*D Ûfem teppeche sach der degen wert ligen sîn harnasch unt zwei swert. daz eine der wirt im geben hiez, daz ander was von Gaheviez. Sus sprach er zim selben sân: "owê, durch waz ist diz getân? deiswâr, ich sol mich wâpen drîn. ich leit in slâfe alsölhen pîn, daz mir wachende arbeit noch hiute wênec ist bereit. hât dirre wirt urliuges nôt, sô leist ich gern sîn gebot unt ir gebot mit triwen, diu disen mantel niwen mir lêch durch ir güete. wan stüende ir gemüete, daz si dienst wolde nemen, des kunde mich durch si gezemen - unt doch niht durch ir minne, wan mîn wîp, diu küneginne, ist an ir lîbe alse clâr oder vürbaz, daz ist wâr." Er tet, als er tuon sol: von vuoz ûf wâpende er sich wol durch strîtes antwurte. zwei swert er umbe gurte. zer tür ûz gienc der werde degen. dâ was sîn ors an die stegen geheftet. schilt und sper lent dâr bî: daz was sîn ger.

*m ûf dem teppich sach der degen wert ligen sînen harnasch und zwei swert. daz eine der wirt ime geben hiez, daz ander was von Gaheviez. dô sprach er zuo dem selben sân: "ouwê, durch waz ist diz getân? deiswâr, ich sol mich wâpen drîn. ich leit in slâfe alsoliche pîn, daz mir wachende arbeit noch hiute, wæn ich, ist bereit. hât dirre wirt urliuges nôt, sô leist ich gerne sîn gebot und ir gebot mit triuwen, diu disen mantel niuwen mir lêch durch ir güete. wan stüende ir gemüete, daz si dienest wolte nemen, des kunde mich durch si gezemen - und doch niht durch ir minne, want mîn wîp, diu küniginne, ist an ir lîbe als clâr oder vürbaz, daz ist wâr." er tet, als er tuon sol: von vuoze ûf wâpenter sich wol durch strîtes antwurte. zwei swert er umbe gurte. zer tür ûz gienc der werde †man†. dô was sîn ros an die stegen geheftet. schilt und sper lente dâr bî: daz was sîn ger.

*G ûfem tepeche vant der degen wert ligen sîn harnasch unde zwei swert. daz eine der wirt im geben hiez, daz ander was von Kahaviez. dô sprach er zim selben sân: "awê, war zuo ist diz getân? dêswâr, ich sol mich wâpen drîn. ich leit in slâfe solhen pîn, daz mir wachende arbeit noch hiute, wæn ich, ist bereit. hât dirre wirt urliuges nôt, sô leiste ich gerne sîn gebot unde ir gebot mit triuwen, diu disen mandel niuwen mir lêch durch ir güete. wan stüende ir gemüete, daz si dienst wolte nemen, des solte mich durch si gezemen - unde doch niht durch ir minne, wan mîn wîp, diu küniginne, ist an ir lîbe wol als clâr oder vürbaz, daz ist wâr." er tet, alser tuon sol: von vuoze ûf wâpent er sich wol gein strîtes antwurte. zwei swert er umbe gurte. zer tür gieng ûz der werde degen. Dô was sîn ors an die stegen geheftet. schilt unde sper lent dâr bî: daz was sîn ger.

*T Ûf dem teppiche sach der degen wert ligen sîn harnasch unde zwei swert. daz eine im der wirt geben hiez, daz ander was von Kaheviez. Dô sprach er zim selben sân: "ouwê, durch waz ist diz getân? deiswâr, ich sol mich wâpen drîn. ich leit in slâfe sölhen pîn, daz mir wachende arbeit noch hiute, wænich, ist bereit. Hât dirre wirt urliuges nôt, sô leist ich gerne sîn gebot unde ir gebot mit triuwen, diu disen mantel niuwen mir lêch durch ir güete. wan stüende ir gemüete, daz si mîn dienst wolte nemen, daz kunde mich durch si gezemen - unde doch niht umbir minne, wand mîn wîp, diu küneginne, ist an ir lîbe als clâr oder vürbaz, daz ist wâr." Der tet, als man tuon sol: von vuoze ûf wâpenter sich wol gegen strîtes antwurte. Zwei swert er umbe gurte. zer tür gie ûz der werde degen. Nû was sîn ors an die stegen geheftet. schilt unde sper lente dâr bî: daz was sîn ger.