*D Keie hurte vaste an in unt drang imz ors alumbe hin, unze daz der Waleis übersach sîn süeze sûrez ungemach, sînes wîbes gelîchen schîn, von Pelrapeire der künegîn, ich meine den geparrierten snê. dô kom aber vrou witze als ê, diu im den sin her wider gap. Keie daz ors liez in den walap; der kom durch tjustieren her. von rabîne sancten si diu sper. Keie sîne tjoste brâhte, als im der ougen mez gedâhte, durch Parzivalen schilt ein venster wît. im wart vergolden dirre strît. Keie, Artuses scheneschalt, ze gegentjoste wart gevalt über den ronen, dâ diu gans entran, sô daz daz ors unt der man liten beidiu samt nôt: der man wart wunt, daz ors lac tôt. zwischen dem satelbogen unt eime stein Keie der zeswe arm unt daz winster bein zerbrach von disem gevelle. surzengel, satel, geschelle von dirre hurt gar zerbrast. sus galt zwei bliwen der gast: daz eine leit ein maget durch in, mit dem andern muoser selbe sîn.

*m Keie hurte vaste an in und dranc imz ros alumbe hin, unz daz der Waleis übersach sîn süeze sûrez ungemach, sînes wîbes glîchen schîn, von Pelraperie der künigîn, ich meine den geparrierten snê. dô kam aber vrouwe witze als ê, diu im den sin her wider gap. Keie daz ros liez in den walap; der kam durch justieren her. von rabbîne sancten si diu sper. Keie sîne juste brâhte, als im der ougen mez gedâhte, durch des Waleises schilt ein venster wît. im wart vergolten dirre strît. Keie, Artuses sciniscalt, ze gegenjuste wart gevalt über den ronen, dar diu gans entran, sô daz daz ros und der man liten beidiu sament nôt: der man wart wunt, daz ros lac tôt. zwischen dem satelbogen und einem stein Keien der zesewe arm, daz winster bein zerbrach von disem gevelle. surzengel, satel, geschelle von dirre hurte gar zerbrast. sus galt zwei bliuwen dô der gast: daz eine leit ein maget durch in, mit dem anderen muose er selbe sîn.

*G Kay hurte vaste an in; er dranc imz ors alumbe hin, sô daz der Waleis übersach sîn süeze sûrez ungemach, sînes wîbes gelîchen schîn, von Pelrapeire der künigîn, ich meine den geparrierten snê. dô kom im aber witze als ê, diu im den sin her wider gap. Kay lie daz ors in den walap; der kom durch tjostieren her. von rabîne sancten si diu sper. Kay sîne tjost brâhte, als im der ougen mez gedâhte, Durch des Waleises schilt ein venster wît. im wart vergolten dirre strît. Kay, Artuses seneschalt, ze gegentjoste wart gevalt über den ronen, dâ diu gans entran, sô daz daz ors unde der man beidiu sament liten nôt: der man was wunt, daz ors lac tôt. zwischeme satelbogen unde einem stein Kay zeswer arm unde sîn winster bein zerbrast von disem gevelle. surzengel unde satel, geschelle von dirre hurte gar zerbrast. sus galt zwei bliwen der gast: daz eine leit ein maget durch in, mit dem anderen muoser selbe sîn.

*T Key hurte vaste an in; er dranc im daz ors alumbe hin, sô daz der Waleis übersach sîn süeze senftez ungemach, sînes wîbes glîcher schîn, von Peilrapere der künegîn, ich meine den geparrierten snê. dô kom aber witze als ê, diu im sîn herze wider gap. Key lie daz ors in den walap unde kom durch tjostieren her. von rabîne sancten si diu sper. Key sîne tjost brâhte, als im der ougen mez gedâhte, durch des Waleises schilt ein venster wît. im wart vergolten dirre strît. Key, Artuses seneschalt, ze gegentjost wart gevalt über den ronen, dâ diu gans entran, sô daz daz ors unde der man beidiu samt liten nôt: der man wart wunt, daz ors lac tôt. zwischen dem satelbogen unde einem stein Keys zesewe arm, sîn winster bein zerbrast von disem gevelle. surzengel unde satel, geschelle von dirre hurt gar zerbrast. Sus galt zwei bliuwen dirre gast: daz eine leit ein maget durch in, mit dem andern muose er selbe sîn.