*D Parzival was ouch bereit: sîn ors mit walap er reit gein Orilus de Lalander. ûf des schilde vander einen trachen, als er lebte. ein ander trache strebte ûf sîme helme gebunden, an den selben stunden manec guldîn trache kleine - mit manegem edelen steine muosen die gehêrt sîn; ir ougen wâren rubîn - ûf der decke und ame kursît. dâ wart genomen der poynder wît von den zwein helden unverzagt. newederhalp wart widersagt: si wâren doch ledec ir triwe. trunzûne starc al niwe von in wæten gein den lüften. ich wolde mich des güften, het ich eine sölhe tjost gesehen, als mir diz mære hât verjehen. Dâ wart von rabbîne geriten, ein sölch tjoste niht vermiten. vroun Jeschuten muot verjach, schœner tjost si nie gesach. diu hielt dâ, want ir hende. si vreuden ellende gunde enwederm helde schaden. diu ors in sweize muosen baden.

*m Parcifal was ouch bereit: sîn ros mit walap er reit gegen Oriluse de Lalander. ûf des schilt vander einen trachen, alsô er lebete. ein ander trache strebete ûf sînem helme gebunden, an den selben stunden manic guldîn trache kleine - mit manigem edelem gesteine muosen die gehêret sîn; ir ougen wâren rubîn - ûf der decke unt ame kursît. dâ wart genomen der poinder wît von den zwein helden unverzaget. eintwederhalp wart widersaget: si wâren doch ledic ir triuwe. trunzûne starc alniuwe von in wæten gegen den lüften. ich wolte mich des güften, hete ich ein soliche just gesehen, alsô mir des mære hât verjehen. dâ wart von rabîne geriten, ein solichiu just niht vermiten. vrouwen Jeschuten muot des verjach, schœner just si nie gesach. diu hielt dâ, want ir hende. si vröuden ellende engunde enwederm helde schaden. diu ros in sweize muosen baden.

*G Parzival was ouch bereit: daz ors mit walap er reit gein Orillus de Lalander. ûf des schilte vander einen trachen, alser lebte. ein ander trache strebte ûf sînem helm gebunden, an den selben stunden manic guldîn trache kleine - mit manigem edelen steine die muosen wol gehêret sîn; ir ougen wâren rubîn - ûf der decke unde an dem kursît. dâ wart genomen der ponder wît von den zwein helden unverzaget. newederhalp wart widersaget: si wâren doch ledic ir triuwe. trunzûne starc al niuwe von in wæten gein den lüften. ich wolte mich des güften, het ich eine solhe tjost gesehen, als mir diz mære hât verjehen. dâ wart von rabîne geriten, ein solch tjost niht vermiten. vroun Jeschuten muot verjach, daz si nie schœner tjost gesach. diu hielt dâ, want ir hende. si vröuden ellende gunde dewederem rîter schaden. diu ors in sweize muosen baden.

*T Parzifal was ouch bereit: sîn ors mit walap er reit gegen Oriluse de Lalander. ûf des schilte vander einen trachen, als er lebete. ein ander trache strebete ûf sînem helme gebunden, an den selben stunden manec guldîn trache kleine - mit manegem edeln steine muosen die gehêret sîn; ir ougen wâren rubîn - ûf der decke unde ûf dem kursît. hie wart genomen der poynder wît von den zwein helden unverzaget. dewederhalp wart widersaget: si wâren doch ledic ir triuwe. trunzûne starc al niuwe von in wæten gegen den lüften. ich wolte mich des güften, hetich ein solhe tjost gesehen, als mir diz mære hât verjehen. dâ wart von rabîne geriten, ein sölch tjost niht vermiten. vroun Jeschuten muot verjach, schœner tjost si nie gesach. diu hielt dâ unde want ir hende, si vröuden ellende, unde engunde dewederme helde schaden. diu ors in sweize muosen baden.