*D Nû was sîn ors verdecket, sîn selbes nôt erwecket. ouch het der degen wolgetân lieht wîz, îsern harnasch an, tiwer, ân aller slaht getroc. sîn kursît, sîn wâpenroc was gehêrt mit gesteine. sînen helm al eine het er niht ûf gebunden. dô kuster an den stunden Cunnewaren, die clâren magt. alsus wart mir von ir gesagt. Dâ ergie ein trûrec scheiden von den gelieben beiden. hin reit Gahmuretes kint. swaz âventiure gesprochen sint, diene darf hie niemen mezzen zuo, ir enhœret alrêst, waz er nû tuo, war er kêre unt war er var. swer den lîp gein rîterschefte spar, der endenke die wîle niht an in, ob ez im râtet stolzer sin. Condwiramurs, dîn minneclîcher bêâcurs, an den wirt dicke nû gedâht, waz dir wirt âventiure brâht. schildes ambet umben Grâl wirt nû vil geüebet sunder twâl von im, den Herzeloyde bar. er was ouch ganerbe dar.

*m nû was sîn ros verdecket, sîn selbes nôt erwecket. ouch hete der degen wol getân lieht wîz, îser harnasch an, tiure, âne aller slahte troc. sîn kursît, sîn wâpenroc was gehêret mit gesteine. sînen helm aleine hatte er niht ûffe gebunden. dô kust er an den stunden vrouwen Cunnewaren, die süezen maget. alsus wart mir von in gesaget. dâ ergienc ein trûric scheiden under den gelieben beiden. Hin reit Gahmuretes kint. waz âventiure gesprochen sint, die endarf hie niemen sinnen zuo, irn hœret aller êrst, waz er nû tuo, war er kêre oder war er var. wer den lîp an ritterschaft spar, der denke die wîle niht an in, ob ez ime râte stolzer sin. Condwieramurs, dîn minneclîcher bêâcurs, an den wirt nû dicke gedâht, waz dirre wirt âventiure brâht. schiltes ambet umb den Grâl wirt nû vil geüebet sunder twâl von ime, den Herczeloide bar. er was ouch †geverwet† dar.

*G nû was sîn ors verdecket, sîn selbes nôt erwecket. ouch het der degen wolgetân lieht wîz, îserîn harnasch an, tiure, ân aller slaht getroc. sîn kursît, sîn wâpenroc was gehêrt mit gesteine. sînen helm al eine het er niht ûf gebunden. dô kuster an den stunden Kunewaren, die clâren maget. sus wart mir von ir gesaget. dâ ergie ein trûrec scheiden von den gelieben beiden. hin reit Gahmuretes kint. swaz âventiure gesprochen sint, diene darf hie niemen mezzen zuo, irne hœrt alrêrst, waz er nû tuo, war er kêre unde war er var. swer den lîp gein rîterschefte spar, der denke niht die wîle an in, obe ez im râte stolzer sin. Condwiramurs, dîn minniclîcher bêâcurs, an den wirt dicke nû gedâht, daz im wirt âventiure brâht. des schiltes ambet umbe den Grâl wirt nû wol geüebet sunder twâl von im, den Herzeloide bar. er was ganerbe dar.

*T Nû was sîn ors verdecket, sîn selbes nôt erwecket. ouch hete der helt wol getân liehten wîzen harnasch an, tiure, âne aller slahte getroc. sîn kursît, sîn wâpenroc was gehêret mit gesteine. sînen helm aleine het er niht ûf gebunden. dô kust er an den stunden Cunnewarn, die clâre maget. sus wart mir von in gesaget. dâ ergienge ein trûric scheiden von den gelieben beiden. hin reit Gahmuretes kint. swaz âventiure gesprochen sint, die endarf in nieman mezzen zuo, irn hœret aller êrst, waz er getuo, war er kêre unde war er var. swer den lîp gegen rîterschefte spar, der denke niht die wîle an in, ob ez im râte stolzer sin. Cundewiramurs, dîn minneclîcher bêâcurs, an den wirt nû dicke gedâht, biz daz im wirt âventiure brâht. des schiltes ambet umben Grâl wirt vil geüebet sunder twâl von im, den Herzeloyde bar. er was ganerbet dar.