*D Der valscheite widersaz kêrte ûf der huofslege kraz. sîn scheiden dan, daz riwet mich. alrêst nû âventiwert ez sich. dô begunde krenken sich ir spor. sich schieden, die dâ riten vor. ir slâ wart smal, diu ê was breit. er verlôs si gar, daz was im leit. mære vriesch dô der junge man, dâ von er herzenôt gewan. Dô erhôrte der degen ellens rîch einer vrouwen stimme jæmerlîch. ez was dennoch von touwe naz. vor im ûf einer linden saz ein magt, der vuogte ir triwe nôt. ein gebalsemt ritter tôt lent ir zwischen den armen. swenz niht wolt erbarmen, der si sô sitzen sæhe, untriwen ich im jæhe. Sîn ors dô gein ir wante, der wênic si bekante. si was doch sîner muomen kint. al irdisch triwe was ein wint, wan die man an ir lîbe sach. Parzival si gruozte und sprach: "vrouwe, mir ist vil leit iwer senlîchiu arbeit. bedurft ir mînes dienstes iht, in iwerem dienste man mich siht."

*m der valscheite widersaz kêrte ûf der huofslege kraz. si schieden dannen, daz riuwet mich. allerêrst nû âventiurt ez sich. dô begunde krenken sich ir spor. sich schieden, die dâ riten vor. ir slâ wart smal, diu ê was breit. er verlôs si gar, daz was im leit. Nû vriesch der junge, süeze man mære, dâ von er nôt gewan. dô erhôrte der degen ellens rîch einer vrouwen stimme jâmerlîch. er was dannoch von touwe naz. vor ime ûf einer linden saz ein maget, der vuogte ir triuwe nôt. ein gebalsamt ritter tôt lent ir zwischen den armen. wen ez niht wolte erbarmen, der si sô sitzen sæhe, untriuwen ich ime jæhe. sîn ros gegen ir dô wante, der wênic si bekante. si was doch sîner muomen kint. alliu irdischiu triuwe was ein wint, wan die man an ir lîbe sach. Parcifal si gruozte und sprach: "vrouwe, mir ist sêre leit iuwer senlîchiu arbeit. bedurfet ir mînes dienstes iht, in iuwerem dienste man mich siht."

*G sich huop der velsche widersaz vaste ûf der huofslege kraz. sîn scheiden dan, daz riwet mich. alrêrst nû âventiurt ez sich. dô begunde krenken sich ir spor. sich schieden, die dâ riten vor. ir slâ wart smal, diu ê was breit. er verlôs si gar, daz was im leit. mære vriesch der junge man, dâ von er herzenôt gewan. ez vernam der helt ellens rîche einer vrouwen stimme jæmerlîche. ez was dannoch von touwe naz. vor im ûf einer linden saz ein maget, der vuoget ir triwe nôt. ein gebalsemet rîter tôt lent ir zwischen den armen. den ez niht wolt erbarmen, der si sô sitzen sæhe, untriwen ich im jæhe. sîn ors dô gein ir wande, der wênic si bekande. si was doch sîner muomen kint. al irdesch triwe was ein wint, wan die man an ir lîbe sach. Parzival si gruozte unde sprach: "nû wizzet, vrouwe, mir ist leit iwer senelîchiu arebeit. bedurft ir mînes dienstes iht, in iwerem dienste man mich siht."

*T Der valscheite widersaz kêrte ûf der huofslege kraz. sîn scheiden dan, daz riuwet mich. Nû êrst âventiuret ez sich. dô begunde krenken sich ir spor. sich schieden, die dâ riten vor. ir slâ wart smal, diu ê was breit. die verlôs er gar, daz was im leit. Mære vriesch der junge man, dâ von er herzenôt gewan. dô erhôrte der helt ellens rîch einer vrouwen stimme jæmerlîch. ez was dannoch von touwe naz. vor im ûf einer linden saz ein maget, der vuocte ir triuwe nôt. ein gebalsemeter rîter tôt lac an ir armen. den si niht wolte erbarmen, der si alsô sitzen sæhe, untriuwen ich im jæhe. sîn ôre er gegen ir wande, der wênic si erkande. si was doch sîner muomen kint. alliu irdenschiu triuwe was ein wint, wan dier an ir lîbe sach. Parcifal si gruozte unde sprach. er sprach: "vrouwe, mir ist leit iuwer senelîchiu arbeit. bedurfet ir mînes dienstes iht, in iuwerm dienste man mich siht."