*D ich wære des trûric oder geil, mich behabt hie rîters urteil. vart wider, sagt ir dienest mîn. ich sul iedoch ir ritter sîn. ob mir alle krône wæren bereit, ich hân nâch ir mîn hœhste leit.« Er bôt in sîne grôze habe. sîner gebe tâten si sich abe. die boten vuoren ze lande gar ân ir vrouwen schande. sine gerten urloubes niht, als lîhte in zorne noch geschiht. ir knappen - vürsten, disiu kint - wâren von weinen vil nâch blint. Die den schilt verkêrt dâ hânt getragen, den begunde ir vriwent ze velde sagen: »vrou Herzeloyde, diu künegîn, diu hât behabt den Anschevin.« »wer was von Anschouwe dâ? unser hêrre ist leider anderswâ, durch rîters prîs zen Sarrazin. daz ist nû unser hœhster pîn.« »Der hie den prîs hât bezalt unt sô manegen ritter ab gevalt unt der sô stach und sluoc unt der den tiwern anker truoc ûf dem helme lieht gesteinet, daz ist, den ir dâ meinet. Mir sagt der künec Kaylet, der Anschevin wære Gahmuret.

*m ich wære des trûric oder geil, mich behabet hie ritters urteil. vart wider, saget ir dienest mîn. ich sulle iedoch ir ritter sîn. ob mir alle krône wæren bereit, ich hân nâch ir mîn hœheste leit.« er bôt in sîne grôze habe. sîner gâben tâten si sich abe. die boten vuoren ze lande gar âne ir vrouwen schande. sine gerten urloubes niht, als lîhte in zorne noch geschiht. ir knebelîn, der vürsten kint, wâren von weinen vil nâch blint. Die den schilt verkêret hânt getragen, den begunde man ze velde sagen: »vrouwe Herczeloide, diu künigîn, hât behabet den Anschevin.« »wer was von Anschouwe dâ? unser hêrre ist leider anderswâ, durch ritters prîs zen Sarrazin. daz ist nû unser hœhester pîn.« »der hie den prîs hât bezalt und sô manigen ritter hât ab gevalt und der sô stach oder sluoc und der tiuren anker truoc ûf dem helm lieht gesteinet, daz ist, den ir dâ meinet. mir sagete der künic Kailet, der Anschevin wære Gahmuret.

*G ich werdes trûrec oder geil, mich behabt hie rîters urteil. vart wider, saget ir dienst mîn. ich sol iedoch ir rîter sîn. Obe mir alle krône wæren bereit, ich hân nâch ir mîn hœhest leit.« er bôt in sîne grôze habe. sîner gâbe tâten si sich abe. die boten vuoren ze lande gar âne ir vrouwen schande. sine gerten urloubes niht, als dicke in zorne noch geschiht. ir knappen - vürsten, disiu kint - wâren von weinen vil nâch blint. die den schilt verkêrt hânt getragen, den begunde ir vriunt ze velde sagen: »vrô Herzeloide, diu künigîn, hât behabet den Anschevin.« »wer was von Anschouwe dâ? unser hêrre ist leider anderswâ, durch rîters prîs ze Sarrazin. daz ist nû unser hœhester pîn.« »der dâ den prîs hât bezalt unde manigen rîter abe gevalt, der sô stach unt der sô sluoc unt der den tiweren anker truoc ûf dem helme lieht gesteinet, daz ist, den ir dâ meinet. uns saget der künic Kailet, der Anschevin wære Gahmuret,

*T ich werdes trûric oder geil, ich behabete ie ritters urteil. vart wider und saget ir den dienst mîn. ich wil iedoch ir ritter sîn. ob mir alle krônen wæren bereit, ich hân nâch ir mîn hœheste leit.« er bôt in sîne grôze habe. sîner gâbe tâten si sich abe. die boten vuoren zuo lande gar âne ir vrouwen schande. si engerten urloubes niht, daz lîhte in zorne noch geschiht. die vürsten - knappen, disiu kint - wâren von weinen vil nâch blint. Die den schilt verkêret hânt getragen, den begunden ir vriunt zuo velde sagen: »vrou Herzeloyde, diu künegîn, hât behabt den Anschevin.« »wê, wer was von Anschouwe dâ? unser hêrre ist leider anderswâ, durch ritters prîs zuo Sarrazin. daz ist noch unser hœheste pîn.« »der dâ den prîs hât bezalt und manegen ritter abe gevalt und der sô stach und sluoc und der den tiuren anker truoc ûf deme helme lieht gesteinet, daz ist, den ir dâ meinet. uns sagete der künec Kaylet, der Anschevin wære Gahmuret,