*D Cundrie la surziere, diu unsüeze unt doch diu fiere, den Waleis si beswæret hât. waz half in küenes herzen rât unt wâriu zuht bî manheit? unt dennoch mêr im was bereit: scham ob allen sînen siten. den rehten valsch het er vermiten, wan scham gît prîs ze lône unt ist doch der sêle krône. scham ist ob siten ein geüebet uop. Cunneware daz êrste weinen huop, daz Parzival, den degen balt, Cundrie surziere sus beschalt, ein alsô wunderlîch geschaf. herzen jâmer ougen saf gap maneger werden vrouwen, die man weinende muose schouwen. Cundrie was ir trûrens wer. diu reit enwec. nû reit dort her ein rîter, der truoc hôhen muot. al sîn harnasch was sô guot von den vüezen unz an des houptes dach, daz mans vür grôze koste jach. Sîn zimierde was rîche. gewâpent rîterlîche was daz ors unt sîn selbes lîp. nû vander magt, man unt wîp trûrec ame ringe hie. dâ reit er zuo, nû hœret wie:

*m Condrie lasurziere, diu unsüeze und doch diu fiere, den Waleis si beswæret hât. waz half in küenes herzen rât und wârheit, zuht bî manheit? und dannoch mêre im was gereit: schame ob allen sînen siten. den rehten valsch het er vermiten, wanne schame gît prîs ze lône und ist doch der sêle krône. scham ist ob siten ein geüebet †vluot†. Cunneware †daz es si† weinen huop, daz Parcifaln, den degen balt, Condrie surziere sus beschalt, ein alsô wunderlîch geschaf. herzen jâmer ougen saf gap maniger werden vrouwen, die man weinende muose schouwen. Condrie was dô trûrens wer. diu reit enwec. nû reit dort her ein ritter, der truoc hôhen muot. allez sîn harnasch was sô guot von dem vuoze unz an daz houbetdach, daz mans vür grôze koste jach. sîn zimierde was rîche. gewâpent ritterlîche was daz ros und sîn selbes lîp. nû vant er magt, man und wîp trûric ame ringe hie. dâ reit er zuo, nû hœret wie:

*G Gundrie lasurziere, diu unsüeze unde doch diu fiere, den Waleis si beswært hât. waz half in küenes herzen rât unt wâriu zuht bî manheit? und dannoch mêr im was bereit: scham obe allen sînen siten. den rehten valsch het er vermiten, wan schame gît prîs ze lône unde ist doch der sêle krône. schame ist ob siten rehter uop. Kuneware daz êrste weinen huop, daz Parzivalen, den degen balt, Gundrie alsus beschalt umbe alsus wunderlîch geschaf. herzen jâmer ougen saf gap maniger werden vrouwen. man muose hie weinen schouwen. Gundrie was ir trûrens wer. si reit den wec. nû reit dort her ein rîter, der truoc hôhen muot. al sîn harnasch was guot von vuoze unze an des houbtes dach, daz mans vür grôze koste jach. sîn zimier, daz was rîche. gewâpent rîterlîche was sîn ors unde ouch sîn selbes lîp. manic maget unde wîp was trûric an dem ringe hie. dâ reit er zuo, nû hœret wie:

*T Kundrie Lasurziere, diu unsüeze unde doch diu fiere, den Waleis sus beswæret hât. waz half in küenes herzen rât unde wâriu zuht bî manheit? dannoch mêr im was bereit: schame ob allen sînen siten. den rehten valsch heter vermiten, wan schame gît prîs ze lône unde ist doch der sêle krône. scham ist ob siten ein geüebet uop. Cunnewar daz êrste weinen huop, daz Parcifaln, den degen balt, Kundrie alsus beschalt umb alsô wunderlîch geschaf. herzen jâmer ougen saf gab maneger werden vrouwen. man muose hie weinen schouwen. Kundrie was ir trûrens wer. diu reit enwec. nû reit dort her ein rîter, der truoc hôhen muot. al sîn harnasch was sô guot vonme vuoze unz ûf des houbetes dach, daz mans vür rîche koste jach. sîn zimierde, daz was rîche. gewâpent rîterlîche was sîn ors unde sîn lîp. dô vander maget unde wîp trûric an dem ringe hie. dâ reit er zuo, nû hœret wie: