*D Dô sprach er: "bistûz, Gawan? wie kranken prîs ich des hân, ob dû mirz wol erbiutes hie. ich hôrte von dir sprechen ie, dû erbiutez allen liuten wol. dîn dienst ich doch enpfâhen sol niwan ûf gegendienstes gelt. Nû sage mir, wes sint diu gezelt, der dort ist manegez ûf geslagen? lît Artus dâ, sô muoz ich klagen, daz ich in niht mit êren mîn mac gesehen noch die künegîn. ich sol rechen ê ein bliuwen, dâ von ich sît mit riuwen vuor, von solhen sachen: ein werdiu magt mir lachen bôt; die blou der scheneschalt durch mich, daz von ir reis der walt." "unsanfte ist daz gerochen", Sprach Gawan. "im ist zerbrochen der zeswe arm unt daz winster bein. rît her, schouwe ors unt ouch den stein. hie ligent ouch trunzûne ûf dem snê dînes spers, nâch dem dû vrâgtest ê." Dô Parzival die wârheit sach, dô vrâgeter vürbaz unt sprach: "diz lâze ich an dich, Gawan, op daz sî der selbe man, der mir hât laster vor gezilt, sô rît ich mit dir, swar dû wilt."

*m Der Waleis sprach: "dû bist Gawan. vil kranken prîs ich des hân, ob dû mir es schône biutest hie. ich hôrte von dir sprechen ie, dû enbiutest allen liuten wol. dîn dienst ich doch enpfâhen sol niuwan ûf gegendienstes gelt. nû sage mir, wes sint diu zelt, der dort ist manigez ûf geslagen? lît Artus dâ, sô muoz ich klagen, daz ich in niht mit êren mîn mac gesehen noch die künigîn. ich sol rechen ê ein bliuwen, dâ von ich sît mit riuwen vuor, von solichen sachen: ein werdiu magt mir lachen bôt; die blou der schiniscalt durch mich, daz von ir reis der walt." "unsanfte ist daz gerochen", sprach Gawan. "im ist zerbrochen der zeswe arm und daz winster bein. rît her, schouwe ros und ouch den stein. hie ligent ouch trunzûne ûf dem snê dînes spers, nâch dem dû vrâgetest ê." dô Parcifal die wârheit sach, dô vrâgete er vürbaz und sprach: "diz lâz ich an dich, Gawan, ob daz sî der selbe man, der mir hât laster vor gezilt, sô rît ich mit dir, war dû wilt."

*G dô sprach er: "bistûz, Gawan? vil kranken brîs ich des hân, op dû mirz wol erbiutest hie. ich hôrt von dir sprechen ie, dû erbiutest ez allen liuten wol. dîn dienst ich doch enpfâhen sol niwan ûf dienstes gelt. nû sage mir, wes sint diu gezelt, der manigez ist dort ûf geslagen? lît Artus dâ, sô muoz ich klagen, daz ich in mit den êren mîn niht mac gesehen noch die künigîn. ich sol rechen ê ein bliuwen, dar umbe ich sît mit riuwen vuor, von solhen sachen: ein werdiu maget ir lachen mir bôt; die sluoc der seneschalt durch mich, daz von ir swâret der walt." "unsanfte daz ist gerochen", sprach Gawan. "im ist zerbrochen der zeswe arm unde daz winster bein. rît her, schouwe ors unt den stein. hie ligent ouch trunzûne ûf dem snê dînes spers, nâch dem dû vrâgtest ê." dô Parzival die wârheit sach, dô dâhter mêr unde sprach: "daz lâze ich an dich, Gawan, op daz sî der selbe man, der mir hât laster vor gezilt, sô rîte ich mit dir, swar dû wilt."

*T Dô sprach er: "bistûz, Gawan? vil kranken prîs ich des hân, ob dû mirs wol erbiutest hie. ich hôrte von dir daz sprechen ie, dû erbiutez allen liuten wol. dînen dienst ich enpfâhen sol niuwan ûf gegendienstes gelt. Nû sage mir, wes sint jene gezelt, der manegez lît dort ûf geslagen? lît Artus dâ, sô muoz ich klagen, daz ich in niht mit den êren mîn mac gesehen unde die künegîn. ich sol ê rechen ein bliuwen, dar umb ich sît mit riuwen vuor, mit sölhen sachen: ein werdiu maget ir lachen mir bôt; die sluoc sîn seneschalt durch mich, daz von ir reis der walt." "Ungevuoge ist daz gerochen", sprach Gawan. "im ist zerbrochen der zesewe arm unde sîn winster bein. rîtet her, schouwet des ors unde den stein. hie ligent ouch die trunzûn ûf dem snê des spers, nâch dem ir vrâgetet ê." Dô Parcifal die wârheit sach, dô gedâhter mêr unde sprach: "diz lâzich an dich, Gawan, ob daz sî der selbe man, der mir hât laster vor gezilt, sô rîtich mit dir, swar dû wilt."