*D Daz Brobarzære vrouwen lîp mit ir hulden wære mîn wîp, sô daz ich si umbevienge, swie ez mir dar nâch ergienge. ir minne ist leider verre dem künege von Iserterre. mîn lant untz volc ze Brandigan müezens immer jâmer hân. mînes vetern sun, Mabonagrin, leit ouch dâ ze langen pîn. Nû bin ich, künec Artus, her geriten in dîn hûs, betwungen von ritters hant. dû weist wol, daz in mîn lant dir manec laster ist getân. des vergiz nû, werder man. die wîle ich hie gevangen sî, lâz mich sölhes hazzes vrî. Mich sol vrou Cunneware ouch scheiden von dem vâre, diu mîne sicherheit enpfienc, dô ich gewâpent vür si gienc." Artuses vil getriwer munt verkôs die schulde sân zestunt. Dô vriesch wîb unt man, daz der künec von Brandigan was geriten ûf den rinc. nû dar nâher, dringâ drinc! schiere wart daz mære breit. mit zühten iesch gesellecheit

*m daz Brobarzere vrouwen lîp mit ir hulden wære mîn wîp, sô daz ich si umbevienge, wie ez mir dar nâch gienge. ir minne ist leider verre dem künic von Iserterre. mîn lant und daz volc ze Brandigan müezens iemer jâmer hân. mînes veteren sun, Mobonagrin, leit ouch dâ ze langen pîn. nû bin ich, künic Artus, her geriten in diz hûs, betwungen von ritters hant. dû weist vil wol, daz in mîn lant dir manic laster ist getân. des vergiz nû, vil werder man. die wîle ich hie gevangen sî, lâz mich solhes hazzes vrî. mich sol vrouwe Cunneware ouch scheiden von dem vâre, diu mîne sicherheit enpfienc, dô ich gevangen vür si gienc." Artuses getriuwelîcher munt verkôs die schulde sân zestunt. Dô vriesch dâ wîp und man: der künic von Brandigan was geriten ûf den rinc. nû dar nâher, dringâ drinc! schiere wart daz mære breit. mit zühten iesch gesellecheit

*G daz Briubarz der vrouwen lîp mit ir hulden wære mîn wîp, sô daz ich si umbevienge, swiez mir dar nâch ergienge. ir minne ist leider verre dem künige von Yserterre. mîn lant unt daz volc ze Brandigan müezens imer jâmeric stân. mînes veteren sun, Mobonagrin, leit ouch dâ ze lange pîn. nû bin ich, künic Artus, her geriten in dîn hûs, betwungen von rîters hant. dû weist wol, daz in mîn lant dir manic laster ist getân. des vergiz nû, werder man. die wîle ich hie gevangen sî, lâ mich solhes hazzes vrî. mich sol vrô Kuneware scheiden von dem vâre, diu mîne sicherheit enpfie, dô ich gevangen vür si gie." Artuses vil getriwer munt verkôs die schulde sân zestunt. dô vriesch wîp unde man, daz der künic von Brandigan was geriten in den rinc. Nû dar nâher, dringâ drinc! vil schiere wart daz mære breit. mit zuht iesch gesellicheit

*T daz ze Breharz der vrouwen lîp mit ir hulden wære mîn wîp, sô daz ich si umbevienge, swiez mir dar nâch ergienge. ir minne ist leider verre dem künege von Isenterre. mîn lant unde daz volc ze Brandigan müezens iemer jâmer hân. mînes vetern sun, Mobonagrin, leit ouch dâ ze langen pîn. Nû bin ich, künec Artus, her geriten in dîn hûs, betwungen von rîters hant. ich weiz wol, dir mîn lant grôz laster hât getân. des vergiz nû, werder man. die wîle ich hie gevangen sî, lâ mich solhes hazzes vrî. mich sol vrou Cunneware ouch scheiden von dem vâre, diu mîne sicherheit enpfie, dô ich gevangen vür si gie." Artuses vil getriuwer munt verkôs die schulde sân zestunt. Dô vriesch wîp unde man, daz der künec von Brandigan wære geriten in den rinc. nû dar nâher, dringâ drinc! schiere wart daz mære breit. mit zühten iesch gesellecheit