürste tet, als man im riet: die mûre er ûzen porten schiet. die burgære ellens unbetrogen begunden ûz ze velde zogen:

*m ê daz wir uns von zinnen wern Melianzes beiden hern, wand ez sint daz mêrteil alliu kint, die mit dem künige komen sint, daz wir erwerben lîhte ein pfant, dâ von ie grôzer zorn verswant. der künic ist lîhte sô gemuot, wenne er hie ritterschaft getuot, er sol uns nôt erlâzen und allez sîn zürnen mâzen. veltstrîtes sol uns doch baz gezemen, danne daz si uns ûz der mûren nemen. wir solten wol gedingen, dort in ir snüeren ringen, wanne Poidiconiunzes kraft, der vüert die herten ritterschaft. dâ ist unser grôziu vreise, die gevangenen Brituneise. der pfligt der herzoge Astor. den siht man hie gegen strîte vor. dâ ist ouch sîn sun Meliaganz. hete den erzogen Gurnemanz, sô wære sîn prîs gehœhet gar, doch siht man in in strîtes schar. dâ gegen ist uns doch grôziu helfe komen." ir habt ir râten wol vernomen. Der vürste tet, als man im riet: die mûre er ûzen porten schiet. die burgære ellens unbetrogen begunden ûz ze velde zogen.

*G daz wir uns von zinnen weren Melianzes beiden heren. ez sint doch allez meiste kint, die mit dem künige dâ komen sint. dâ erwerben wir vil lîhte ein pfant, dâ von ie grôzer zorn verswant. der künic ist lîhte sô gemuot, sô er hie rîterschaft getuot, er sol uns nôt erlâzen unde al sîn zürnen mâzen. veltstrîtes sol uns baz gezemen, dane si uns ûz der mûre nemen. wir solten wol gedingen, dort in ir snüeren ringen, wan Poydeconiunzes kraft, der vüert die herten rîterschaft. deist unser grœzestiu vreise: die gevangen Britaneise. der pfliget der herzoge Astor. den siht man dâ in strîte vor. dâ ist ouch sîn sun Meliahganz. hete den erzogen Gurnomanz, sô wære sîn prîs gehœhet gar, doch siht man in in strîtes schar. dâ engegene ist uns grôz helfe komen." ir habet ir râten wol vernomen. der vürste tet, als man im riet: die mûre er ûz den borten schriet. die burgære ellens unbetrogen begunden ûz ze velde zogen:

*T baz, ê daz wir uns von zinnen wern Melyanzes beiden hern. der künec ist lîhte sô gemuot, swenner die rîterschaft getuot, er solte uns nœte erlâzen unde alsîn zürnen mâzen. ez sint ouch almeistic kint, die mit dem künege komen sint. dâ erwerbe wir vil lîhte ein pfant, dâ von ie grôzer zorn verswant. veltstrîtes mac uns doch baz gezemen, ê daz si uns ûz der mûre nemen. wir solten wol gedingen, dort in ir snüer ringen, wan Poydekuniunzes kraft, der vüeret die herten rîterschaft. daz ist unser grœstiu vreise: die gevangen Brituneise. der pfliget der herzoge Astor. den siht man in strîte vor. dâ ist ouch sîn sun Melyahganz. het er den herzogen Gurnemanz, sô wære sîn prîs gehœhet gar. er ist ouch dâ in strîtes schar. dâ engegene ist uns grôziu helfe komen." ir habt ir râten wol vernomen. Der vürste tet, alse man im riet: die mûren man ûz den porten schiet. die burgære ellens unbetrogen begunden ûz ze velde zogen.