*D Man kunde dâ niht gâhen, sô daz Lyppaut wolde vâhen sînen hêrren, wander was sîn wirt, als noch getriwer man verbirt. der künec ân urloup dâ dannen schiet, als im sîn kranker sin geriet. Sîne knappen, vürsten kindelîn, al weinende tâten klagen schîn, die mit dem künege dâ wâren gewesen. vor den mac Lyppaut wol genesen, wander si mit triwe hât erzogen, gein werder vuore niht betrogen, ez ensî denne mîn hêrre al ein, an dem doch des vürsten triwe erschein. mîn hêrre ist ein Franzeys, der burcgrâve von Beaveys. er heizet Lisavander. die eine unt die ander muosen dem vürsten widersagen, dô si schildes ambet muosen tragen. Bîme künege ritter worden sint vil vürsten hiute unt ander kint. des vorderen hers pfligt ein man, der wol mit scharpfen strîten kan: der künec Poydiconjunz von Gors, der vüeret manec wol gewâpent ors. Meljanz ist sînes bruoder sun. si kunnen bêde hôchvart tuon, der junge unt ouch der alde, daz es unvuoge walde.

*m Lippout wolte niht gâhen, sô daz er sînen hêrren vâhen wolt, wand er was sîn wirt, daz noch getriuwer man verbirt. der künic âne urloup dannen schiet, als ime sîn kranker sin geriet. sîne knappen, vürsten kindelîn, alweinende tâten klagen schîn, die mit dem künige dâ wâren gewesen. vor den mac Lippout wol genesen, wand er si mit triuwen hât erzogen, gegen werder vuore niht betrogen, ez ensî denne mîn hêrre alein, an dem doch des vürsten triuwe schein. mîn hêrre, der ist ein Franzois, der burcgrâve de Beavois. er heizet Lisavander. die eine und die ander muosen dem vürsten widersagen, dô si schiltes ambet muosen tragen. bî dem künige ritter worden sint vil vürsten hiute und ander kint. des vorderen hers pfliget ein man, der wol mit scharpfen strîten kan: der künic Poidiconiunz von Gros, der vüeret manic wol gewâpent ros. Melianz ist sînes bruoder sun. si künnen beide hôchvart tuon, der junge und ouch der alte, daz es unvuoge walte.

*G man kunde dâ niht gâhen, sô daz Libaut wolte vâhen Sînen hêrren, wan er was sîn wirt, als noch getriwer man verbirt. der künic âne urloup dannen schiet, als im sîn kranker sin geriet. knappen, vürsten, sîniu kindelîn al weinende tæten klagens schîn, die mit dem künige dâ wâren gewesen. vor den mac Libaut wol genesen, wan er si hât mit triwe erzogen, an werder vuore niht betrogen, ez ensî dane mîn hêrre al ein, an dem doch des vürsten triwe schein. mîn hêrre ist ein Franzoys, li tschatelurre de Beavoys. der heizet Lisavander. die eine unde ouch die ander muosen dem vürsten widersagen, dô si schiltes ambet solten tragen. mit dem künige rîter worden sint manic vürste hiute unde anderiu kint. des vorderen hers pfliget ein man, der wol mit scharfen strîten kan: der künic Poydeconiunz von Gors vüeret manic wol gewâpent ors. Melianz ist sînes bruoder sun. die kunnen bêde hôchvart tuon, der junge unde der alde, daz es ungevüege walde.

*T Sine kunden dâ niht gâhen, sô daz Lybaut wolte vâhen sînen hêrren, wander was sîn wirt, alse noch untriuwen man verbirt. der künec âne urloup dannen schiet, als im sîn kranker sin geriet. knappen, vürsten, sîniu kindelîn alweinde tâten klage schîn, die mit dem künege dâ wâren gewesen. vor den mac Lybaut wol genesen, wander hât si mit triuwen erzogen unde an werder vuore niht betrogen, ez ensî danne mîn hêrre al ein, an dem ouch des vürsten triuwe schein. mîn hêrre ist ein Franzoys, Lethschach de lurre de Beavoys. der heizet Lysavander. der eine unde ouch der ander muosen dem vürsten widersagen, dâ si schiltes ambet suln tragen. mit dem künege rîter worden sint manec vürste hiute unde anderiu kint. Des vorderen hers pfliget ein man, der wol mit scharpfen strîten kan: Poydekuniunz von Gors, der vüeret manec wol gewâpent ors. Melyanz ist sînes bruoder suon. Si künnen beide hôchvart tuon, der junge unde ouch der alte, daz es unvuoge walte.