*D kom an den selben rinc geriten. sîn helm, sîn schilt was sô versniten, daz niemen dran kôs decheiniu mâl; die slege vrumte Parzival. Von dem orse stuont der küene man, vrou Jeschute enpfiengez sân. vil junchêrren dar nâher spranc, umb in unt umbe si was grôz gedranc. si jâhen: "wir suln der orse pflegen." Orilus, der werde degen, leite schildes schirben ûfez gras. nâch ir, durch die er komen was, begunder vrâgen al zehant. vroun Cunnewaren de Lalant zeigete man im, wâ diu saz. ir site man gein prîse maz. gewâpent er sô nâhe gienc, der künec unt diu künegîn in enpfienc. er dankte in unt bôt fîanze sân sîner swester wolgetân. Bî den trachen ûfem kursît erkanden sin wol wan ein strît. si sprach: "dû bist der bruoder mîn, Orilus oder Læhelin. ich nim iwer deweders sicherheit. ir wâret mir bêde ie bereit ze dienste, als ich iuch gebat. mir wære ûf den triwen mat, Solt ich gein iu kriegen unt mîn selber zuht betriegen."

*m kam an den selben rinc geriten. sîn helm, sîn schilt was sô versniten, daz niemen dran kôs dekeiniu mâl; die slege vrumte Parcifal. von dem rosse stuont der küene man, vrouwe Jeschute enpfienc ez sân. vil junchêrren dar nâher spranc, umb in und si was grôz gedranc. si jâhen: "wir sullen der rosse pflegen." Orilus, der werde degen, leite schiltes schirben ûf daz gras. nâch ir, durch die er komen was, begunde er vrâgen alle zehant. vrouwen Cunnewaren de Lalant zougete man ime, wâ diu saz. ir site man gegen prîse maz. gewâpent er sô nâhe gienc, der künic und künigîn in enpfienc. er dankete ime und bôt fîanze sân sîner swester wol getân. bî den trachen ûf dem kursît erkante si in wol âne strît. si sprach: "dû bist der bruoder mîn, Orilus oder Lehelin. ich ennim iuwer deweders sicherheit. ir wârt ie beide mir bereit ze dienste, als ich iuch gebat. mir wære an den triuwen mat, solt ich gegen iu kriegen und mîn selber zuht betriegen."

*G kom an den selben rinc geriten. sîn helm, sîn schilt was sô versniten, daz niemen kôs deheiniu mâl; die slege vrumte Parzival. von dem orse stuont der man, vrou Jeschute enpfiengez sân. vil junchêrren dar nâher spranc, umbe in unde umbe si wart grôz gedranc. si jâhen: "wir sulen der orse pflegen." Orillus, der werde degen, leit die schiltes schirben ûfez gras. nâch ir, durch die er komen was, Begunder vrâgen alzehant. vroun Kunewaren de Lalant zeigte man im, dâ diu saz. ir güete man gein brîse maz. gewâpent er sô nâhen gienc, der künic unde diu künigîn in enpfienc. er neic unde bôt fîanze sân sîner swester wolgetân. bî dem trachen ame kursît erkande sin wol âne strît. si sprach: "dû bist der bruoder mîn, Orillus oder Lehelin. ich nim iuwer deweders sicherheit; ir wâret mir ê bereit mit dienst, swes ich ie gebat. mir wære ûf den triwen mat, solde ich gein iu kriegen und mich selben triegen."

*T kom in den selben rinc geriten. sîn helm, sîn schilt was sô versniten, daz niemen kôs dran keiniu mâl; die slege vrumte Parcifal. von dem orse stuont der küene man, vrou Jeschute enpfiengez sân. vil junchêrren dar nâher spranc, umbe si zwei wart grôz gedranc. si jâhen: "wir suln der orse pflegen." Orilus, der werde degen, leite des schiltes schirben ûfez gras. nâch der, durch die er dar komen was, begunder vrâgen alzehant. vroun Cunnewaren de Lalant zeigte man im, wâ diu saz. ir site man gegen prîse maz. gewâpent er sô nâhen gienc, der künec unde diu künegîn in enpfienc. er dankete unde bôt fîanze sân sîner swester wol getân. bî dem trachen ûf dem kursît erkande sin wol âne strît. si sprach: "dû bist der bruoder mîn, Orilus oder Lehelin. ich nim iuwer deweders sicherheit. ir wâret mir beide ie bereit ze dienste, als ich iuch bat. mir wære ûf den triuwen mat, solt ich gegen iu kriegen, mîn selbes zuht betriegen."