*D Rûch was ir antlütze erkant. einen geisel si vuorte in der hant. dem wâren die swenkel sîdîn unt der stil ein rubîn. gevar als eines affen hût truoc hende diz gæbe trût. die nagele wâren niht ze lieht, wan mir diu âventiure giht, si stüenden als eines lewen klân. nâch ir minne was selten tjost getân. Sus kom geriten in den rinc trûrens urhap, vreuden twinc. si kêrte, al dâ si den wirt vant. vrou Cunneware de Lalant az mit Artuse, diu küneginne von Janfuse mit vroun Ginoveren az. Artus, der künec, schône saz. Cundrie hielt vür den Bertenoys. si sprach hin zim en franzoys - ob ichz iu tiuschen sagen sol, mir tuont ir mære niht ze wol -: "Fillu roy Utepandragun, dich selben unt manegen Bertun hât dîn gewerp al hie geschant. die besten über elliu lant sæzen hie mit werdecheit, wan daz ein galle ir prîs versneit. Tavelrunde ist entnihtet, der valsch hât dran gepflihtet.

*m rûch was ir antlitze erkant. einen geisel vuorte si in der hant. dem wâren die swenkel sîdîn und der stil ein rubîn. gevar als ein affen hût truoc hende diz gæbe trût. die nagele wâren niht ze lieht, wand mir diu âventiure giht, si stüenden als ein lewen klân. nâch ir minne was selten just getân. sus kam geriten in den rinc trûrens urhap, vröuden twinc. si kêrte, aldâ si den wirt vant. vrouwe Cunneware de Lalant az mit Artuse, diu künigîn von Janfuse mit vrouwen Ginoveren az. Artus, der künic, schône saz. Condrie hielt vür den Britunois. si sprach hin zuo im in franzois - ob ichz iu tiuschen sagen sol, sô tuont ir mære niht ze wol -: "fili rois Utrapandragun, dich selben und manigen Britun hât dîn gewerp alhie geschant. die besten über alliu lant, die sæzen hie mit werdicheit, wan daz ein galle den prîs versneit. tavelrunde ist entnihtet, der valsch hât dâr an gepflihtet.

*G rûch was ir antlütze erkant. eine geiselen vuorte si in der hant. der was der swenkel sîdîn unt der stil ein rubîn. Gevar als ein affen hût truoc hende diz gæbe trût. ir nagele wâren niht ze lieht; als mir diu âventiure giht, si stüenden als eines lewen klân. nâch ir minne was selten tjost getân. sus kom geriten in den rinc trûren urhap, vröuden twinc. si kêrte, dâ si den wirt vant. vrou Kuneware de Lalant az mit Artuse, diu künigîn von Lanfuse mit vroun Schinoveren az. der künic Artus schône saz. Gundrie hielt vür den Britaneis. si sprach hin ze im en franzeis - obe ich ez iu tiutschen sagen sol, mir tuot ir mære niht ze wol -: "filiroys Utpandragun, dich unde manigen Britun hât ein gewerp gar geschant. die besten über elliu lant sæzen hie mit werdicheit, wan daz ein galle ir brîs versneit. tavelrunder ist entnihtet, der valsch hât dranne gepflihtet.

*T rûch was ir antlitze erkant. ein geisel vuorte sin der hant. der wâren die swenkel sîdîn unde der stil ein rubîn. gevar als ein affen hût truoc hende disiu gæbe brût. ir nagele wâren niht ze lieht, wand mir diu âventiure giht, si stüenden als eines lewen klân. nâch ir minne was selten tjost getân. sus kom geriten in den rinc trûrens urhap, vröuden twinc. si hielt, al dâ si den künec vant. Vrou Cunneware de Lalant az mit Artuse, diu künegîn von Janfuse mit vroun Gynovern az. Artus, der künec, schône saz. Kundrie hielt vor dem Brituneis. si sprach hin zim franzeis - ob ichz in tiuschen sagen sol, mir tuont ir mære niht ze wol -: "Filly rois Utpandragun, dich unde manec Britun hât dîn gewerp alhie geschant. die besten über alliu lant sæzen hie mit werdecheit, wan daz ein galle ir prîs versneit. tavelrunder ist entnihtet, der valsch hât dran gepflihtet.