*D Der Waleis sprach: "wê, waz ist got? wære der gewaldec, sölhen spot het er uns bêden niht gegeben, kunde got mit kreften leben. ich was im dienstes undertân, sît ich genâden mich versan. nû wil ich im dienst widersagen; hât er haz, den wil ich tragen. Vriwent, an dînes kampfes zît dâ nem ein wîp vür dich den strît. diu müeze ziehen dîne hant, an der dû kiusche hâst bekant unt wîplîche güete. ir minne dich dâ behüete. ine weiz, wenne ich dich mêr gesehe. mîn wünschen sus an dir geschehe." Ir scheiden gab in trûren ze strengen nâchgebûren. Vrou Cunneware de Lalant in vuorte, dâ si ir poulûn vant. sîn harnasch hiez si bringen dar. ir linden hande wol gevar wâpenden Gahmuretes sun. si sprach: "ich solz von rehte tuon, sît der künec von Brandigan von iwern schulden mich wil hân. grôz kumber iwer werdecheit gît mir siufzebærez leit. swenne ir sît trûrens niht erwert, iwer sorge mîne vreude zert."

*m Der Waleis sprach: "owê, waz ist got? wær der gewaltic, solhen spot hete er uns beiden niht geben, kunde got mit krefte leben. ich was im dienstes undertân, sît ich genâden mich versan. nû wil ich dienst widersagen; hât er haz, den wil ich tragen. vriunt, an dînes kampfes zît dâ nem ein wîp vür dich den strît. diu müeze leiten dîne hant, an der dû kiusche hâst erkant und wîplîche güete. ir minne dich dâ behüete. ich enweiz, wenne ich dich mê gesehe. mîn wünschen sus an dir geschehe." ir scheiden gap in trûren ze strengen nâchgebûren. vrouwe Cunneware de Lalant in vuorte, dâ si die pavelûne vant. sîn harnasch hiez si im bringen dar. ir linden hende wol gevar, die wâpenden Gahmuretes sun. si sprach: "ich solz von rehte tuon, sît der künic von Brandigan von †mir† schulden mich wil hân. grôz kumber iuwerre werdecheit gît mir siufzebærez leit. iuwer sorge mîne vröude zert, wenne ir niht trûrens sît erwert."

*G der Waleis sprach: "wê, waz ist got? wære er gewaltic, solhen spot het er uns beiden niht gegeben, unde kunde got mit kreften leben. ich was im dienstes undertân, die wîle ich genâden mich versan. nû wil ich im dienst widersagen; hât er haz, den wil ich tragen. vriunt, an dînes kampfes zît dâ neme ein wîp vür dich den strît. diu müeze ziehen dîne hant, an der dû kiusche habest erkant unde wîplîche güete. ir minne dich dâ behüete. ichne weiz, wenne ich dich mê gesehe. mîn wunsch sus an dir geschehe." Ir scheiden gap in trûren ze strengen nâchgebûren. vrou Kuneware de Lalant in vuorte, dâ si ir pavelûn vant. sîn harnasch hiez si bringen dar. ir blanken hende wolgevar wâpenten Gahmuretes sun. si jach: "ich solz von rehte tuon, sît der künic von Brandigan von iuweren schulden mich wil hân. grôz kumber iuwer werdicheit ist mir ein siuftebærez leit. swenne ir niht sît trûrens erweret, iuwer sorge mîne vröude zeret."

*T Der Waleis sprach: "waz ist got? wære der gewaltic, solhen spot het er uns beiden niht gegeben, kunde got mit kreften leben. ich was im dienstes undertân, die wîle ich gnâden mich versan. nû wil ich im dienst wider sagen; hât er haz, den wil ich tragen. Vriunt, an dînes kampfes zît dâ nem ein wîp vür dich den strît. diu müeze ziehen dîne hant, an der dû kiusche hâst bekant unde wîplîche güete. ir minne dich dâ behüete. mîn wünschen sus an dir geschehe. ine weiz, wennich dich mê gesehe." ir scheiden, daz gap trûren zuo strengen nâchgebûren. Vrou Cunnewar de Lalant in vuorte, dâ sir pavelûn vant. sînen harnasch hiez si bringen dar. mit blanken handen wol gevar wâpente si Gahmuretes sun. si jach: "ich solz von rehte tuon, sît der künec von Brandigan mich wil von iuwern schulden hân. grôz kumber iuwer werdecheit gît mir siufzebærez leit. swenne ir sît trûrens niht erwert, iuwer sorge mîne vröude zert."