*D Parzival niht eine lac: geselleclîche unz an den tac was bî im strengiu arbeit. ir boten künftigiu leit sanden im in slâfe dar, sô daz der junge wol gevar sîner muoter troum gar widerwac, des si nâch Gahmurete pflac. Sus wart gesteppet im sîn troum mit swertslegen umbe den soum, dâr vor mit maneger tjoste rîch. von rabbîne hurteclîch er leit in slâfe etslîch nôt. möhter drîzec stunt sîn tôt, daz het er wachende ê gedolt. sus teilte im ungemach den solt. Von disen strengen sachen muoser durch nôt erwachen. im swizten âdern unt bein. der tag ouch durch diu venster schein. dô sprach er: "wê, wâ sint diu kint, daz si hie vor mir niht sint? wer sol mir bieten mîn gewant?" sus warte ir der wîgant, unz er an der stunt entslief. niemen dâ redete noch enrief. si wâren gar verborgen. umbe den mitten morgen, dô erwachete aber der junge man. ûf rihte sich der küene sân.

*m Parcifal niht eine lac: geselleclîch unz an den tac was bî ime strengiu arbeit. ir boten künftigiu leit santen ime in slâfe dar, sô daz der junge wol gevar sîner muoter troum gar widerwac, des si nâch Gahmurete pflac. sus was gesteppet im sîn troum mit swertslegen umb den soum, dâr vor mit maniger juste rîch. von rabîne hurteclîch er leit in slâfe etslîche nôt. möhter drîzic stunt sîn tôt, daz het er wachende ê gedolt. sus teilte ime ungemach den solt. von disen strengen sachen muos er durch nôt erwachen. im swizeten âderen und bein. der tac ouch durch diu venster erschein. dô sprach er: "wê, wâ sint diu kint, daz si hie vor mir niht sint? wer sol mir bieten mîn gewant?" sus wartete ir der wîgant, unz daz er an der stunt entslief. nieman dâ redete noch enrief. si wâren gar verborgen. umb den mitten morgen, dô erwachete aber der junge man. ûf rihte sich der küene sân.

*G Parzival niht eine lac: geselliclîche unze an den tac was bî im ein strengiu arbeit. ir boten künftigiu leit sanden im in slâfe dar, sô daz der junge wolgevar sîner muoter troum gar widerwac, des si nâch Gahmurete pflac. sus wart gestabet im sîn troum mit swertslegen umbe den soum, dâ vor mit maniger tjoste rîch. von rabbîne hurticlîch er leit in slâfe solche nôt, möhter drîzic stunt sîn tôt, daz heter wachende ê gedolt. sus teilt im ungemach den solt. von disen strengen sachen muoser durch nôt erwachen. Im swizten âder unde bein. der tac ouch durch diu venster schein. dô sprach er: "wê, wâ sint diu kint, daz si hie vor mir niht sint? wer sol mir bieten mîn gewant?" sus wart in der wîgant, unzer anderstunt entslief. niemen dâ redete noch rief, wan si wâren gar verborgen. reht an dem mitten morgen, dô erwachte aber der junge man. ûf rihte sich der küene sân.

*T Parcifal niht eine lac: geselleclîche unz an den tac was bî im strengiu arbeit. ir boten künftigiu leit santen im in slâfe dar, sô daz der junge wol gevar sîner muoter troum gar widerwac, des si nâch Gahmurete pflac. sus wart gesteppet im sîn troum mit swertslegen umbe den soum, dâr vor mit maneger tjost rîche. von rabîne hurteclîche er leit in slâfe sölhe nôt, möhter drîzic stunt sîn tôt, daz het er wachende ê gedolt. sus teiltim ungemach den solt. Von disen strengen sachen muoser durch nôt erwachen. im swizten âdern unde bein. der tac ouch durch diu venster schein. Dô sprach er: "wê, wâ sint diu kint, daz si hie vor mir niht sint? wer sol mir bieten mîn gewant?" sus wartetir der wîgant, unz daz er ander stunt entslief. niemen dâ redete noch enrief. si wâren gar verborgen. Rehte umb den mitten morgen, dô erwachete aber der junge man. ûf rihte sich der küene sân.