*D Wie diu wirtîn selbe dan gegienc unt wie manz dâ nâch an gevienc, daz man sîn wol mit betten pflac, der doch durch minne unsanfte lac, Wie al der templeise diet mit senfte unsenfte von in schiet, dâ von würde ein langiu sage; ich wil iu künden von dem tage: dô der des morgens vruo erschein, Parzival wart des enein unt Anfortas, der guote, mit endehaftem muote si bâten den von Zazamanc komen, den diu minne twanc, in den tempel vür den Grâl. er gebôt ouch an dem selbem mâl dem wîsem templeise dar. scharjande, rîter, grôziu schar dâ stuont. nû gienc der heiden în. der toufnapf was ein rubîn, von jaspis ein grêde sinwel, dâr ûf er stuont; Titurel het in mit kost erziuget sô. Parzival zuo sînem bruoder dô sprach: »wiltû die muomen mîn haben, al die gote dîn muostû durch si versprechen unt immer gerne rechen den widersaz des hœhsten gotes unt mit triwen schônen sînes gebotes.«

*m wie diu wirtîn selben dan gienc und wie manz dâ nâch an vienc, daz man sîn wol mit betten pflac, der doch durch minne unsanft lac, wie alle der templeise diet mit vröuden unvröude von in schiet, dâ von würde ein langiu sage; ich wil iu künden von dem tage: dô des morgens lieht erschein, Parcifal wart des in ein und Anfortas, der guote, mit endehaftem muote si bâten den von Zazamanc komen, den diu minne twanc, in den tempel vür den Grâl. er gebôt ouch an dem selben mâl dem wîsen templeise dar. sarjande, ritter, grôziu schar dâ stuont. nû gienc der heiden în. der toufnapf was ein rubîn, von jaspis ein grêde sinwel, dâr ûf er stuont; Titurel het in mit koste erziuget sô. Parcifal zuo sînem bruoder dô sprach: »wiltû die muomen mîn haben, alle die gote dîn muostû durch si versprechen und iemer gerne rechen den widersaz des hœhsten gotes und mit triuwen schônen sînes gebotes.«

*G Swie diu wirtîn selbe dan gienc unde wie manz dar nâch an vienc, daz man sîn wol mit triwen pflac, der doch durch minne unsanft lac, unde wie al der templeis diet mit senft unsenft von im schiet, daz würde ein al ze langiu sage; ich wil iu künden von dem tage: dô ders morgens lieht erschein, Parzival wart des in ein unde Anfortas, der guote, mit endehaftem muote si bâten den von Zazamanc komen, den diu minne twanc, in den tempel vür den Grâl. er gebôt ouch an dem selben mâl den wîsen templeisen dar. sarjande, rîter, grôziu schar hie stuont. dâ gienc der heiden în. der toufnapf was ein rubîn, von jaspis ein grêde sinwel, dâr ûfe er stuont; Titurel het in mit koste erziuget sô. Parzival ze sînem bruoder dô sprach: »wil dû die muomen mîn haben, al die gote dîn muostû durch si versprechen unde imer gerne rechen den widersaz des hœhesten gotes unde mit triwen schônen sînes gebotes.«

*T Wie diu wirtinne selber dan gienc und wie manz dar nâch an vienc, daz man sîn wol mit betten pflac, der doch durch minne unsanfte lac, und wie al der templeise diet mit senfte unsenfte von im schiet, daz würde al zuo langiu sage; ich wil iu künden von dem tage: dô der des morgens lieht erschein, Parcifal wart des enein und Anfortas, der guote, mit endehaftem muote si bâten den von Zazamanc komen, den diu minne twanc, in den tempel vür den Grâl. er gebôt ouch an dem selben mâl den wîsen templeisen dar. sarjande, rîter, grôziu schar dâ stuont. hie gienc der heiden în. der toufnapf was ein rubîn, von jaspis ein grât sinewel, dâr ûf er stuont; Tyturel hât in mit kost erziuget sô. Parcifal zuo sîme bruoder dô sprach: »wiltû die muomen mîn haben, al die gote dîn muostû durch si versprechen und imer gerne rechen den widersaz des hœhesten gotes und mit triuwen schônen sînes gebotes.«