*D Ein wazzer iesch der junge man. er twuoc den râm von im sân undern ougen unt an handen. alt unt junge wânden, daz von im ander tag erschin. sus saz der minneclîche win gar vor allem tadel vrî. mit pfelle von Arabi man truog im einen mantel dar. den legt an sich der wol gevar mit offener snüere. ez was im ein lobes gevüere. Dô sprach der kamerære kluoc: "Repanse de schoye in truoc, mîn vrouwe, diu künegîn. ab ir sol er iu gelihen sîn, wan iu ist niht kleider noch gesniten. Jâ mohte ich sis mit êren biten, wande ir sît ein werder man, ob ichz geprüevet rehte hân." "Got lôn iu, hêrre, daz irs jeht. ob ir mich ze rehte speht, sô hât mîn lîp gelücke erholt. diu gotes kraft gît sölhen solt." Man schancte im unt pflac sîn sô, die trûrigen wâren mit im al vrô. man bôt im wirde unt êre, wan dâ was râtes mêre, denne er ze Pelrapeire vant, die dô von kumber schiet sîn hant.

*m Ein wazzer iesch der junge man. er truoc den râm von im sân under den ougen und handen. alte und junge wânden, daz von ime ander tac schine. sus saz der minneclîche wine gar vor allem zadel vrî. mit pfelle von Arabi truoc man einen mantel dar. den leit an sich der wolgevar mit offener snüere. ez was ime ein lobes gevüere. dô sprach der kamerære kluoc: "Repanse de schoye in truoc, mîn vrouwe, diu künigîn. ab ir sol er iu gelihen sîn, wanne iu ist niht kleider sô gesniten. jâ möht ir sis mit êren biten, wanne ir sît ein werder man. ouch ichz gebrüefet rehte hân." "got lône iu, hêrre, daz irs jeht. ob ir mich ze rehte speht, sô hât mîn lîp gelücke erholt. diu gotes kraft gît solhen solt." Man schancte ime und pflac sîn sô, die trûrigen wâren mit ime vrô. man bôt ime wird und êre, wan dâ was râtes mêre, danne er ze Pelraperie vant, dô die von kumber schiet sîn hant.

*G ein wazzer iesch der junge man. er twuoc den râm von im sân under den ougen unde an den handen. alte unde junge wânden, daz von im ein ander tag erschine. dô saz der minniclîche wine gar vor allem tadel vrî. mit pfelle von Arabi man brâht im einen mandel dar. den leit an sich der wolgevar mit offener snüere. daz was ein lobes gevüere. dô sprach der kamerære kluoc: "Urrepanse de schoye in truoc, mîn vrouwe, diu künigîn. aber sol er iu gelihen sîn, iu sint niht kleider noch gesniten. ouch möhtet ir ez vil gerne biten, wande ir sît ouch ein werder man, ob ichz rehte brüeven kan." "got lôn iu, hêrre, sît ir mirs jehet. ob ir mich ze rehte spehet, sô hât mîn lîp gelücke erholt. diu gotes kraft gît solhen solt." man schancte im unde pflac sîn sô, die trûrigen wâren mit im vrô. man bôt im wird und êre, wan dâ was râtes mêre, dan er ze Pelrapeire vant, die dâ von kumber schiet sîn hant.

*T Ein wazzer iesch der junge man. er twuoc den râm von im sân undern ougen unde abe den handen. alt unde junge wânden, daz der ander tac von im schine. sus saz der minneclîche wine gar vor allem zâdel vrî. pfelle von Arabi brâhte man im - einen mantel - dar. den leite an sich der wol gevar mit offener snüere. daz was im ein lobes gevüere. Dô sprach der kamerære kluoc: "Repanse de joie in truoc, mîn vrouwe, diu künegîn. aber sol er iu gelihen sîn, iu ist niht kleider noch gesniten. ouch moht ich sis mit êren biten; ir dunket mich ein werder man, ob ichz geprüeven rehte kan." "Iuwer gnâde, hêrre, daz irz jeht, ob ir mich ze rehte speht." Man schancte im unde pflac sîn sô, die trûrigen wâren mit im vrô. si buten im wirde unde êre, wan dâ was râtes mêre, danner ze Peilrapere vant, die von kumber schiet sîn hant.