*D Dô sprach der junge Anschevin: "got trôste iuch, vrowe, des vater mîn. den suln wir beidiu gerne klagen. iu enmac nieman von mir gesagen deheiniu klagelîchiu leit. ich var durch mîne werdecheit nâch ritterschaft in vremdiu lant. vrowe, ez ist sus bewant." Dô sprach diu küneginne: "sît dû nâch hôher minne wendest dienest und muot, lieber sun, lâ dir mîn guot ûf die vart niht versmâhen. heiz von mir enpfâhen dîne kamerære vier soumschrîn swære; dâ ligent inne pfelle breit, ganze, die man nie versneit, und manec tiwer samît. süezer man, lâ mich die zît hœren, wenne dû wider kumest; an mînen vröuden dû mir vrumest." "Vrowe, des enweiz ich niht, in welhem lande man mich siht. wan swar ich von iu kêre, ir habt nâch ritters êre iwer werdecheit an mir getân. ouch hât mich der künic lân, als im mîn dienest danken sol. ich getrûwe iu des vil wol,

*m dô sprach der junge Anschevin: "got trôste iuch, vrowe, des vater mîn. den sullen wir beidiu gerne klagen. nû mac von mir niemen gesagen keiniu klegelîchiu leit. ich vare durch mîne wirdicheit nâch ritterschaft in vrömdiu lant. vrowe, alsô ist ez mir gewant." Dô sprach diu küniginne: "sît dû von hôher minne wendest dienst und muot, lieber sun, lâ dir mîn guot ûf die vart niht versmâhen. heiz von mir enpfâhen dînen kamerære vier soumschrîn swære; dâ ligent inne pfeller breit, ganz, die man nie sneit, und menic tiure samît. süezer man, lâ mich die zît gehœren, wenne dû wider kumest; an mînen vröuden dû mir vrumest." "vrowe, des enweiz ich niht, in welichen landen man mich siht. wenne zwâr ich von iu kêre, ir habt nâch ritters êre iuwer wirdicheit an mir getân. ouch het mich der künic lân, als im mîn dienest danken sol. ich getriuwe iu des vil wol,

*G Dô sprach der junge Anschevin: "got trôste iuch, vrouwe, des vater mîn. den sulen wir beidiu gerne klagen. iune mac niemen niht gesagen von mir dehein klegelîch leit. ich var durch mîne werdicheit durch rîterschaft in vrömdiu lant. vrouwe, ez ist mir sus gewant." dô sprach diu küniginne: "sît dû nâch hôher minne wendest dienst und muot, lieber sun, lâ dir mîn guot ûf die vart niht versmâhen. heiz von mir enpfâhen dîne kamerære vier soumschrîn swære; dâr inne ligent pfelle breit, ganz, die man nie versneit, unde manic tiure samît. süezer man, lâ mich die zît hœren, wenne dû wider kumest; an mînen vröuden dû mir vrumest." "vrouwe, desne weiz ich niht, in welhem lande man mich siht. wan swar ich von iu kêre, ir habet nâch rîters êre iwer werdicheit an mir begân. ouch hât mich der künic lân, als im mîn dienst danken sol. ouch wil ich iu getriuwen wol,

*T Dô sprach der junge Anschevin: "got trôste iuch des vater mîn. den sul wir gerne beidiu tragen. iune mac nieman von mir gesagen deheiniu klagelîchen leit. ich var durch mîne werdecheit nâch rîterschefte in vremdiu lant. vrouwe, ez ist mir sus gewant." Dô sprach diu küneginne: "sît dû nâch hôher minne wendest dienst und muot, lieber sun, lâ dir mîn guot ûf die vart niht versmâhen. heiz von mir enpfâhen dînen kamerære vier soumschrîne swære; dâr inne ligent pfelle breit, ganze, die man nie versneit, und manec tiure samît. süezer man, lâ mich die zît hœren, daz dû wider komest; an mînen vröuden dû mir vromest." "Vrouwe, des enweiz ich niht, in welhem lande man mich siht. wan swar ich von iu kêre, ir habt nâch rîters êre iuwer werdecheit an mir getân. ouch hât mich der künec gelân, als ims mîn dienst danken sol. deswâr, ich getriuwe wol,