*D dâ heime in mîn selbes hûs, dâ wirt gevreut vil selten mûs, wan diu müese ir spîse steln. die dorfte niemen vor mir heln. ine vinde ir offenlîche niht. al ze dicke daz geschiht mir, Wolfram von Eschenbach, daz ich dolte al solch gemach. Mîner klage ist vil vernomen. nû sol diz mære wider komen, wie Pelrapeire stuont jâmers vol. dâ gap diu diet von vreuden zol. die helde triwen rîche lebten kumberlîche. ir wâriu manheit daz gebôt. nû lât erbarmen iuch ir nôt! Nû hœret mêre von den armen, die solten iuch erbarmen. si enpfiengen schemlîche ir gast ellens rîche. der dûhtes anders wol sô wert, daz er niht dorfte hân gegert ir herberge, als ez in stuont. ir grôziu nôt was im unkunt. Man leite einen teppech ûfez gras, dâ vermûret und geleitet was durch den schaten ein linde. dô entwâpent inz gesinde.

*m dâ heime in mîn selbes hûs, dâ wirt gevröuwet selten mûs, wan diu müese ir spîse steln. die dorfte niemen vor mir heln. ich envinde ir offenlîche niht. al ze dicke daz geschiht mir, Wolframe von Eschenbach, daz ich dulte al solich gemach. mîner klage ist ze vil vernomen. nû sol diz mære wider komen, wie Pelraperie stuont jâmers vol. dâ gap diu diet von vröuden zol. die helde triuwen rîche lebeten kumberlîche. ir wâriu manheit daz gebôt. des solte erbarmen iuch ir nôt. nû hœret mê von den armen, die solten iuch erbarmen. si enpfiengen schamelîche ir gast ellens rîche. der dûhte sanders wol sô wert, daz er niht dorfte hân gegert ir herberge, als ez in dô stuont. ir grôziu nôt was ime unkunt. man leit ein teppich ûf daz gras, dâ vermûret und †geleistet† was durch den schaten ein linde. dô entwâpent in daz gesinde.

*G dâ heime in mîn selbes hûs, dâ wirt gevröut vil selten mûs, wan diu müese ir spîse stelen. sine dorfte niemen vor mir helen. ich vinde ir offenlîchen niht. al ze dicke daz geschiht mir, Wolfram von Eschenbach, daz ich dulte solch gemach. mîner klage ist vil vernomen. nû sol diz mære wider komen, wie Pelrapeire stuont jâmers vol. dâ gap diu diet von vröuden zol. die helde jâmers rîche lebten kumberlîche. ir wâriu manheit daz gebôt. nû solde erbarmen iuch ir nôt. ir lîp ist nû benennet pfant, sine lœse drûz diu hœheste hant. hœret mêre von den armen, die solten iuch erbarmen. si enpfiengen schamlîche ir gast ellenes rîche. er dûhte si anders wol sô wert, daz er niht dorfte hân gegert ir herberge, als ez im stuont. ir grôziu nôt was im unkuont. man leit einen tepch ûf dez gras, dâ vermûret unde geleit was durch den schate ein linde. dô entwâpent inz gesinde.

*T dâ heime in mîn selbes hûs, dâ wirt gevröut vil selten mûs, wan si müese ir spîse steln. dien dorfte niemen vor mir heln. ine vindir offenlîche niht. alze dicke daz geschiht mir, Wolframe von Eschebach, daz ich dulte solich gemach. Mîner klage ist vil vernomen. nû lât daz mære wider komen, wie Peilrapere stuont jâmers vol. dâ gap diu diet vröuden zol. die helde triuwen rîche lebeten kumberlîche. ir wâre manheit daz gebôt. nû solte erbarmen iuch die nôt. ir lîp muoz sîn benennet pfant, sine lœse drûz diu hœheste hant. Nû hœret mê von den armen. si solten iuch erbarmen. si enpfiengen schemelîche den gast ellens rîche. der dûhte si anders wol sô wert, daz er niht dorfte hân gegert ir herberge, alsez in stuont. ir grôze nôt was im unkunt. Man leite ein teppich ûf daz gras, dâ vermûret unde geleitet was durch schate ein linde. dâ entwâpentin daz gesinde.