*D rîchiu kleider dar getragen; diu leit er an. alsus hôrt ich sagen, daz diu tiwer wæren. anker, die swæren, von arabischem golde wâren drûfe, als er wolde. Dô saz der minnen geltes lôn ûf ein ors, daz ein Babylon gein im durch tjostieren reit; den stach er drabe. daz was dem leit. ob sîn wirt iht mit im var? er unt sîne rîter gar. jâ deiswâr, si sint es vrô. si riten mit ein ander dô unt erbeizten vor dem palas, dâ manec rîter ûf was. die muosen wol gekleidet sîn. sîniu kinder liefen vor im în, Ie zwei ein ander an der hant. ir hêrre manege vrouwen vant, gekleidet wünneclîche. der küneginne rîche ir ougen vuogten hôhen pîn, dô si gesach den Anschevin. der was minneclîche gevar, daz er entslôz ir herze gar, ez wære ir liep oder leit; daz beslôz dâ vor ir wîpheit. ein wênec si gein im dô trat, ir gast si sich küssen bat.

*m rîchiu kleider dar getragen; diu leit er an. sunst hôrt ich sagen, daz diu tiure wæren. anker, die swæren, von arabischem golde wâren dâr ûf, als er wolde. Dô saz der minnen geltes lôn ûf einem ros, daz ein Babilon gegen ime justieren reit; den stach er dâr abe. daz was im leit. ob sîn wirt mit ime iht var? er und sîne ritter gar. jâ des zwâr, si sint es vrô. si riten mit ein ander dô und erbeizeten vor dem palas, dâ menic ritter ûf was, die wol gekleidet muosen sîn. sîniu kinder liefen vor im hin în, ie zwei ein ander mit der hant. ir hêrre manige vrowen vant, bekleidet wünneclîche. der küniginne rîche ir ougen suochten hôhe pîn, dô si ie sach den Anschevin. der was sô minneclîch gevar, daz er entslôz ir herze gar, ez wære ir liep oder leit; daz verslôz dâ vor ir wîpheit. ein wênic si gegen ime dô trat, ir gast si sich dô küssen bat.

*G rîchiu kleider dar getragen; diu leit er an. sus hôrt ich sagen, daz diu tiure wæren. anker, die swæren, von arabeschem golde lâgen drûfe, als er wolde. dô saz der minnen geltes lôn Ûf ein ors, daz ein Babilon gein im durch tjostieren reit; den stach er drab. daz was dem leit. op sîn wirt mit im iht var? jâ er und sîne rîter gar, die wârens al gelîche vrô. si riten mit ein ander dô unde erbeizten vor dem palas, dâ manic rîter ûffe was. die muosen wol gekleidet sîn. sîniu kinder liefen vor im în, ie zwei ein ander an der hant. ir hêrre manige vrouwen vant, gekleidet wünniclîche. der küniginne rîche ir ougen vuogeten grôzen pîn, dô si gesach den Anschevin. der was sô minniclîch gevar, daz er entslôz ir herze gar, ez wære ir liep oder leit; daz beslôz dâ vor ir wîpheit. ein wênic sim engegene trat, ir gast si sich küssen bat

*T rîchiu kleider dar getragen; diu leit er an. sus hôrt ich sagen, daz diu rîche wæren. anker, die swæren, von arabischem golde lâgen drûfe, als er wolde. dô saz der minnegeltes lôn ûf ein ors, daz ein Babylon gegen im durch tjostieren reit; den stach er drabe. daz was dem leit. Ob sîn wirt mit im iht var? er und sîne rîter gar. Jâ deiswâr, si sint es vrô. si riten mit ein ander dô und erbeizten vor dem palas, dâ manec vrouwe ûffe was. si muosen wol gekleidet sîn. Sîniu kinder liefen vor im în, ie zwei ein ander an der hant. ir hêrre manege vrouwen vant, gekleidet wünneclîche. Der küneginne rîche vuogten ir ougen grôzen pîn, dô si gesach den Anschevin. der was sô minneclîche var, daz er entslôz ir herze gar, ez wære ir liep oder leit; daz beslôz dâ vor ir wîpheit. Ein wênic si nâher gegen im gienc, vil minneclîchen sin enpfienc