*D teilte Gahmuretes hant unt ouch swaz er dâ vürsten vant. lât si rîten, swer dâ geste sîn! den gap urloup der Anschevin. Daz pantel, daz sîn vater truoc, von zobele ûf sînen schilt man sluoc. al kleine, wîz, sîdîn ein hemde der künegîn, als ez ruorte ir blôzer lîp, diu nû worden was sîn wîp, daz was sînes halsberges dach. ahzeheniu man durchstochen sach unt mit swerten gar zerhouwen, ê er schied von der vrouwen. daz leit ouch si an blôze hût, sô von ritterschaft kom ir trût, der manegen schilt vil dürkel stach. ir zweier minne man triwen jach. Er hete werdecheit genuoc, dô in sîn manlîch ellen truoc hin über gein der herte. mich jâmert sîner verte. im kom diu wâre botschaft, sîn hêrre, der bâruc, wære mit kraft überriten von dem Babylon. einer hiez Ipomidon, der ander Pompeius. den nennet diu âventiure alsus.

*m teilte Gahmuretes hant und ouch waz er dâ vürsten vant. Lât rîten, wer dâ geste sîn! den gap urloup der Anschevin. daz pantel, daz sîn vater truoc, von zobele ûf sînem schilte man sluoc. al klein, wîz, sîdîn ein hemede der künigîn, als ez ruorte ir blôzen lîp, diu nû was worden sîn wîp, daz was sînes halsberges dach. ahzeheniu man durchstochen sach und mit swerten gar zerhouwen, ê daz er scheide von sîner vrouwen. daz leite ouch si an blôze hût, sô kam von ritterschaft ir trût, der manigen schilt vil durchstach. ir zweier minne triuwen jach. Er hete wirdicheit genuoc, dô in sîn manlîch ellen truoc hin über gegen der herte. mich jâmert sîner verte. im kom ê diu wâre botschaft, sîn hêrre, der bâruc, wære mit kraft überriten von den Babilon. einer hiez Ypomedon, der ander Pompeius. den nennet diu âventiure alsus.

*G teilte Gahmuretes hant unde swaz er dâ vürsten vant. dâ wart daz varnde volc vil geil. die enpfiengen rîcher gâbe teil. Lât rîten, die dâ geste sîn! den gap urloup der Anschevin. daz pantel, daz sîn vater truoc, von zobele ûf sînen schilt manz sluoc. al kleine, wîz, sîdîn ein hemde der künigîn, als ez ruorte ir blôzen lîp, diu nû worden was sîn wîp, daz was sînes halsberges dach. ahzeheniu man er durchstochen sach unde mit swerten gar zerhouwen, ê er schiede von der vrouwen. daz leite si an ir blôze hût, sô kom von rîterschaft ir trût, der manigen schilt vil dürkel stach. ir zweier minne triwen jach. er hete werdicheit genuoc, dô in sîn manlîch ellen truoc hin über gein der herte. mich jâmert sîner verte. im kom ein wâriu botschaft, sîn hêrre, der bâruc, wære mit kraft überriten von Babilon. einer hiez Ipomidon, der ander Ponpeirus. den nennet diu âventiure sus.

*T teilte Gahmuretes hant und waz er dâ vürsten vant. dâ wart daz varnde volc vil geil. si entviengen rîcher gâbe teil. lât si rîten, die dâ geste sîn! den gap urloup der Anschevin. ein pantel, daz sîn vater truoc, von zobele ûf sînen schilt man sluoc. al kleine, wîz, sîdîn ein hemede der künegîn, als ez ruorte ir blôzen lîp, diu nû worden was sîn wîp, daz was sînes halsberges dach. ahzehen man durchstochen sach und mit swerten gar verhouwen, ê er scheide von der vrouwen. daz leit si an ir blôze hût, sô kom von ritterschaft ir trût, der manegen schilt vil dürkel stach. ir zweier minne triuwe jach. Er hete wirdecheit genuoc, dô in sîn manlîch ellen truoc hin über gein der herte. mich jâmert sîner verte. im kom diu wâre botschaft, sîn hêrre, der bâruc, mit kraft wære überriten von den von Babilon. einer hiez Ihpomidon, der ander Pompeius. den nemmet diu âventiure sus.