*D Nâch den mæren schrei der gast; gegenrede im gar gebrast. Swie vil er nâch geriefe, Reht als er gênde sliefe, warp der knappe unt sluoc die porten zuo. dô was sîn danscheiden ze vruo an der vlustbæren zît dem, der nû zins von vreuden gît. diu ist an im verborgen. umbe den wurf der sorgen wart getoppelt, dô er den Grâl vant mit sînen ougen, âne hant unt âne würfels ecke. ob in nû kumber wecke, des was er dâ vor niht gewent; er enhete sich niht vil gesent. Parzival, der huop sich nâch vaste ûf die slâ, die er dâ sach. er dâhte: "die vor mir riten, ich wæne, die hiute striten manlîche umbe mînes wirtes dinc. ruochten sis, sô wære ir rinc mit mir niht verkrenket. aldâ würde niht gewenket: ich hülfe in in der selben nôt, daz ich gediende mîn brôt unt ouch diz wünneclîche swert, daz mir gap ir hêrre wert."

*m nâch den mæren schrei der gast; gegenrede im gar gebrast. wie vil er nâch geriefe, reht als er gênde sliefe, warp der knabe und sluoc die porten zuo. dô was sîn scheiden danne ze vruo an der vlustbæren zît dem, der nû zins von vröuden gît. diu ist an ime verborgen. umbe den wurf der sorgen wart getoppelt, dô er den Grâl vant mit sînen ougen, âne hant und âne würfels ecken. ob in nû kumber wecken, des was er dâ vor niht gewenet; er enhete sich niht vil gesenet. Parcifal, der huop sich nâch vaste ûf die slâ, die er dâ sach. er dâhte: "die vor mir rîtent, ich wæne, die hiute strîtent manlîch umb mînes wirtes dinc. geruochten sis, sô enwære ir rinc mit mir niht verkrenket. aldâ würde niht gewenket: ich hülfe in an der selben nôt, daz ich gedienete mîn brôt und ouch daz wünneclîch swert, daz mir gap ir hêrre wert. ungedienet ich daz trage. si wænent lîhte, ich sî ein zage."

*G nâch den mæren schrei der gast; gegenrede im gar gebrast. swie vil er nâch geriefe, reht alser gênde sliefe, warp der knappe unde sluoc die porte zuo. dô was sîn scheiden dan ze vruo an der vlustbæren zît dem, der nû zins von vröuden gît. diu was an im verborgen. umbe den wurf der sorgen was getopelt, dô er den Grâl vant mit sînen ougen, âne hant Und âne würfels ecke. obe in nû kumber wecke, des was er dâ vor ungewent; erne het sich niht vil gesent. Parzival, der huop sich nâch ûf die slâ, dier dâ sach. er dâhte: "die vor mir riten, die wæne ich hiute striten manlîch umbe mînes wirtes dinc. geruohten sis, sône wære ir rinc mit mir ungekrenket. dâne würde niht gewenket: ich hülfe in an der selben nôt, daz ich gediente mîn brôt unde ouch daz wünniclîche swert, daz mir gap ir hêrre wert. ungedient ich daz trage. si wænent lîhte, ich sî ein zage."

*T Nâch den mæren schrei der gast; der gegenrede im gar gebrast. swie vil er nâch geriefe, rehte alser gânde sliefe, warp der knappe unde sluoc die porten zuo. dô was sîn scheiden dan ze vruo an dirre vlustbæren zît dem, der nû zins von vröuden gît. diu was an im verborgen. umb den wurf der sorgen wart getopelt, dô er den Grâl vant mit sînen ougen, âne hant unde âne würfels ecke. obin nû kumber wecke, des was er dâ vor ungewent; ern hete sich niht vil gesent. Parcifal, der huop sich nâch vaste ûf ir slâ, dier dâ sach. er dâhte: "die vor mir rîtent, ich wæn, si noch hiute strîtent manlîche umbe mînes wirtes dinc. geruohten siz, sô wære ir rinc mit mir niht verkrenket. dâne würde niht gewenket: ine hülfin an der selben nôt, daz ich gediende mîn brôt unde ouch diz wünneclîche swert, daz mir gab ir hêrre wert. ungedient ich daz trage. si wænent lîhte, ich sî ein zage."