*D Dâ ergienc diu scharpfe herte: iewederer vaste werte sînen prîs vor dem ander. der herzoge Orilus de Lalander streit nâch sîme gelêrten site. ich wæne, ieman sô vil gestrite. er hete kunst unde kraft, des wart er dicke sigehaft an maneger stat, swie ez dâ ergienc. durch den trôst zuo zim er vienc den jungen, starken Parzival. der begreif ouch in dô sunder twâl und zucten ûz dem satel sîn als eine garben hebrîn Vast er in under die arme swanc, mit im er von dem orse spranc unt dructen über einen ronen. dâ muose schumpfentiure wonen, der sölher nœte niht was gewent. "dû gearnest, daz sich hât versent disiu vrouwe von dîme zorne. nû bistû der verlorne, dûne lâzest si dîne hulde hân." "daz enwirt sô gâhes niht getân", sprach der herzoge Orilus, "ich bin noch unbetwungen sus." Parzival, der werde degen, dructen an sich, daz bluotes regen spranc durch die barbiere. dâ wart der vürste schiere

*m Dâ ergienc diu scharpfe herte: ietweder vaste werte sînen prîs vor dem andern. duc Orilus de Lalandern streit nâch sînem gelêrten site. ich wæne, ieman sô vil gestrite. er hete kunst und kraft, des wart er dicke sigehaft an maniger stat, wie ez dâ ergienc. durch den trôst zuom er vienc den jungen, starken Parcifal. der begreif ouch in dô sunder twâl und zucte in ûz dem satele sîn alsô ein garb heberîn vaste ern under die arme swanc, mit ime er von dem rosse spranc und druhte in über einen ronen. dô muose schumpfentiure wonen, der solher nœte niht was gewenet. "†die arnasch†, daz sich hât versenet disiu vrouwe von dînem zorne. nû bistû der verlorne, dû enlâzest si die hulden hân." "daz enwirt sô gâhes niht getân", sprach der herzoge Orilus, "ich enbin noch niht betwungen sus." Parcifal, der werde degen, druht in an sich, daz bluotes regen spranc durch die barbiere. dô wart der vürste schiere

*G Dâ ergie diu scherpfe herte: ietweder vaste werte sînen brîs vor dem ander. Orillus de Lalander streit nâch sînem gelêrten site. ich wæne, ie man sô wol gestrite. er hete kunst unde kraft, des wart er dicke sigehaft an maniger stat, swiez dâ ergienc. durch den trôst zuo im er vienc den jungen, starken Parzival. der begreif ouch in dô sunder twâl unt zucte in ûz dem satel sîn als eine garbe heberîn vaster in under die arme swanc, mit im von dem orse er spranc unde dructe in über eine ronen. dô muoser schumpfentiure wonen, der solher nôt niht was gewent. "dû gearnest, daz sich hât versent disiu vrouwe von dînem zorne. nû bistû der verlorne, dûne lâzest si dîne hulde hân." "dazne wirt sô schiere niht getân", sprach der herzoge Orillus, "ichne bin doch niht betwungen sus." Parzival, der werde degen, dructe in an sich, daz bluotes regen spranc durch die barbiere. dô wart der vürste schiere

*T Dâ ergienc diu scharpfe herte: ietweder vaste werte sînen prîs vor dem ander. Duc Orilus de Lalander streit nâch sînem gelêrten site. ich wæne, ieman sô vil gestrite. er hete kunst unde kraft, des wart er dicke sigehaft an maneger stat, swiez dâ ergienc. durch den trôst er zuo zim vienc den jungen, starken Parcifal. der begreif ouch in dô sunder twâl unde zuhtin ûz dem satel sîn als eine garbe heberîn vaste ern undern arm swanc, mit im er von dem orse spranc unde druhtin über einen ronen. dô muose schumpfentiure wonen, der solher nôt niht was gewent. "Dû gearnest, daz sich hât versent disiu vrouwe von disem zorne. des bist dû der verlorne, dû lâzest si dîne hulde hân." "Daz enwirt sô gâhes niht getân", sprach der herzoge Orilus, "ine bin noch niht betwungen sus." Parcifal, der werde degen, druhten an sich, daz bluotes regen im spranc durch die barbiere. dô wart der vürste schiere