*D sich vröun, daz uns der helt ist komen, dâ prîs mit wârheit ist vernomen an im unt ouch an Gahmurete. reht werdecheit was sîn gewete." Artuses her was an dem tage komen vreude unt klage. ein solch geparriertez leben was den helden dâ gegeben. Si stuonden ûf über al. dâ was trûren âne zal. ouch giengen die werden sân, dâ Parzival unt Gawan bî ein ander stuonden. si trôsten si, als si kunden. Clamiden, den wol geborn, dûhte, er hete mêr verlorn dan iemen, der dâ möhte sîn, unt daz ze scharpf wære sîn pîn. Er sprach ze Parzivale: "wæret ir bî dem Grâle, sô muoz ich sprechen âne spot: in heidenschaft Tribalibot, dar zuo daz gebirge in Koukesas, swaz munt von rîcheit ie gelas unt des Grâles werdecheit, diene vergülten niht mîn herzeleit, daz ich vor Pelrapeire gewan. ach, ich arm, unsælic man! mich schiet von vreuden iwer hant. hie ist vrou Cunneware de Lalant.

*m hie vröun, daz uns der helt ist komen, dâ prîs mit wârheit ist vernomen an ime und an Gahmurete. reht werdicheit was sîn gewete." Artuses her was an dem tage komen vröude und klage. ein solich geparrieretez leben was den helden dâ gegeben. si stuonden ûf über al. dâ was trûren âne zal. ouch giengen die werden sân, dâ der Waleis und Gawan bî ein ander stuonden. si trôsten si, als si kunden. Clamiden, den wol geborn, dûhte, er hete mêr verlorn danne ieman, der dâ möhte gesîn, und daz ze scharpf wære sîn pîn. er sprach ze Parcifale: "wâret ir bî dem Grâle, sô muoz ich sprechen âne spot: in heidenschaft Tribalibot, dar zuo daz gebirge in Kaukasas, waz munt von rîcheit ie gelas und des Grâles wirdecheit, die vergülten niht mîn herzeleit, daz ich vor Pelraperie gewan. ach, ich armer, unsæliger man! mich schiet von vröuden iuwer hant. nû ist hie vrouwe Cunneware de Lalant.

*G hie vröun, daz uns der helt ist komen, dâ brîs mit wârheit ist vernomen an im unde ouch an Gahmurete. rehtiu werdicheit was sîn gewete." Artuses her bî dem tage was komen vröude unde klage. ein solch geparriert leben was den helden dâ gegeben. si stuonden ûf über al. dâ was trûren âne zal. si giengen mit ein ander sân, dâ der Waleis unde Gawan bî ein ander stuonden; die trôsten si, als si kunden. Clamide, den wol geboren, dûht, er het mê verloren danne iemen, der dâ möhte sîn, unt daz ze scharf wære sîn pîn. er sprach ze Parzivale: "wârt ir bî dem Grâle, sô wil ich sprechen âne spot: in heidenschaft Tribalibot, dar zuo gebirge in Kausakas, swaz munt von rîcheit ie gelas, dar zuo des Grâles werdicheit vergülten niht mîn herzeleit, daz ich vor Pelrapeire gewan. owê, ich arm, unsælic man! mich schiet von vröuden iuwer hant. hie ist vrou Kuneware de Lalant.

*T Vröun, daz uns der helt dâ her ist komen, dâ prîs mit wârheit ist vernomen an im unde ouch an Gahmurete. reht werdecheit was sîn gewete." Artuses her bî dem tage was komen vröude unde klage. ein sölch geparriert leben was den helden dâ gegeben. Si stuonden ûf über al. dâ was trûren âne zal. si giengen mit ein ander dan, dâ der Waleis unde Gawan bî ein ander stuonden. si trôstens, als si kunden. Clamide, den wol geborn, dûhte, er hete mêr verlorn danne ieman, der dâ möhte sîn, unde daz scherpfer wære sîn pîn. er sprach ze Parcifale: "wârt ir bî dem Grâle, sô wil ich sprechen âne spot: in heidenschaft ze Tribalibot, dar zuo daz gebirge in Caucosas, swaz munt von rîcheit ie gelas, dar zuo des Grâls werdecheit vergülte niht mîn herzeleit, daz ich vor Peilrapere gewan. ach, ich arm, unsælic man! mich schiet von vröuden iuwer hant. Hie ist vrou Cunnewar de Lalant.