*D »Swâ von ich sol die magt hân«, sprach der heiden, »daz wirt gar getân, mit triwen an mir erzeiget.« Der toufnapf wart geneiget ein wênec gein dem Grâle. vol wazzers an dem mâle wart er, ze warm noch ze kalt. dâ stuont ein grâwer priester alt, der ûz heidenschaft manec kindelîn ouch gestôzen hete drîn. Der sprach: »ir sult gelouben, iwerer sêle den tiuvel rouben, an den hœhsten got al eine, des drîvalt ist gemeine unt al gelîche geurbort. got ist mensch unt sînes vater wort, sît er ist vater und kint, die al gelîche geêret sint, ebenhêre sîme geiste; mit der drîer volleiste wert iu diz wazzer heidenschaft. mit der trinitâte kraft Ime wazzer er ze toufe gienc, von dem Adam antlütze enpfienc. von wazzer boume sint gesaft; wazzer viuhtet al die geschaft, der man vür crêatûre giht; mit dem wazzer man gesiht; wazzer gît maneger sêle schîn, daz die engele niht liehter dorften sîn.«

*m »wâ von ich sol die maget hân«, sprach der heiden, »daz wirt getân und mit triuwe an mir erzeiget.« der toufnapf wart geneiget ein wênic gegen dem Grâl. vol wazzers an dem mâl wart er, zuo warm noch zuo kalt. dâ stuont ein grâwer priester alt, der ûz heidenschaft manic kindelîn ouch gestôzen hette dar în. der sprach: »ir solt glouben, iuwer sêle dem tiuvel rouben, an den hœhesten got aleine, des drîvalt ist gemeine und alle glîch geurbort. got ist mensch und sînes vater wort, sît er ist vater und kint, die alle glîch geêret sint, ebenhêr sînem geist; mit der drîer volleist wert iu diz wazzer heidenschaft. mit der trinitât kraft in dem wazzer er zuo touf gienc, von dem Adam antlitz enpfienc. von wazzer boum sint gesaft; wazzer viuhtet alle geschaft, der man zuor crêatûr giht; mit dem wazzer man gesiht; wazzer gît maniger sêle schîn, daz die engel niht wîzer mogen sîn.«

*G »Swâ mit ich mac die maget hân«, sprach der heiden, »daz wirt getân unde mit triwen erzeiget.« der toufnapf wart geneiget ein lützel geinme Grâle, volliu wazzers an dem mâle, weder ze warm noch ze kalt. dâ stuont ein grâwer priester alt, der ûz heidenschaft manic kindelîn ouch gestôzen hêt dar în. der sprach: »ir sült glouben, iwer sêle dem tievel rouben, an den hœhesten got aleine, des drîvalt ist gemeine unde al gelîche geurbort. got ist mensch unde sînes vater wort, sît er ist vater unde kint, die al gelîche gehêrt sint, ebenhêr sînem geiste; mit der drîer volleiste wert iu ditze wazzer heidenschaft. mit der trinitâte kraft in wazzer er ze toufe gienc, nâch dem Adam antlütze enpfienc. von wazzer boume sint gesaft; wazzer viuht al die geschaft, der man vür crêatiure giht; mit dem wazzer man gesiht; wazzer gît maniger sêle schîn, daz die engel niht liehter dorften sîn.«

*T »Wâ von ich sol die maget hân«, sprach der heiden, »daz wirt gar getân und mit triuwen an mir erzeiget.« der toufnapf wart geneiget ein lützel gein dem Grâle. vol wazzers an dem mâle wart si, zuo warm noch zuo kalt. dâ stuont ein grâwer priester alt, der ûz heidenschaft manec kindelîn ouch gestôzen hâte drîn. der sprach: »ir sult gelouben, iuwer sêle dem tiuvele rouben, ane den hœhesten got aleine, des drîvalt ist gemeine und alle glîche geurbort. got ist mensche und sînes vater wort, sît er ist vater und kint, alle glîche gehêret sint, ebenhêr sîme geiste; mit der drîer volleiste wert iu diz wazzer heidenschaft. mit der trinitât kraft in wazzer er zuo toufe gienc, nâch dem Adam antlitze enpfienc. von wazzer boume sint gesaft; wazzer viuhte al die kraft, der man vür crêatiure giht; mit dem wazzer man gesiht; wazzer gît manegen sêlen schîn, daz die engele niht liehter dorften sîn.«