*D der knabe sîn wolde küssen niht. werden kinden man noch vorhte giht. Des lachete der heiden. dô begunden si sich scheiden ûf dem hove unt dô diu künegîn erbeizet was. in kom gewin an ir mit vreuden künfte al dar. man vuorte si, dâ werdiu schar von maneger clâren vrouwen was. Feirefiz unt Anfortas mit zühten stuonden bêde bî der vrouwen an der grêde. Repanse de schoye unt von Gruonlant Garschiloye, Florie von Lunel, liehtiu ougen und clâriu vel die truogen unt magetuomlîchen prîs. Dâ stuont ouch swankel als ein rîs, der schœne unt güete niht gebrach unt der man im ze tohter jach, von Ryl Jernise; diu maget hiez Ampflise. von Tenabroc, ist mir gesagt, stuont dâ Clarinschanze, ein süeziu magt, liehter varwe gar unverkrenket, als ein âmeize gelenket. Feirefiz gein der wirtîn trat; diu künegîn den sich küssen bat. si kuste ouch Anfortasen dô unt was sîner urlœsunge vrô.

*m der knabe sîn wolte küssen niht, von vorht, als kinden noch beschiht. des lachete der heiden. dô begunden si sich scheiden ûf dem hof und dô diu künigîn erbeizet was. in kam gewin an ir mit vröuden kunft al dar. man vuorte si, dâ werdiu schar von maniger clâren vrôwen was. Ferefiz und Anfortas mit zühten stuonden beide bî der vrowen an dem gereite. dâ stuont Repanse de schoye und von Grunlant Garschiloye, Florie von Lunel. liehtiu ougen, clâriu vel si truogen und magetlîchen prîs. dâ stuont ouch swankel als ein rîs, der schœnde und güete niht gebrach und der man zuo tohter jach von Rile Gernise; diu maget hiez Ampflise. von Tenebroc, ist mir gesaget, stuont dâ Clarinschanze, ein maget, liehter varwe gar unverkrenket, als ein âmeize gelenket. Ferefiz gegen der wirtîn trat; diu künigîn sich den küssen bat. si kuste ouch Anfortassen dô und was sîner geniste vrô.

*G der knabe sîn wolde küssen niht. werden kinden man noch vorhte giht. des lacht der heiden. dô begunden si sich scheiden ûf dem hof, dâ diu künigîn erbeizt was, unde giengen în an ir mit werder kunft al dar. man vuort si, dâ werdiu schar von maniger klâren vrouwen was. Feirafiz unde Anfortas mit zühten stuonden bêde bî den vrouwen an der grêde. Urrepanse de schoye, von Gruonlanden Karziloyde, Flori unde Ionel, clâriu ougen unde liehtiu vel, die truogen magetlîchen prîs. dâ stuont ouch swankel als ein rîs, der schœn unde güete niht gebrach unde der man im ze tohter jach, von Rile Schernise; diu maget hiez Amflise. von Tenebroch, ist mir gesaget, stuont dâ Clarissanze, ein süeziu maget, an ir schœne gar unverkrenket, als ein âmeize gelenket. Feirafiz gên der wirtinne trat; diu küneginne sich den küssen bat. si kust ouch Anfortasen dô unde was sîner urlœsunge vrô.

*T der knappe wolte sîn küssen niht. werden kinden man noch vorhte giht. des lachete der heiden. dô begunden si sich scheiden ûf dem hove, dâ diu künegîn erbeizet was. im kam gewin an ir mit vreuden künfte al dar. man vuorte si, dâ manegiu schar von manegen clâren vrouwen was. Ferefis und Anfortas mit zühten stuonden bêde bî den vrouwen an der grêde. Repanse de joie, von Gruonlant Garschiloie, Florie und Zunel, liehtiu ougen und clârez vel die truogen und magetuomlîchen prîs. dâ stuont ouch swanc als ein rîs, der schœne und güete niht gebrach und der man im zuo tohter jach, von Rile Schernise; diu maget hiez Anflise. von Tenebroc, wart mir gesaget, stuont dâ Clarissanze, ein süeziu maget, an ir schœne gar unverkrenket, als ein âmeize gelenket. Ferefis gein der wirtîn trat; diu küneginne sich den küssen bat. Si kust ouch Anfortassen dô und was sîner erlœsunge vrô.