*D wolt ich dâventiure vürbaz lân. Dô enbôt mîn hêr Gawan ze hove Artuse mære, wer dâ komen wære: der rîche heiden wære dâ, den diu heidenîn Eckuba sô prîste bî dem Plimizœl. Jofreit fiz Ydœl Artuse daz mære sagete, des er vreude vil bejagete. Jofreit bat in ezzen vruo unt clârlîche grîfen zuo mit rîtern und mit vrouwen schar unt höfschlîche komen dar, daz siz sô ane geviengen unt werdeclîche enpfiengen des stolzen Gahmuretes kint. »Swaz hie werder liute sint, die bringe ich«, sprach der Bertenois. Jofreit sprach: »er ist sô kurtois, ir muget in alle gerne sehen, wan ir sult wunder an im spehen. er vert ûz grôzer rîcheit; sîniu wâpenlîchiu kleit niemen vergelten möhte, deheiner hant daz töhte. Lœver, Bertane, Engellant, von Paris unz an Wizsant, der dar gein leite al die terre, ez wærem gelte verre.«

*m wolt ich die âventiur hie lân. dô enbôt mîn hêr Gawan zuo hove Artuse mære, wer dâ komen wære: der rîche heiden wær dâ, den diu heidenîn Ecuba sô prîste bî dem Plimizol. Jofreit fiz Idol Artuse daz mære sagete, des er vröude vil bejagete. Jofreit bat in ezzen vruo und clærlîch grîfen zuo, daz er hübschlîch kæme dar, mit ritter und mit vröuden schar, und daz si ez sô an geviengen, daz si wirdeclîch enpfiengen des stolzen Gahmuretes kint. »waz hie werder liute sint, die bring ich«, sprach der Britunois. Jofreit sprach: »er ist sô kurtois, ir moget in alle gerne sehen, wan ir müget wunder an im spehen. er vert ûz grôzer rîcheit; sîn wâpenlîchez kleit niemen vergelten möhte, dekeiner hant daz töhte. Lover, Britanie, Engelant, von Paris unz an Wisant, der dar gegen leit alle die terre, ez wære deme gelte verre.«

*G Wolde ich dise âventiure vürbaz hân. dô enbôt mîn hêr Gawan ze hove Artuse mære, wer dâ komen wære: der rîche heiden wære dâ, den diu heideninne Eccuba sô brîste bî dem Blimzol. Jofreit fis Idol Artus dô mære sagte, des er vröude vil bejagte. Jofreit bat in ezzen vruo unde clârlîchen grîfen zuo mit rîtern unde mit vrouwen schar unde höfschlîche komen dar, daz siz sô an geviengen unde werdeclîche enpfiengen des stolzen Gahmureten kint. »swaz hie werder liute sint, die bringe ich«, sprach der Britaneis. Jofreit sprach: »er ist sô kurteis, ir müget in alle gerne sehen, wan ir müget wunder an im spehen. er vert ûz grôzer rîcheit; sîniu wâpenlîchiu kleit niemen vergelten möhte, deheiner hant daz töhte. Lover, Britanie, Engellant, von Paris unze an Wizsant, der dar gein leit alle die terre, ez wære jenem gelte verre.«

*T wolt ich dise âventiure vürbaz hân. dô enbôt mîn hêr Gawan zuo hove Artuse mære, wer dâ komen wære: Der rîche heiden wære dâ, den diu heidenîn Eckuba sô prîste bî dem Plymizol. Jofreit fis Idol Artuse die mære sagete, daz er vreuden vil bejagete. Jofreit bat in ezzen vruo und clârlîchen grîfen zuo mit rîtern und mit vrouwen schar und höveschlîchen komen dar, daz si ez sô ane viengen und wirdeclîche enpfiengen des stolzen Gahmuretes kint. »waz hie werder liute sint, die bringe ich«, sprach der Britonois. Jofreit sprach: »er ist sô kurtois, ir muget in alle gerne sehen, wan ir sult wunder an im spehen. er vert ûz grôzer rîcheit; sîn wâpenlîch kleit nieman vergelten möhte, dekeiner hant daz töhte. Lover, Britanie und Engellant, von Paris unz an Wizsant, der dar geine leget al die terre, ez wære dem gelte verre.«