*D Der taveln hundert muosten sîn, die man dô truoc zer tür dar în. man sazte ieslîche schiere vür werder ritter viere. tischlachen var nâch wîze wurden drûf geleit mit vlîze. der wirt dô selbe wazzer nam, der was an hôchmuote lam. mit im twuoc sich Parzival. eine sîdîne tweheln wol gemâl, die bôt eines grâven sun dar nâch, dem was ze knien vür si gâch. Swâ dô der taveln decheiniu stuont, dâ tet man vier knappen kunt, daz si ir dienstes niht vergæzen den, die drob sæzen. zwêne knieten unt sniten. die anderen zwêne niht vermiten, sine trüegen trinken unt ezzen dar, unt nâmen ir mit dienste war. hœret mêr von rîcheite sagen: vier karrâschen muosen tragen manec tiwer goltvaz ieslîchem ritter, der dâ saz. man zôch si zen vier wenden. vier ritter mit ir henden mans ûf die taveln setzen sach. ieslîchem gie ein schrîbære nâch, der sich dar zuo arbeite unt es wider ûf bereite,

*m der tavelen muosen hundert sîn, die man dô truoc zuo der tür dâ her în. man saste ieglîche schiere vür werder ritter viere. tischlach var nâch wîze wurden drûf geleit mit vlîze. der wirt dô selbe wazzer nam, der was an hôhem muote lam. mit ime twuoc sich Parcifal. eine sîdîne twehel wol gemâl, die bôt eines grâven sun dar nâch, dem was ze kniene gâch. wâ dô der tavelen keiniu stuont, dâ tet man vier knaben kunt, daz si ir dienstes niht vergæzen den, die dâr abe sæzen. zwêne knieten und sniten. die andern zwêne niht vermiten, si trüegen trinken und ezzen dar, und nâmen ir mit dienste war. Hœret mê von rîcheit sagen: vier karrâschen muosen tragen manic tiure goltvaz ieglîchem ritter, der dâ saz. man zôch si zen vier wenden. vier ritter mit ir henden mans ûf die tavelen setzen sach. ieglîchem gienc ein schrîber nâch, der sich dar zuo arbeite und si wider ûf bereite,

*G der tavelen muosen hundert sîn, die man dâ truoc zer tür her în. man sazte ieslîche schiere vür werder rîter viere. tischlachen var nâch wîze wurden drûf geleit mit vlîze. der wirt dô selbe wazzer nam, der was an hôhem muote lam. mit im twuoc sich Parzival. ein sîdîn twehel wol gemâl bôt eines grâven sun dar nâch, dem was ze komene vür si gâch. swâ der tavelen deheiniu stuont, dâ tet man vier knappen kunt, daz si ir dienstes niht vergæzen den, die drobe sæzen. zwêne knieten unde sniten. die anderen zwêne niht vermiten, sine trüegen spîse unde trinken dar, unde nâmen ir mit dienste war. hœrt mê von rîcheit sagen: vier karrâschen muosen tragen manic tiure goltvaz ieslîchem rîter, der dâ saz. si zugen ze vier wenden vier rîter mit ir henden. mans ûf die tavelen setzen sach. Ieslîchem gieng ein schrîbære nâch, der sich dar zuo arbeite unde si wider ûf bereite,

*T Der taveln muosen hundert sîn, die man dô truoc zer tür dar în. man sazte ieglîche schiere vür werde rîter viere. tischlachen gevar nâch wîze wurden drûf geleit mit vlîze. Der wirt dô selbe wazzer nam, der was an hôhem muote lam. mit im twuoc sich Parcifal. eine sîdîne twehele wol gemâl, die bôt eines græven sun dar nâch, dem was ze kniwene vür si gâch. Swâ dô der taveln deheiniu stuont, dâ tet man vier knappen kunt, daz sir dienstes niht vergæzen den, die drobe sæzen. Zwêne knieten unde sniten. die andern zwêne niht vermiten, sine trüegen trinken unde ezzen dar, unde nâmen ir mit dienste war. Nû hœret mê von rîcheit sagen: vier karratschen muosen tragen manec tiure goltvaz ieclîchem rîter, der dâ saz. man zôch si zen vier wenden. vier rîter mit ir henden man sûf die taveln setzen sach. ieglîchem gienc ein schrîbære nâch, der sich dar zuo arbeite unde si wider ûf bereite,