*D daz gît gelücke und hôhen muot, ob si kiusche ist unt guot. Dû solt ouch wizzen, sun mîn, der stolze, küene Læhelin dînen vürsten ab ervaht zwei lant, die solten dienen dîner hant, Waleis und Norgals. ein dîn vürste, Turkentals, den tôt von sîner hende enpfienc. dîn volc er sluoc unt vienc." "diz rich ich, muoter, ruochtes got. in verwundet noch mîn gabylôt." Des morgens, dô der tac erschein, der knappe balde wart ein, im was gegen Artuse gâch. vrou Herzeloyde in kuste unt lief im nâch. der werlde riwe al geschach. dô si ir sun niht langer sach - der reit enwec, wem ist deste baz? -, dâ viel diu vrouwe valsches laz ûf die erde, al dâ si jâmer sneit, sô daz si ein sterben niht vermeit. ir vil getriulîcher tôt der vrouwen wert die hellenôt. Ôwol si, daz si muoter wart! sus vuor die lônes bernde vart ein wurzel der güete unt ein stam der diemüete. owê, daz wir nû niht enhân ir sippe unz an den elften spân!

*m daz gît gelücke und hôhen muot, ob si kiusche ist und guot. dû solt ouch wizzen, sun mîn, der stolze, schœne Lehelin dînen vürsten abe ervaht zwei lant, die solten dienen dîner hant, Waleis und Norgals. ein dîn vürste, Tarkentals, den tôt von sîner hende enpfienc. dîn volc er sluoc und vienc." "daz riche ich, muoter, ruoches got. in verwundet noch mîn gabilôt." Des morgens, dô der tac erschein, der knappe balde wart enein, im was gegen Artuse gâch. diu vrouwe in kuste und lief im nâch. der werden aldâ geschach, dô si ir sun niht langer sach - der rîtet enwec, wem ist deste baz? -, dâ viel diu vrouwe valsches laz ûf die erde, aldâ si jâmer sneit, sô daz si ein sterben niht vermeit. ir vil getriuweclîcher tôt der vrouwen wert die hellenôt. ôwol, daz si ie muoter wart! sus vuor die lônes berende vart ein wurzel der güete und ein stam der diemüete. owê, daz wir nû niht hân ir sippe, und an den zwelften spân

*G daz gît gelücke und hôhen muot, op si kiusche ist und guot. dû solt ouch wizzen, sun mîn, daz der stolze Lehelin dînen vürsten abe ervaht zwei lant. diu solten dienen dîner hant, Waleis und Nurgals. ein dîn vürste, Turkentals, den tôt von sîner hende enpfienc. dîn volc er sluoc und vienc." "Daz riche ich, muoter, wilz got. in verwundet noch mîn gabilôt." des morgens, dô der tac erschein, der knappe wart vil balde enein, im was gein Artuse gâch. diu küniginne lief im nâch. der werlde riwe al hie geschach. dô si ir sun niht mêre sach - der vert von ir, wem ist deste baz? -, dô viel diu vrouwe valsches laz ûf die erde, al dâ si jâmer sneit, sô daz si ein sterben niht vermeit. ir vil getriulîcher tôt der vrouwen wert die hellenôt. ôwol si, daz si ie muoter wart! sus vuor die lônes bernden vart ein wurzel der güete, ein stam der diemüete. owê, daz wir nû niht enhân ir sippe unze an den einliften spân!

*T daz gît dir glücke und hôhen muot, ob si kiusche ist und guot. dû solt wizzen, sun mîn, daz der küene Lehelin dînen vürsten ab ervaht zwei lant, die solten dienen dîner hant, Waleis und Norgals. ein dîn vürste, Turkentals, den tôt von sîner hant enpfienc. dîn volc er sluoc und vienc." "daz rich ich, muoter, ruochet ez got. in verwundet noch mîn gabilôt." Eines morgens, dô der tac erschein, der knappe wart vil balde enein, im was gein Artuse gâch. vrou Herzeloyde in kust und lief im nâch. der werlde riuwe al hie geschach. dô si ir suns niht mêre sach - der vert von ir, wem ist deste baz? -, dô viel diu vrouwe valsches laz ûf die erde, al dâ si jâmer sneit, sô daz ein sterben niht vermeit. ir vil getriuwelîcher tôt der vrouwen wert die hellenôt. ôwol ir, daz si muoter wart! sus vuor die lônes bernde vart ein wurzel der güete und ein stam der diemüete. owê, daz wir nû niht hân ir sippe unz an den einliften spân!