*D Swie vremdez mir hie wære, ich kom ouch her durch mære unt zerkennen âventiure. nû lît diu hœhste stiure an iu, des al getouftiu diet mit prîse sich von laster schiet. Sol guot gebærde iuch helfen iht unt daz man iu mit wârheit giht liehter varwe unt manlîcher site? kraft mit jugende vert dâ mite." Diu rîche, wîse heidenîn het an künste den gewin, daz si wol reite franzeis. dô antwurte ir der Waleis, solch was sîn rede wider sie: "got lône iu, vrouwe, daz ir hie mir gebt sô güetlîchen trôst. ine bin doch trûrens niht erlôst unt wil iuch des bescheiden. ine mag es sô niht geleiden, als ez mir leide kündet, daz sich nû maneger sündet an mir, der niht weiz mîner klage, unt ich dâ bî sîn spotten trage. Ine wil deheiner vreude jehen, ine müeze alrêst den Grâl gesehen, diu wîle sî kurz oder lanc. mich jaget des endes mîn gedanc; dâ von gescheide ich nimmer mînes lebens immer.

*m wie vrömede ez mir wære, ich kam ouch her durch mære und ze erkennen âventiure. nû lît diu hœheste stiure an iu, des alliu getouftiu diet mit prîse sich von laster schiet. sol guot gebærde iuch helfen iht und daz man iu mit wârheit giht liehter varwe und manlîcher site? kraft mit jugende vert dâ mite." diu rîche, wîse heidenîn hete an künste den gewin, daz si wol rette franzeis. dô antwurte ir der Waleis, solich was sîn rede wider sie: "got lône iu, vrouwe, daz ir hie mir gebt sô güetlîchen trôst. ich bin doch trûrens niht erlôst, ich wil iuch des bescheiden. ich mac es sô niht geleiden, als ez mir leide kündet, daz sich nû maniger sündet an mir, der niht weiz mîner klage, und ich dâ bî sîn spotten trage. ich wil dekeiner vröude jehen, ine müeze aller êrst den Grâl gesehen, diu wîle, wart si kurz oder lanc. mich jaget des endes mîn gedanc; dâ von gescheide ich niemer mînes lebenes iemer.

*G swie vrömdez mir hie wære, ich kom ouch her durch mære unt zerkennene âventiure. nû lît diu hœheste stiure an iu, der getouften diet: mit prîse ich von laster schiet. sol guot gebærde iuch helfen niht unt daz man iu mit wârheit giht liehter varwe unde manlîcher site? kraft mit jugende vert dâ mite." diu rîche, wîse heidenîn het an kunst den gewin, daz si wol redete franzeis. dô antwurte ir der Waleis, solch was sîn rede wider sie: "got lône iu, vrouwe, daz ir hie mir gebet sô güetlîchen trôst. ich bin doch trûrenes unerlôst unde wil iuch des bescheiden. ichne mag ez sô niht geleiden, als ez mir leide kündet, daz sich nû maniger sündet an mir, der niht weiz mîner klage, unde ich dâ bî sîn spoten trage. ich wil neheiner vröuden pflegen, ich muoz alrêrst den Grâl gesehen, diu wîle sî kurz oder lanc. mich jaget des endes mîn gedanc; dâ von gescheide ich nimmer mînes lebens immer.

*T Swie vremdez mir wære, ich kom ouch her durch mære unde zerkennen âventiure. nû lît diu hœheste stiure an iu, deist gar getouftiu diet. mit prîse ich iuch von laster schiet. sol guot gebærde helfen iht unde daz man iu mit wârheit giht liehter varwe unde manlîcher site? kraft bî jugent vert dâ mite." Diu rîche, wîse heidenîn het an kunst den gewin, daz si wol redete franzeis. Sus antwürt ir der Waleis, sölh was sîn rede wider sie: "got lône iu, vrouwe, daz ir mir hie gebt sô güetlîchen trôst. ich bin doch trûrens unerlôst unde wil iuch des bescheiden. ine mag ez sô niht geleiden, als ez mir leide kündet, daz sich nû maneger sündet, der niht weiz mîne klage unde dâ bî sîn spoten trage. ine wil deheiner vröude jehen, ine müeze den Grâl ê gesehen, diu wîle sî kurz oder lanc. mich jaget des endes mîn gedanc; dâ von gescheid ich niemer mînes lebens iemer.