*D Er vrâgete den künec Gramoflanz, ob diu liebe wære ganz zwischen im unt der nifteln sîn, daz er daz tæte an im nû schîn: »helfet ir unt mîn neve Gawan, swaz wir hie künege unt vürsten hân, barûne unt arme rîter gar, daz der decheiner hinnen var, ê si mîn kleinœde ersehen. mir wære ein laster hie geschehen, schiede ich vor gâbe hinnen vrî. swaz hie varendes volkes sî, die warten alle gâbe an mich. Artus, nû wil ich bitten dich, deiz den hôhen niht versmâhe, des gewerbes gein in gâhe unt wis des lasters vür si pfant - si erkanten nie sô rîche hant - unt gib mir boten in mîne habe, dâ der prêsente sol komen abe.« si lobten dem heiden, sine wolten sich niht scheiden von dem velde in vier tagen. der heiden wart vrô, sus hôrt ich sagen. Artus im wîse boten gap, die er solde senden anz hap. Feirefiz, Gahmuretes kint, nam tincten unt permint. sîn schrift wârzeichens niht verdarp; ich wæne, ie brief sô vil erwarp.

*m er vrâgte den künic Gramolanz, ob diu liebe wær sô ganz zwischen im und der nifteln sîn, daz er daz tæte an im schîn: »helfet ir mir und mîn neve Gawan, waz wir hie künige und vürsten hân, barûne und armer ritter gar, daz der dekeiner hinnen var, ê si mîn kleinœte ersehen. mir wær ein laster hie geschehen, schied ich vor gâbe hinnen vrî. waz hie varndes volkes sî, die warten alle gâbe an mich. neve Artus, ich wil bitten dich, daz ez den hôhen niht versmâhe, des gewerbes gegen in gâhe und wis des lasters vür mich pfant - si erkanten nie sô rîche hant - und gip mir boten in mîn habe, dâ der prêsent sol komen abe.« dô lobten si dem heiden, si wolten sich niht scheiden von dem velde in vier tagen. der heiden wart vrô, sus hôrt ich sagen. Artus im wîse boten gap, die er solte senden an daz hap. Ferefiz, Gahmuretes kint, nam tinten und birmint. sîn geschrift wortzeichens niht verdarp; ich wæne, ie brief sô vil erwarp.

*G Er vrâgte den künic Gramoflanz, op diu suone wære ganz zwischen im unde der nifteln sîn, daz er daz tæte an im schîn: »helft ir unde Gawan, swaz wir künige oder vürsten hân, Britun unde ander vürsten gar, daz der deheiner hinnen var, ê si mîn kleinœde ersehen. mir wære ein laster dran geschehen, schiede ich vor gâbe hinnen vrî. swaz hie varndes volkes sî, die warten alle gâbe an mich. Artus, nû wil ich biten dich, daz den hôhen niht versmâhe mînes gewerbes gâbe unde wis des lasters vür si pfant - sine erkanten nie sô rîche hant - unde gip mir boten in mîne habe, dâ der prêsent sol komen abe.« dô enbuten si dem heiden, sine wolden sich niht scheiden von dem velde inner vier tagen. der heiden wart vrô, hôrt ich sagen. Artus im wîse boten gap, die er solde senden in daz hap. dô nam Gahmuretes kint tinten unde bermint. sîner schrift wârzeichen niht verdarp; ich wæne, ie brief sô vil erwarp.

*T er vrâgete den künec Gramoflanz, ob diu liebe wære ganz zwischen im und der nifteln sîn, daz er daz tæte an im schîn: »helfet ir und Gawan, waz wir künege oder vürsten hân, barûne und armer rîter gar, daz ir dekeiner hinnen envar, ê si mîn kleinœde ersehen. mir wære ein laster hie geschehen, schiede ich vor gâbe hinnen vrî. waz hie varndes volkes sî, die warten alle gâben an mich. Artus, nû wil ich biten dich, daz ez den hôhen niht versmâhe, des gewerbes gein in gâhe und bis des lasters vür si pfant - si erkanten nie sô rîche hant - und gib mir boten an mîne habe, dâ der prîsant sol komen abe.« dô enbuten si dem heiden, si enwolten sich niht scheiden von dem velde in vier tagen. der heiden wart vrô, hôrt ich sagen. Artus im wîse boten gap, die er solte senden in daz hap. Ferefis, Gahmuretes kint, nam tinten und permint. sîner schrifte wârzeichen niht verdarp; ich wæne, ie brief sô vil erwarp.