*D beide ir gebære unt ir site. swelhem wîbe volget kiusche mite, der lobes kempfe wil ich sîn. mir ist von herzen leit ir pîn. Ein lop hinket ame spat, swer allen vrouwen sprichet mat durch sîn eines vrouwen. swelhiu mîn reht wil schouwen, beidiu sehen und hœren, diene sol ich niht betœren. schildes ambet ist mîn art. swâ mîn ellen sî gespart, swelhiu mich minnet umbe sanc, sô dunket mich ir witze kranc. Ob ich guotes wîbes minne ger, mag ich mit schilde unt ouch mit sper verdienen niht ir minne solt, al dar nâch sî si mir holt. vil hôhes topels er doch spilt, der an ritterschaft nâch minnen zilt. Hetenz wîp niht vür ein smeichen, ich solt iu vürbaz reichen an disem mære unkundiu wort. ich spreche iu dâventiure vort. Swer des von mir geruoche, der enzel si ze keinem buoche. ine kan decheinen buochstap. dâ nement genuoge ir urhap. disiu âventiure vert âne der buoche stiure.

*m beide ir gebærde und ir site. welchem lîbe volget kiusche mite, der lobes kempfe wil ich sîn. mir ist von herzen leit ir pîn. Sîn lop hinket an eime spat, wer allen vrouwen sprichet mat durch sîn eine vrouwen. welichiu mîn reht wil schouwen, bêdiu sehen und hœren, die ensol ich niht betœren. schiltes ambet ist mîn art. wâ mîn ellen sîn gespart, welichiu mich minnet umb gesanc, sô dunket mich ir witze kranc. ob ich guotes wîbes minne ger, mac ich mit schilte und mit sper verdienen niht ir minne solt, al dar nâch sî si mir holt. vil hôhes toppels er doch spilt, der an ritterschaft nâch minnen zilt. hetenz wîp niht vür ein smêhen, ich solte iu vil baz †reiten† an disem mære unkundiu wort. ich sprich iu die âventiure vort. wer des von mir geruoche, der enzel sich zuo keinem buoche. ine kan dekeinen buochstap. dâ nement genuoge ir urhap. disiu âventiure vert ân der buoche stiure.

*G beidiu ir gebærde und ir site. swelhem wîbe volget kiusche mite, der lobes kempfe wil ich sîn. mir ist von herzen leit ir pîn. sîn lop hinket ame spat, der allen wîben sprichet mat durch sîn eines vrouwen. swelhiu mîn reht wil schouwen, beidiu sehen und hœren, die wil ich niht betœren. schiltes ambet ist mîn art. swâ mîn ellen sî gespart, swelhiu mich minnet umbe sanc, diu dûchet mich ir witze kranc. Obe ich werdes wîbes minne ger, muge ich mit schilt und mit sper verdienen niht ir minnen solt, al dar nâch sî si mir holt. vil hôhes topeles er doch spilt, der mit rîterschaft nâch minnen zilt. hetenz diu wîp niht vür ein smeichen, ich wolt vürbaz reichen an disem mære unkundiu wort, ich spræche die âventiure vort. swer des von mir geruoche, der zel si ze deheinem buoche, wan ich kan deheinen buochstap. dâ nement genuoge ir urhap. disiu âventiure vert âne der buoche stiure.

*T beidir gebærde und ir site. welchem wîbe volget kiusche mite, der lobes kempfe wil ich sîn. mir ist von herzen leit ir pîn. Sîn lop hinket anme spat, wer allen vrouwen sprichet mat durch sîn einege vrouwen. welchiu mîn reht wil schouwen, beidiu sehen und hœren, dien wil ich niht betœren. schiltes ambet ist mîn art. wâ mîn ellen sî gespart, welhiu mich minnet umb sanc, diu dunket mich ir minne kranc. ob ich werdes wîbes minne ger, muge ich mit schilte und mit sper verdienen niht ir minnen solt, al dar nâch sô sî si mir holt. vil hôhes topels er doch spilt, wer mit ritterschaft nâch minnen zilt. hetenz diu wîp niht vür ein smeichen, ich wolte vürbaz reichen an dise mære unkundiu wort. ich spreche iu dise âventiure vort. wer des von mir geruoche, dern zels zuo dekeime buoche, wan ich enkan dekeinen buochstap. dâ nement genuoge ir urhap. disiu âventiure vert âne der büecher stiure.