*D swenne ir denne unbetwungen sît, mîn dienest gelebt noch die zît, daz ir mich zeinem vriwende nemt. ir möht iuch nû wol hân verschemt. swaz halt mir von iu geschiht, mich enslüege doch iwer swester niht.« der rede si lacheten überal. dô wart getrüebet in der schal. Den wirt sîn triwe mente, daz er sich wider sente, wan jâmer ist ein scherpfer gart. ir ieslîcher innen wart, daz sîn lîp mit kumber ranc unt al sîn vrœde was ze kranc. dô zurende sîner muomen sun. er sprach: »dû kanst unvuoge tuon.« »Nein, ich muoz bî riwen sîn. ich sen mich nâch der künegîn. ich liez ze Patelamunt - dâ von mir ist mîn herze wunt - in reiner art ein süeze wîp. ir werdiu kiusche mir den lîp nâch ir minne jâmers mant. si gap mir liute und lant. mich tuot vrô Belakane manlîcher vreuden âne. ez ist doch vil manlîch, swer minnen wankes schamt sich. Der vrouwen huote mich ûf bant, daz ich niht rîterschefte vant.

*m wenne ir denne unbetwungen sît, mîn dienst gelebet noch die zît, daz ir mich zuo einem vriunde nemet. ir möhtet iuch nû wol hân verschemet. waz halt mir von iu geschiht, mich enslüege doch iuwer swester niht.« der rede lacheten si überal. dô wart getrüebet in der schal. den wirt sîn triuwe mente, daz er sich wider sente, wanne jâmer ist ein scharfer gart. ir ieglîcher innen wart, daz sîn lîp mit kumber ranc und alliu sîne vröude was ze kranc. dô zurnde sîner muomen suon. er sprach: »dû kanst unvuoge tuon.« »nein, ich muoz bî riuwe sîn. ich sene mich nâch der künigîn. ich liez ze Patelamunt - dâ von mir ist mîn herze wunt - in reiner art ein süeze wîp. ir werdiu kiusche mir den lîp nâch ir minne jâmers mant. si gap mir liute und lant. mich tuot vrouwe Belakane manlîcher vröuden âne. ez ist doch vil manlîch, wer minne wankes schamet sich. der vrouwen huote mich ûf bant, dô ich niht ritterschafte vant.

*G swenne aber ir unbetwungen sît, sô gelebet mîn dienst wol die zît, daz ir mich ze vriunde nemet. ir möht iuch ê wol hân verschemet. swaz halt mir von iu geschiht, mich slüege doch iwer swester niht.« der rede si lachten über al, doch wart getrüebet in der schal. den wirt sîn triwe mente, daz er sich sêre sente. jâmer ist ein scharfer gart. ir iegelîcher innen wart, daz sîn lîp mit kumber ranc unde al sîn vröude was ze kranc. dô zurnde sîner muomen sun. er sprach: »dû kanst unvuoge tuon.« »nein, ich muoz bî riwen sîn. ich sene mich nâch der künigîn, die ich lie ze Patelamunt. von der ist mîn herze wunt. In reiner art ein süeze wîp, ir werdiu kiusche mînen lîp nâch ir minne jâmers mant. si gap mir liute und lant. mich tuot vrô Belacane manlîcher vröuden âne. ez ist iedoch vil manlîch, swer minnen wankes schamet sich. der vrouwen huote mich ûf bant, daz ich niht rîterschefte vant.

*T swenn aber ir nû ledic sît, sô gelebet mîn dienst noch die zît, daz ir mich zuo vriunde nemet. ir möht in nû wol hân verschemet. waz joch mir von iu geschiht, mich ensluoc doch iuwer swester sun niht.« Der rede lacheten si über al, doch wart getrüebet in der schal. den wirt sîn triuwe mente, daz er sich sêre sente. jâmer ist ein scharpfer gart. ir ieclîcher innen wart, daz sîn lîp mit kumber ranc und al sîn vröude was ze kranc. dô zurnte sîner muomen suon. er sprach: »dû kanst ungevüege tuon.« »nein, ich muoz bî riuwen sîn. ich sene mich nâch der künegîn, die ich liez zuo Patelamunt. von der ist mir mîn herze wunt. in reiner art ein süeze wîp, ir werdiu kiusche mînen lîp nâch ir minne jâmer mant. si gap mir lîp und lant. mich tuot vrô Belacane menlîcher vröuden âne. ez ist iedoch vil menlîch, wer minnen wankes schamet sich. der vrouwen huote mich ûf bant, daz ich niht ritterschefte vant.