*D Dô bereite ouch sich hêr Gawan als ein kampfbære man hin vür den künec von Ascalun. des trûrte manec Bertun unt manec wîb und magt. herzenlîche wart geklagt von in sîn strîtes reise. der werdecheit ein weise wart nû diu tavelrunder. Gawan maz besunder, wâ mit er möhte wol gesigen. alt, herte schilde wol gedigen - ern ruochte, wie si wâren gevar -, die brâhten koufliute dar ûf ir soumen, doch niht veile. der wurden im drî ze teile. Dô erwarp der mære strîtes helt siben ors ze kampfe erwelt. ze sînen vriwenden er dô nam zwelf schärpfiu sper von Angram, starke rœrîne schefte drîn von Orastegentesin ûz einem heidenischem muor. Gawan nam urloub und vuor mit unverzagter manheit. Artus was im vil bereit, er gab im rîcher koste solt: lieht gesteine unt rôtez golt unt silbers manegen sterlinc. gein sorgen wielzen sîniu dinc.

*m dô bereit sich hêr Gawan als ein kampfbære man hin vür den künic von Ascalun. des trûrete manic Britun und manic wîp und maget. herzenlîch wart geklaget von in sîn strîtes reise. der werdecheit ein weise wart nû diu tavelrunder. Gawan maz besunder, wâ mite er möht gesigen. alte, herte schilte wol gedigen - er enruochte, wie si wâren gevar -, die brâhten koufliute dar in ir schiffe, doch niht veile. der wurden ime drîe ze teile. dô erwarp der wâre strîtes helt siben ros ze kampf erwelt. ze sînen vriunden er dô nam zwelf scharfiu sper von Agram, starke rœrîne schefte drîn von Arastegentesin ûz einem heidenischen muor. Gawan nam urloup und vuor mit unverzageter manheit. Artus was im vil bereit, er gap im rîcher koste solt: lieht gesteine und rôtez golt und silbers manigen sterlinc. gegen sorgen wielzen sîniu dinc.

*G nû bereite ouch sich hêr Gawan als ein kampfbære man hin vür den künic von Aschalun. des trûrte manic Britun, manic wîp unde maget. herzenlîchen wart geklaget von in sînes strîtes reise. der werdicheit ein weise wart nû diu tavelrunder. Gawan maz besunder, wâ mit er möhte wol gesigen. alte, herte schilte wol gedigen - er enruohte, wie si wâren gevar -, si brâhten koufliute dar ûf ir soumen, doch niht veile. der wurden im drî ze teile. ouch erwarp der wâre strîtes helt siben ors gein strîte wol erwelt. ze sînen vriunden er dô nam zwelf scharpfiu sper von Angram, starc rœrîne schefte drîn von Orastegentesin ûz einem heidenschen muor. Gawan nam urloup unde vuor mit unverzagter manheit. Artus was im vil bereit, er gap im rîcher koste solt: lieht gesteine, rôtez golt unde silbers manigen sterlinc. gein sorgen wielzen sîniu dinc.

*T Nû bereit ouch sich hêr Gawan als ein kampfbære man hin vür den künec von Ascalun. des trûrete manec Britun unde manec wîp unde maget. herzeclîche ez wart geklaget von in sîn strîtes reise. der werdecheite ein weise wart nû diu tavelrunder. Gawan maz besunder, wâ mit er möhte wol gesigen. alte schilte wol gedigen - ern ruohte, wie si wâren gevar -, die brâhten koufliute dar ûf ir soumen, doch niht veile. der wurden im drîe ze teile. ouch erwarp der strîtes helt siben ors gegen kampfe ûz erwelt. von sînen vriunden er dô gewan Zwelf starkiu sper von Angran, starke rœrîne schefte drîn von Orestegentesin ûz einem heidenschem muor. Gawan nam urloup unde vuor mit unverzageter manheit. Artus was im vil bereit, er gab im rîcher gabe solt: lieht gesteine, rôtez golt unde silber, manegen sterlinc. gegen sorgen wielzen sîniu dinc.